ສພຊ ສະເໜີໃຫ້ ອົງການກວດກາ ແລະ ກວດສອບແຫ່ງລັດ ແກ້ໄຂ ບັນຫາທີ່ຄົງຄ້າງ
ທ່ານ ລີເບີ ລີບົວປາວ ປະທານກຳມາທິການ, ການເງິນ ແລະ ການກວດສອບ ໄດ້ຕາງໜ້າໃຫ້ຄະນະປະຈຳສະພາແຫ່ງຊາດ ປະກອບຄຳເຫັນ ໃສ່ບົດລາຍງານຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ ໂດຍໄດ້ສະແດງຄວາມຊົມເຊີຍ ຕໍ່ 2 ອົງການດັ່ງກ່າວ ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ນີ້ວ່າ: ສະເໜີໃຫ້ອົງການກວດກາແຫ່ງລັດ ສືບຕໍ່ປັບປຸງແກ້ໄຂ ຫລາຍບັນຫາສຳຄັນ ເປັນຕົ້ນ ໃຫ້ເພີ່ມທະວີຈັດຕັ້ງປະຕິບັດກົດໝາຍ ວ່າດ້ວຍການກວດກາລັດ ໂດຍສະເພາະ ໃນມາດຕາ 28 ການພິຈາລະນາ ຜົນການກວດກາ, ມາດຕາ 29 ການແກ້ໄຂຜົນການກວດກາ ແລະ ມາດຕາ 30 ການຕິດຕາມ, ຊຸກຍູ້, ການກວດກາ ການແກ້ໄຂຜົນການກວດກາ ເຊິ່ງເຫັນວ່າ ບໍ່ທັນມີຜົນສັກສິດເທົ່າທີ່ຄວນ; ໃຫ້ເປັນເຈົ້າການ ແລະ ປະສານສົມທົບກັບ ອົງການຄຸ້ມຄອງເປົ້າໝາຍທີ່ຖືກກວດກາ ແລະ ພາກສ່ວນກ່ຽວຂ້ອງ ໄຈ້ແຍກລະອຽດຜົນຂອງການກວດກາ ອັນໃດສາມາດແກ້ໄຂໄດ້, ອັນໃດບໍ່ສາມາດແກ້ໄຂໄດ້ ຫລື ບໍ່ມີຕົວຕົນ ຕາມທີ່ໄດ້ກຳນົດໃນມະຕິສະພາແຫ່ງຊາດ ແລ້ວລາຍງານສະພາແຫ່ງຊາດ ພິຈາລະນາ ຍັງມີຄວາມຄືບໜ້າໜ້ອຍ ແລະ ບໍ່ທັນໄດ້ຮັບການລາຍງານ.
ສຳລັບ ອົງການກວດສອບແຫ່ງລັດ ຄະນະປະຈຳສະພາແຫ່ງຊາດ ສະເໜີໃຫ້ສືຕໍ່ປັບປຸງ ແລະ ເອົາໃຈໃສ່ຕື່ມ ການຈັດຕັ້ງປະຕິບັດກົດໝາຍວ່າດ້ວຍການກວດສອບແຫ່ງລັດ ໂດຍສະເພາະ ມາດຕາ 40 ການແກ້ໄຂຜົນການກວດສອບ, ມາດຕາ 71 ໜ້າທີ່ ແລະ ພັນທະຂອງເປົ້າໝາຍຖືກກວດສອບ ແລະ ມາດຕາອື່ນໆຈໍານວນໜຶ່ງ ຍັງບໍ່ທັນເຂັ້ມງວດ ແລະ ມີຜົນສັກສິດເທົ່າທີ່ຄວນ; ການຈັດຕັ້ງປະຕິບັດມະຕິຂອງສະພາແຫ່ງຊາດ ເປັນຕົ້ນ ການເກັບລາຍຮັບ ແລະ ສະສາງລາຍຈ່າຍ ທີ່ກວດສອບເຫັນເພີ່ມໃນປີ 2023 ເຫັນວ່າຍັງໄດ້ໜ້ອຍພຽງ 30.2%, ການປັບປຸງນິຕິກຳຈຳນວນໜຶ່ງ ໃນຂົງເຂດການເງິນງົບປະມານ ທີ່ບໍ່ສອດຄ່ອງ ກັບກົດໝາຍຍັງບໍ່ທັນໄດ້ເພີ່ມທະວີການປະສານສົມທົບ ເພື່ອພ້ອມກັນປັບປຸງແກ້ໄຂໃຫ້ດີຂຶ້ນເທົ່າທີ່ຄວນ; ການຜັນຂະຫຍາຍບາງມາດຕາຂອງກົດໝາຍ ເປັນນິຕິກຳໃຕ້ກົດໝາຍ ເປັນຕົ້ນ ມາດຕາ 76 ຜູ້ຮ່ວມງານການກວດສອບ ເພື່ອເປັນເຄື່ອງມືຊ່ວຍ ແລະ ບ່ອນອີງໃນການ ຈັດຕັ້ງປະຕິບັດວຽກງານ ບໍ່ທັນໄດ້ຕາມແຜນການ; ບັນຫາໃນຂົງເຂດໂຄງການເງິນກູ້ຢືມ ແລະ ຊ່ວຍ ເຫລືອລ້າ, ວິສາຫະກິດລັດລົງທຶນ, ທະນາຄານທຸລະກິດລັດ ການແກ້ໄຂ ແມ່ນມີຄວາມຄືບໜ້າໜ້ອຍ ເປັນຕົ້ນ ການບັນທຶກຊັບສົມບັດຄົງທີ່ ເຂົ້າໃນບັນຊີຕິດຕາມ, ກວດກາ, ໄລ່ລຽງ ເງິນພັນທະຄ່າຊັບພະ ຍາກອນ, ການສັງຮວມລາຍຮັບ-ໜີ້ຕ້ອງຮັບ ເຂົ້າໃນເອກະສານລາຍງານການເງິນ ແລະ ອື່ນໆ.
ສຳລັບ ທິດທາງແຜນການໃນຕໍ່ໜ້າ, ຄະນະປະຈຳສະພາແຫ່ງຊາດ ສະເໜີໃຫ້ ອົງການກວດກາ ແລະ ອົງການກວດສອບ ແຫ່ງລັດ ສືບຕໍ່ແກ້ໄຂຂໍ້ຄົງຄ້າງ ໃນປີຜ່ານມາໃຫ້ມີຄວາມຄືບໜ້າຫລາຍຂຶ້ນ; ໃຫ້ອົງການຄຸ້ມຄອງເປົ້າໝາຍຖືກກວດກາ, ກວດສອບ ສືບຕໍ່ເປັນເຈົ້າການປະສານສົມທົບ ແລະ ໃຫ້ ການຮ່ວມມືກັບ ອົງການກວດກາ, ກວດສອບແຫ່ງລັດ ໄຈ້ແຍກ ແລະ ສັງຮວມຜົນການກວດກາ, ກວດສອບ ມາຮອດປັດຈຸບັນ ມີເທົ່າໃດ, ໄດ້ຮັບການແກ້ໄຂແລ້ວເທົ່າໃດ ແລະ ຍັງຄ້າງເທົ່າໃດ, ພ້ອມທັງຈັດລຽງລໍາດັບ ຄວາມສໍາຄັນຂອງການແກ້ໄຂຜົນການກວດກາ ເປັນຕົ້ນ ລະດັບໃດ ແມ່ນຄວາມຮັບ ຜິດຊອບຂອງສະພາແຫ່ງຊາດ, ລະດັບໃດ ແມ່ນລັດຖະບານ, ກະຊວງ, ອົງການ, ສະພາປະຊາຊົນຂັ້ນແຂວງ ແລະ ອົງການປົກຄອງທ້ອງຖິ່ນ ແກ້ໄຂໄດ້ ແລະ ອັນໃດຄວນແກ້ທັນທີ, ແກ້ໃນໄລຍະສັ້ນ, ກາງ ແລະ ໄລຍະຍາວ ເພື່ອໃຫ້ສະພາ ແຫ່ງຊາດພິຈາລະນາ.
