ອິດສະລາແອນ-ແຮັດໂບລາ ບັນລຸຂໍ້ຕົກລົງຢຸດຍິງ ສໍາຄັນແນວໃດ ສົ່ງຜົນກະທົບຕໍ່ສົງຄາມຢູ່ກາຊາ ຫລື ບໍ່ ?
ອິດສະລາແອນ ແລະ ກຸ່ມແຮັດໂບລາບັນລຸຂໍ້ຕົກລົງຢຸດຍິງທີ່ໄດ້ຮັບການສະໜັບສະໜູນຈາກອາເມລິກາ ແລະ ຝຣັ່ງ ໂດຍມີຜົນແຕ່ເວລາ 04:00 ໂມງ ຂອງວັນທີ 27 ພະຈິກຜ່ານມາ.
ການຢຸດຍິງເລີ່ມຕົ້ນຂຶ້ນພາຍໃນບໍ່ເທົ່າໃດຊົ່ວໂມງຫລັງຈາກທ່ານ ໂຈ ໄບເດນ ປະທານາທິບໍດີອາເມລິກາ ປະກາດວ່າໄດ້ບັນລຸຂໍ້ຕົກລົງໃນການຢຸດຄວາມຂັດແຍ່ງ ແລະ ການສູ້ຮົບຂ້າມແດນທີ່ໃຊ້ເວລາເກືອບ 14 ເດືອນ ແລະ ກາຍເປັນສົງຄາມເຕັມຮູບແບບກັບກຸ່ມແຮັດໂບລານັບແຕ່ເດືອນກັນຍາຜ່ານມາ ເຊິ່ງຂ້າຊີວິດປະຊາຊົນໄປແລ້ວຫລາຍພັນຄົນທັງຢູ່ອິດສະລາແອນ ແລະ ລີບັງ.
ເຖິງຢ່າງໃດກໍຕາມ, ການບັງຄັບໃຊ້ຂໍ້ຕົກລົງຢຸດຍິງດັ່ງກ່າວຍັງເປັນການຕິດຕາມເບິ່ງວ່າຈະປະສົບຜົນສໍາເລັດ ຫລື ຊ່ວຍຫລຸດລະດັບຄວາມຂັດແຍ່ງຢູ່ຕາເວັນອອກກາງໄດ້ແທ້ ຫລື ບໍ່ ແລະ ຈະສົ່ງຜົນກະທົບໃນທາງໃດແດ່ຕໍ່ສົງຄາມຢູ່ເຂດກາຊາທີ່ຍັງຍືດເຍື້ອ.
ເກີດຫຍັງຂຶ້ນ ?
ໄລຍະກ່ອນບັງຄັບໃຊ້ຂໍ້ຕົກລົງຢຸດຍິງ ຝ່າຍອິດສະລາແອນຍັງເດີນໜ້າໂຈມຕີລີບັງຢ່າງໜັກ ໂດຍສົ່ງເຮືອບິນຖິ້ມລະເບີດໃນເຂດຊານເມືອງທາງໃຕ້ຂອງນະຄອນຫລວງເບຣຸດ ແລະ ຍັງມີການໂຈມຕີເກີດຂຶ້ນໃນໄລຍະທີ່ທ່ານ ໄບເດນ ຖະແຫລງເລື່ອງຂໍ້ຕົກລົງຢຸດຍິງ.
ຖະແຫລງການຮ່ວມຂອງທ່ານ ໄບເດນ ແລະ ທ່ານ ເອັມມານູເອລ ມາຄຣງ ປະທານາທິບໍດີຂອງຝຣັ່ງ ລະບຸວ່າ: ການຢຸດຍິງຈະສ້າງເງື່ອນໄຂເພື່ອຟື້ນຟູຄວາມສະຫງົບສຸກແບບຍືນຍົງ ແລະ ເປີດທາງໃຫ້ປະຊາຊົນໃນເຂດຊາຍແດນຂອງທັງສອງປະເທດສາມາດກັບບ້ານໄດ້ຢ່າງປອດໄພ.
ພາຍຫລັງຂໍ້ຕົກລົງຢຸດຍິງມີຜົນບັງຄັບໃຊ້ ປະຊາຊົນລີບັງທີ່ອົບພະຍົບໜີຕາຍອອກມາຈາກຫລາຍພື້ນທີ່ ທັງຢູ່ນະຄອນຫລວງເບຣຸດ ແລະ ເຂດຊາຍແດນທາງໃຕ້ທີ່ຖືກອິດສະລາແອນໂຈມຕີ ຕ່າງທະຍອຍເດີນທາງກັບບ້ານ ແລະ ອອກມາໂບກທຸງສະຫລອງດ້ວຍຄວາມດີໃຈ.
ໂດຍທ່ານ ນາຈິບ ມິຄາຕິ ນາຍົກລັດຖະມົນຕີຂອງລີບັງ ສະແດງຄວາມຍິນດີຕໍ່ຂໍ້ຕົກລົງຢຸດຍິງ ແລະ ຂອບໃຈອາເມລິກາ ແລະ ຝຣັ່ງສໍາລັບຄວາມພະຍາຍາມຊຸກຍູ້ຂໍ້ຕົກລົງ.
