ນ້ຳຖ້ວມໃຫຍ່ຢູ່ມາເລເຊຍກະທົບຢ່າງໜ້ອຍ 9 ລັດ ອົບພະຍົບຫລາຍກວ່າ 120,000 ຄົນ
ນໍ້າຖ້ວມຄັ້ງຮຸນແຮງຢູ່ມາເລເຊຍ ສ້າງຄວາມເດືອດຮ້ອນໃຫ້ປະຊາຊົນຢ່າງໜ້ອຍ 9 ລັດ ແລະ ຕ້ອງມີການອົບພະຍົບແລ້ວຫລາຍກວ່າ 120,000 ຄົນ.
ກະຊວງພາຍໃນມາເລເຊຍອອກຖະແຫລງການວ່າ: ມີຢ່າງໜ້ອຍ 9 ລັດ ຈາກທັງໝົດ 13 ລັດຂອງປະເທດ ໄດ້ແກ່ ຕຣັງການູ, ກລັນຕັນ, ເກດະ, ເນກຣີເຊມລີບັນ, ປະລິສ, ຍະໂຮ, ມະລະກາ, ເປຣັກ ແລະ ສະລັງລໍ ກໍາລັງຜະເຊີນຜົນກະທົບຢ່າງໜັກຈາກອຸທົກກະໄພຄັ້ງຮຸນແຮງທີ່ສຸດໃນຮອບຫລາຍທົດສະວັດ ແລະ ເກີດຂຶ້ນຢ່າງກະທັນຫັນຈາກຝົນທີ່ຕົກລົງມາຢ່າງໜັກຕໍ່ເນື່ອງໃນອາທິດນີ້.
ທັງນີ້, ໜ່ວຍງານທີ່ກ່ຽວຂ້ອງຮ່ວມກັນອົບພະຍົບຜູ້ປະສົບໄພໄປຢູ່ພື້ນທີ່ປອດໄພ ລວມແລ້ວຫລາຍກວ່າ 120,000 ຄົນ ແລະ ມີລາຍງານຜູ້ເສຍຊີວິດແລ້ວ 6 ຄົນ.
ຂະນະທີ່ນາຍົກລັດຖະມົນຕີ ອັນວາ ອິບຣາຮິມ ຜູ້ນໍາມາເລເຊຍ ເນັ້ນໃຫ້ໜ່ວຍງານທຸກແຫ່ງທີ່ກ່ຽວຂ້ອງ ເລັ່ງຊ່ວຍເຫລືອປະຊາຊົນຢ່າງສຸດຄວາມສາມາດ ແລະ ໃນລະຫວ່າງນີ້ຫ້າມລັດຖະມົນຕີທຸກຄົນລາພັກຮ້ອນ ໂດຍໃຫ້ປ່ຽນຜຽນກັນລົງພື້ນທີ່ ເພື່ອສັງເກດສະຖານະການ ແລະ ຢ້ຽມຢາມຜູ້ປະສົບໄພ.
ສ່ວນທ່ານ ອາໝັດ ຊາຮິດ ຮາມິດີ ຮອງນາຍົກລັດຖະມົນຕີມາເລເຊຍ ກ່າວວ່າ: ສະຖານະການນໍ້າຖ້ວມຄັ້ງໃຫຍ່ໃນປີນີ້ ມີທ່າອ່ຽງຮຸນແຮງກວ່າປີ 2014 ເຊິ່ງຕອນນັ້ນມີຜູ້ເສຍຊີວິດຢ່າງໜ້ອຍ 21 ຄົນ ແລະ ປະຊາຊົນຫລາຍກວ່າ 250,000 ຄົນ ຕ້ອງອົບພະຍົບ ແລະ ກົມອຸຕຸນິຍົມວິທະຍາແຫ່ງຊາດຂອງມາເລເຊຍພະຍາກອນວ່າ: ຈະຍັງມີຝົນຕົກຢ່າງໜັກ ແລະ ຕໍ່ເນື່ອງໃນໄລຍະນີ້.
