ພາຍຫິມະເດືອນພະຈິກຖະຫລົ່ມເຊອຸນ ໜັກສຸດໃນຮອບກວ່າ 100 ປີ ເສຍຊີວິດແລ້ວ 5 ຄົນ

       ກົມອຸຕຸນິຍົມວິທະຍາ ສ.ເກົາຫລີ ລະບຸວ່າ: ພາຍຸຫິມະໃນເດືອນພະຈິກໄດ້ພັດຖະຫລົ່ມນະຄອນຫລວງເຊອຸນ ສ.ເກົາຫລີ ໜັກສຸດໃນຮອບກວ່າ 100 ປີ ນັບແຕ່ມີການບັນທຶກສະຖິຕິຫິມະຕົກມາແຕ່ປີ 1907 ໂດຍວັດແທກລະດັບຄວາມສູງຂອງຫິມະທີ່ຕົກລົງມາໄດ້ 16.5 ຊັງຕີແມັດ ໃນວັນທີ 27 ພະຈິກຜ່ານມາ ກ່ອນຈະເພີ່ມລະດັບຄວາມສູງຢ່າງຕໍ່ເນື່ອງ. ເບື້ອງຕົ້ນບາງເຂດຂອງນະຄອນຫລວງເຊອຸນວັດແທກໄດ້ສູງກວ່າ 40 ຊັງຕີແມັດ.

      ຫິມະທີ່ຕົກລົງມາຢ່າງໜັກເຮັດໃຫ້ຫລາຍຖ້ຽວບິນປະກາດຍົກເລີກ ຫລື ເລື່ອນເວລາການເດີນທາງ. ຂະນະທີ່ເສັ້ນທາງແລ່ນເຮືອເຟີຣີ ແລະ ສະຖາບັນການສຶກສາຫລາຍແຫ່ງຢຸດໃຫ້ບໍລິການຊົ່ວຄາວ. ອີກທັງ ທາງການ ສ.ເກົາຫລີ ໄດ້ປະກາດເຕືອນປະຊາຊົນໃຫ້ເພີ່ມຄວາມລະມັດລະວັງໃນເວລາສັນຈອນຢູ່ຕາມຖະໜົນ. ຫລ້າສຸດມີຜູ້ເສຍຊີວິດກ່ຽວກັບພາຍຸຫິມະນີ້ແລ້ວຢ່າງໜ້ອຍ 5 ຄົນ, ບາດເຈັບອີກຢ່າງໜ້ອຍ 11 ຄົນ.

ອ້າງອີງ:

• https://www.theguardian.com/world/2024/nov/27/seoul-slows-down-under-blanket-of-heaviest-november-snow-in-100-years
• https://www.reuters.com/world/asia-pacific/south-korea-battles-second-day-heavy-snow-four-dead-2024-11-28/
• https://uk.news.yahoo.com/south-korean-capital-hit-record-065238050.html