ສະພາອົດສະຕຣາລີຜ່ານຮ່າງກົດໝາຍ ຫ້າມຜູ້ມີອາຍຸຕໍ່າກວ່າ 16 ປີໃຊ້ໂຊຊຽວມີເດຍ
ອົດສະຕຣາລີເປັນປະເທດທໍາອິດຂອງໂລກ ເຊິ່ງຈະມີການບັງຄັບໃຊ້ກົດໝາຍ ຫ້າມບຸກຄົນມີອາຍຸຕໍ່າກວ່າ 16 ປີ ນໍາໃຊ້ເຄືອຂ່າຍສັງຄົມອອນລາຍ.
ວຸດທິສະພາອົດສະຕຣາລີມີມະຕິສຽງສ່ວນຫລາຍໃນກອງປະຊຸມວັນທີ 28 ພະຈິກຜ່ານມາ 34 ສຽງ ຕໍ່ 19 ສຽງ ຮັບຮອງຮ່າງກົດໝາຍຫ້າມບຸກຄົນມີອາຍຸຕໍ່າກວ່າ 16 ປີ ນໍາໃຊ້ເຄືອຂ່າຍສັງຄົມອອນລາຍທຸກປະເພດ.
ການເຄື່ອນໄຫວຂອງວຸດທິສະພາ ເກີດຂຶ້ນຫລັງສະພາຜູ້ແທນລາຊະດອນອົດສະຕຣາລີມີມະຕິໃນວັນທີ 27 ພະຈິກຜ່ານມາ ເຫັນພ້ອມຮ່າງກົດໝາຍດັ່ງກ່າວ ດ້ວຍສຽງສະໜັບສະໜູນ 102 ສຽງ ຕໍ່ 13 ສຽງ.
ເຖິງຢ່າງໃດກໍດີ, ສະພາຜູ້ແທນລາຊະດອນມີກໍານົດປະຊຸມກັນກ່ຽວກັບເລື່ອງນີ້ອີກ ໃນວັນທີ 29 ພະຈິກນີ້ ເພື່ອອະພິປາຍ ແລະ ລົງມະຕິຮ່າງກົດໝາຍແກ້ໄຂເພີ່ມຕື່ມ ໂດຍສະເພາະບັນຫາກ່ຽວຂ້ອງກັບການເປັນສ່ວນຕົວຂອງຜູ້ໃຊ້, ການຫ້າມບໍລິສັດເຕັກໂນໂລຊີຂໍຂໍ້ມູນທາງດິຈີຕອນທີ່ໜ່ວຍງານລັດເປັນຜູ້ກໍາກັບ ແລະ ບໍລິສັດເຫລົ່ານີ້ຈະບໍ່ສາມາດເຂົ້າເຖິງຂໍ້ມູນສ່ວນຕົວຂອງປະຊາຊົນທີ່ນໍາໃຊ້ແອັບພລິເຄຊັນ ຫລື ແພກຟອມອອນລາຍທີ່ລັດຖະບານສ້າງຂຶ້ນເອງ.
ທັງນີ້, ເມື່ອກົດໝາຍມີຜົນບັງຄັບໃຊ້ຢ່າງເປັນທາງການ ເຊິ່ງຈະເຮັດໃຫ້ອົດສະຕຣາລີເປັນປະເທດທໍາອິດຂອງໂລກທີ່ມີການບັງຄັບໃຊ້ກົດໝາຍເຈາະຈົງ ຫ້າມປະຊາຊົນໃນບາງກຸ່ມອາຍຸນໍາໃຊ້ສື່ສັງຄົມອອນລາຍ, ຜູ້ປະກອບການແຫ່ງໃດທີ່ບໍ່ປະຕິບັດຕາມອາດຜະເຊີນຄ່າປັບໄໝສູງເຖິງ 50 ລ້ານໂດລາອົດສະຕຣາລີ ຮຽກສຽງວິຈານຢ່າງໜັກຈາກເມຕາ, ເອັກ, ກູເກິລ ແລະ ຕິກຕັອກ ວ່າກົດໝາຍນີ້ມີເນື້ອໃນຄຸມເຄືອ, ຍັງມີບັນຫາອີກຫລາຍຢ່າງ ແລະ ຮີບຮ້ອນເກີນໄປ.
ສ່ວນນາຍົກລັດຖະມົນຕີ ແອນໂທນີ ອັລບາເນຊີ ຜູ້ນໍາອົດສະຕຣາລີ ກ່າວວ່າ: ກົດໝາຍນີ້ຈະຊ່ວຍບັນເທົາອັນຕະລາຍໃຫ້ເດັກ ແລະ ເຍົາວະຊົນ ແລະ ຢືນຢັນວ່າ: ລັດຖະບານຕັດສິນໃຈຖືກຕ້ອງແລ້ວທີ່ສະເໜີກົດໝາຍເຂົ້າສູ່ສະພາ.
