UN ເຜີຍ 1 ໃນ 3 ຂອງປະຊາກອນໂລກຍັງເຂົ້າບໍ່ເຖິງອິນເຕີເນັດ

      ສະຫະປະຊາຊາດ (UN) ກ່າວວ່າ: ການນໍາໃຊ້ອິນເຕີເນັດທົ່ວໂລກເພີ່ມຂຶ້ນຢ່າງຊ້າໆ, ແຕ່ຄວາມແຕກຕ່າງຍັງເຫັນໄດ້ຊັດເຈນໃນພາກພື້ນທີ່ທຸກຍາກ ເຊິ່ງປະຊາກອນ 1 ໃນ 3 ຂອງໂລກຍັງເຂົ້າບໍ່ເຖິງສື່ອອນລາຍ.

      ຂໍ້ມູນຈາກສະຫະພາບໂທລະຄົມມະນາຄົມສາກົນ (ITU) ເຊິ່ງເປັນໜຶ່ງໃນອົງກອນພິເສດຂອງ UN ເປີດເຜີຍວ່າ: ຕົວເລກດັ່ງກ່າວເພີ່ມຂຶ້ນ 227 ລ້ານຄົນ ເມື່ອທຽບໃສ່ປີຜ່ານມາ ເຊິ່ງສະແດງໃຫ້ເຫັນເຖິງຄວາມແຕກຕ່າງລະຫວ່າງເຂດໃນເມືອງກັບເຂດຊົນນະບົດຫ່າງໄກໃນປະເທດທຸກຍາກ.

      ITU ລະບຸວ່າ: ປະຊາກອນໂລກ 68% ອອນລາຍ, ແຕ່ຊ່ອງຫວ່າງທາງດິຈີຕອນສາກົນລາຍໄດ້ສູງກັບລາຍໄດ້ຕໍ່າ ກໍາລັງປິດກັ້ນປະຊາຊົນຈາກການເຂົ້າເຖິງຂໍ້ມູນ, ການສຶກສາ ແລະ ໂອກາດທາງການຈ້າງວຽກອອນລາຍ.

       ລາຍງານໃນປີນີ້ລະບຸວ່າ: 93% ຂອງປະຊາກອນໃນປະເທດທີ່ມີລາຍໄດ້ສູງໄດ້ໃຊ້ອິນເຕີເນັດ ສວນທາງຕົວເລກ 27% ໃນປະເທດລາຍໄດ້ຕໍ່າ.

       ເຖິງຢ່າງໃດກໍດີ, ຊ່ອງຫວ່າງທາງເພດໃນການເຂົ້າເຖິງອິນເຕີເນັດກໍາລັງຫລຸດລົງ ໂດຍຕົວເລກຂອງເພດຊາຍຢູ່ລະດັບ 70% ແລະ ຜູ້ຍິງ 65% ຫລື ຕ່າງກັນກວ່າ 189 ລ້ານຄົນ.

       ຂະນະດຽວກັນ, ປະຊາກອນ 2,600 ລ້ານຄົນ ເຊິ່ງຍັງເຂົ້າບໍ່ເຖິງໂອກາດອອນລາຍ ອາໄສຢູ່ເຂດຊົນນະບົດ.