ນາງສາວລາວປະຈຳປີ 2017 ຄອງ 3 ຕຳແໜ່ງພ້ອມກັນ
ວັນທີ 19 ພະຈິກຜ່ານມານີ້, ບໍລິສັດ ມິສລາວຈຳກັດ ຮ່ວມກັບ ສູນກາງຊາວໜຸ່ມ ປະຊາຊົນປະຕິວັດລາວ, ໄດ້ຈັດງານປະກວດນາງສາວລາວ ປະຈຳປີ 2017 ຂຶ້ນທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ເພື່ອຄັດເລືອກເອົານາງສາວງາມທີ່ຄົບຕາມເງື່ອນໄຂຂອງກອງປະກວດ ກໍຄືບໍລິສັດມິສລາວ ວາງອອກ, ຊຶ່ງເລືອກເອົາພຽງ 5 ຄົນໃນຈຳນວນ 20 ຄົນທີ່ຜ່ານເຂົ້າຮອບ, ໃນນັ້ນ ມີພຽງຄົນດຽວທີ່ຄອງຕຳແໜ່ງນາງສາວລາວ ປະຈຳປີ 2017, ຊຶ່ງແມ່ນຜູ້ເຂົ້າປະກວດໝາຍເລກ ML13 ນາງ ດວງພະໄທ ເມກສີທອງ ຕົວແທນຈາກນະຄອນຫລວງວຽງຈັນ, ເປັນຜູ້ຄອງຕຳແໜ່ງນາງສາວລາວ ປະຈຳປີ 2017, ໄດ້ຮັບເງິນສົດ 30 ລ້ານກີບ, ຊຸດເຄື່ອງປະດັບຈາກຮ້ານຄຳພູວົງ ນ້ຳໜັກ 2 ບາດ, ມຸງກຸດເພັດ ມູນຄ່າຫລາຍລ້ານກີບ, ສາຍສະພາຍໄໝເງິນ, ພ້ອມຂອງລາງວັນອື່ນໆຢ່າງຫລວຫລາຍ, ຂະນະດຽວກັນ ກໍໄດ້ຄອງຕຳແໜ່ງນາງສາວທ່ອງທ່ຽວ (Miss Tourism) ແລະ ໄດ້ຮັບລາງວັນນາງສາວໜ້າອ່ອນກວ່າໄວ ໄດ້ຮັບເງິນສົດ 1 ລ້ານກີບ, ພ້ອມດື່ມນົມດີນ່າ ລ້າໆ 1 ປີ.
ຂະນະດຽວກັນ, ຜູ້ເຂົ້າປະກວດໝາຍເລກ ML15 ນາງ ຈັນປະເສີດ ສິດທິພັນ ຕົວແທນຈາກແຂວງອັດຕະປື ໄດ້ຮັບຕຳແໜ່ງຮອງອັນດັບທີ 1 ໄດ້ຮັບເງິນສົດ 20 ລ້ານກີບ, ສາຍສະພາຍໄໝເງິນ ແລະ ຂອງລາງວັນອື່ນໆ, ສ່ວນຜູ້ເຂົ້າປະກວດໝາຍເລກ ML19 ນາງ ວິລະພອນ ຂັນແກ້ວ ຕົວແທນຈາກນະຄອນຫລວງວຽງຈັນ ໄດ້ຮັບຕຳແໜ່ງ ຮອງອັນດັບທີ 2 ໄດ້ຮັບເງິນສົດ 15 ລ້ານກີບ, ສາຍສະພາຍໄໝເງິນ ແລະ ຂອງລາງວັນອື່ນໆ, ພ້ອມນີ້ ຜູ້ເຂົ້າປະກວດໝາຍເລກ ML9 ນາງ ສຸດາວອນ ອິນທະວົງ ຕົວແທນຈາກນະຄອນຫລວງວຽງຈັນ ໄດ້ຮັບຕຳແໜ່ງຮອງອັນດັບທີ 3 ໄດ້ຮັບເງິນສົດ 10 ລ້ານກີບ, ສາຍສະພາຍໄໝເງິນ ແລະ ຂອງລາງວັນອື່ນໆ, ສ່ວນຜູ້ເຂົ້າປະກວດໝາຍເລກ ML8 ນາງ ເຂັມເພດ ອານຸລັກ ຕົວແທນຈາກແຂວງຫລວງພະບາງ ໄດ້ຮັບຕຳແໜ່ງຮອງອັນດັບທີ 4 ໄດ້ຮັບເງິນສົດ 8 ລ້ານກີບ, ສາຍສະພາຍໄໝເງິນ ແລະ ຂອງລາງວັນອື່ນໆ. ນອກນີ້ ຜູ້ເຂົ້າປະກວດໝາຍເລກ ML 4 ນາງ ດວງໄຈ ແກ້ວວົງສີ ໄດ້ຮັບລາງວັນນາງສາວມິດຕະພາບ, ໄດ້ຮັບເງິນສົດ 2 ລ້ານກີບ ແລະ ML1 ນາງ ພອນມະນີ ໂພທິສານ ໄດ້ຮັບລາງວັນນາງສາວຂັວນໃຈຊ່າງພາບ ໄດ້ຮັບເງິນສົດ 2 ລ້ານກີບ.
ງານດັ່ງກ່າວ ຈັດຂຶ້ນເພື່ອສ້າງກິດຈະກຳໃຫ້ໄວໜຸ່ມ, ໂດຍສະເພາະໄວໜຸ່ມເພດຍິງຫັນມາສົນໃຈໃນການສຶກສາຫາຄວາມຮູ້, ສ້າງໃຫ້ມີຈິດສຳນຶກຄວາມຮັກຊາດ, ວັດທະນະທຳ, ຮີດຄອງປະເພນີອັນດີງາມຂອງຊາດລາວ, ມີຄວາມກ້າຫານໃນການສະແດງອອກເຖິງຄວາມສາມາດ, ເພື່ອນຳໄປເຜີຍແຜ່ໃຫ້ຕ່າງຊາດໄດ້ຮັບຮູ້ ແລະ ຍົກສູງບົດບາດແມ່ຍິງລາວສູ່ເວທີສາກົນອີກດ້ວຍ.
