ຝ່າຍຕໍ່ຕ້ານລັດຖະບານຊິຣີປະຕິບັດການສາຍຟ້າເຫລື້ອມ ຈູ່ໂຈມຄັ້ງໃຫຍ່ຢູ່ເມືອງອາເລັບໂປ

      ກອງກໍາລັງຝ່າຍຕໍ່ຕ້ານລັດຖະບານຊິຣີ ປະຕິບັດການໂຈມຕີເມືອງໃຫຍ່ອັນດັບສອງຂອງປະເທດແບບສາຍຟ້າເຫລື້ອມ ແລະ ສາມາດເຂົ້າເຖິງພື້ນທີ່ເປັນຄັ້ງທໍາອິດໃນຮອບ 8 ປີ.

      ອົງກອນສັງເກດການດ້ານສິດທິມະນຸດຊິຣີ (SOHR) ລາຍງານວ່າ: ກອງກໍາລັງນັກຮົບຈີຮັດຊື່ ຮາຍັດ ຕາຣີ ອັລ-ຊາມ ແລະ ກອງກໍາລັງຝ່າຍຕໍ່ຕ້ານລັດຖະບານຊິຣີຫລາຍກຸ່ມ ເຊິ່ງໄດ້ຮັບການສະໜັບສະໜູນຈາກຕວກກີ ຮ່ວມກັນປະຕິບັດການສາຍຟ້າເຫລື້ອມ ໂຈມຕີເມືອງອາເລັບໂປ ທີ່ຢູ່ທາງຕາເວັນຕົກສຽງເໜືອ ແລະ ເປັນເມືອງໃຫຍ່ອັນດັບສອງຂອງຊິຣີ ຮອງຈາກນະຄອນຫລວງດາມັດກັດ ໃນກາງອາທິດນີ້.

      ສະຖານະການດັ່ງກ່າວຖືເປັນການໂຈມຕີຖານທີ່ໝັ້ນຂອງລັດຖະບານຊິຣີໂດຍຝ່າຍຕໍ່ຕ້ານຄັ້ງຍິ່ງໃຫຍ່ທີ່ສຸດໃນຮອບຫລາຍປີ ແລະ ຖືເປັນຄັ້ງທໍາອິດນັບແຕ່ປີ 2016 ທີ່ກອງກໍາລັງຝ່າຍຕໍ່ຕ້ານລັດຖະບານສາມາດກັບເຂົ້າສູ່ເມືອງອາເລັບໂປໄດ້ອີກ ຫລັງຖືກທະຫານ ແລະ ກອງກໍາລັງສະໜັບສະໜູນລັດຖະບານຊຸກດັນອອກໄປ ໂດຍ SOHR ກ່າວວ່າ: ກອງກໍາລັງຝ່າຍຕໍ່ຕ້ານສາມາດຍົກພົນເຂົ້າສູ່ເຂດຕາເວັນຕົກຂອງເມືອງອາເລັບໂປ ເຊິ່ງມີປະຊາກອນອາໄສຢູ່ໜາແໜ້ນ ໃນວັນທີ 29 ພະຈິກຜ່ານມາ.

       ຂະນະດຽວກັນ, SOHR ຢືນຢັນຈໍານວນຜູ້ເສຍຊີວິດຢ່າງໜ້ອຍ 272 ຄົນ ຈາກການສູ້ຮົບສະເພາະໃນວັນທີ 29 ພະຈິກຜ່ານມາພຽງມື້ດຽວ ໃນຈໍານວນນີ້ຢ່າງໜ້ອຍ 28 ຄົນ ເປັນພົນລະເຮືອນເຊິ່ງເສຍຊີວິດຈາກປະຕິບັດການໂຈມຕີທາງອາກາດຕອບໂຕ້ກອງທັບຣັດເຊຍ ເຊິ່ງສະໜັບສະໜູນລັດຖະບານຊິຣີ.

       ທ່ານ ດາມິທຣີ ເປສຄອບ ໂຄສົກທໍານຽບເກຣມລິນ ກ່າວວ່າ: ສະຖານະການທີ່ກໍາລັງເກີດຂຶ້ນຢູ່ເມືອງອາເລັບໂປ ເປັນການລ່ວງລະເມີດອະທິປະໄຕ ແລະ ບູລະນະພາບແຫ່ງດິນແດນຂອງຊິຣີຢ່າງຮ້າຍແຮງ ແລະ ຢືນຢັນວ່າ: ລັດຖະບານມົດສະກູຈະມອບການສະໜັບສະໜູນໃຫ້ລັດຖະບານດາມັດກັດໃນການຮັດແຄບພື້ນທີ່ກັບຄືນ.

      ຂະນະທີ່ກະຊວງການຕ່າງປະເທດອີຣານອອກຖະແຫລງການ ຢືນຢັນຈະມອບການສະໜັບສະໜູນຢ່າງເຕັມທີ່ໃຫ້ຊິຣີເຊັ່ນກັນ, ສ່ວນກະຊວງການຕ່າງປະເທດຕວກກີຮຽກຮ້ອງໃຫ້ຣັດເຊຍຢຸດປະຕິບັດການໂຈມຕີທາງອາກາດຢູ່ເມືອງອາເລັບໂປ.