ສໍານັກງານນາຍົກລັດຖະມົນຕີອິດສະລາແອນເປີດເຜີຍວ່າ: ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີຂອງອິດສະລາແອນ ໄດ້ເຈລະຈາກັບທ່ານ ໄບເດນ ໂດຍກ່າວວ່າ: ລັດຖະບານອິດສະລາແອນໄດ້ອະນຸມັດຂໍ້ຕົກລົງຢຸດຍິງ ແລະ ທ່ານຮູ້ສຶກດີໃຈທີ່ປະທານາທິບໍດີອາເມລິກາເຂົ້າໃຈວ່າອິດສະລາແອນຈະຍັງຮັກສາເສລີພາບໃນການດໍາເນີນການບັງຄັບໃຊ້ຂໍ້ຕົກລົງນີ້.
ຂະນະທີ່ທ່ານ ໄອແຊກ ເຮີຊ໊ອກ ປະທານາທິບໍດີຂອງອິດສະລາແອນ ກ່າວວ່າ: ການຢຸດຍິງຢູ່ລີບັງຈໍາເປັນຕ້ອງຮັບປະກັນຄວາມປອດໄພຂອງປະຊາຊົນໃນເຂດທາງເໜືອຂອງອິດສະລາແອນເຊັ່ນກັນ.
ທັງນີ້, ຫລາຍແຫລ່ງຂ່າວຢູ່ລີບັງລາຍງານວ່າ: ກຸ່ມແຮັດໂບລາຕອບຕົກລົງຕາມເງື່ອນໄຂຂອງຂໍ້ຕົກລົງຢຸດຍິງດັ່ງກ່າວ, ແຕ່ບໍ່ມີລາຍງານກ່ຽວກັບການເຈລະຈາໃດໆ ລະຫວ່າງຝ່າຍກຸ່ມແຮັດໂບລາກັບອິດສະລາແອນ ຫລື ປະເທດຕາເວັນຕົກ.
ເງື່ອນໄຂຢຸດຍິງຄືຫຍັງ ?
ສໍາລັບເງື່ອນໄຂຕົ້ນຕໍຂອງຂໍ້ຕົກລົງຢຸດຍິງຄືອິດສະລາແອນຈະຄ່ອຍໆຖອນທະຫານອອກຈາກທາງໃຕ້ຂອງລີບັງໃນເວລາ 60 ວັນ ແລະ ກອງທັບລີບັງຈະເຂົ້າໄປເບິ່ງແຍງ, ສ່ວນກຸ່ມແຮັດໂບລາຈະຕ້ອງຖອນກໍາລັງອອກໄປທາງເໜືອຂອງແມ່ນໍ້າລິຕານີ ເຊິ່ງຢູ່ຫ່າງຈາກຊາຍແດນອິດສະລາແອນ-ລີບັງປະມານ 40 ກິໂລແມັດ.
ໂດຍລັດຖະບານລີບັງຈະກໍານົດມາດຕະການຄວບຄຸມການເຄື່ອນໄຫວຂອງກຸ່ມແຮັດໂບລາທີ່ເຂັ້ມງວດເພີ່ມຂຶ້ນ ເພື່ອບໍ່ໃຫ້ມີການລວມຕົວກັນໃນເຂດຊາຍແດນອີກ ເຊິ່ງກອງກໍາລັງຮັກສາສັນຕິພາບຂອງສະຫະປະຊາຊາດ, ກອງທັບລີບັງ ແລະ ຄະນະກໍາມະການນາໆຊາດ ຈະໄດ້ຮັບມອບໝາຍໃຫ້ເບິ່ງແຍງການເຄື່ອນໄຫວຂອງກຸ່ມແຮັດໂບລາ.
ເຖິງຢ່າງໃດກໍຕາມ, ອິດສະລາແອນໃຫ້ຄໍາໝັ້ນວ່າຈະກັບໄປປະຕິບັດການທາງທະຫານອີກໃນກໍລະນີເກີດການລະເມີດຂໍ້ຕົກລົງ.
ຂໍ້ຕົກລົງຢຸດຍິງຈະມີຜົນກະທົບຕໍ່ສົງຄາມກາຊາ ຫລື ບໍ່ ?
ທ່ານ ເອຊເອ ເຮລເຢີ ນັກວິໄຈອາວຸໂສດ້ານຄວາມໝັ້ນຄົງສຶກສາຈາກສະຖາບັນ Royal United Services Institute (RUSI) ໃນລອນດອນ ເບິ່ງວ່າ: ການຢຸດຍິງລະຫວ່າງອິດສະລາແອນກັບກຸ່ມແຮັດໂບລາບໍ່ອາດຈະມີຄວາມໝາຍໃດໆຕໍ່ສົງຄາມຢູ່ເຂດກາຊາ ແລະ ບໍ່ອາດຊ່ວຍບັນເທົາທຸກໃຫ້ຊາວປາແລັສຕິນຢູ່ກາຊາໄດ້.
ໂດຍການເຈລະຈາຢຸດຍິງຢູ່ກາຊາຢ່າງຈິງຈັງລະຫວ່າງອິດສະລາແອນ ແລະ ຮາມັດຢຸດຈຶ້ງມາຫລາຍອາທິດ ແລະ ຍັງບໍ່ມີທ່າທີ່ຈະເລີ່ມຕົ້ນໄດ້ໃນມໍ່ໆນີ້.
ຂະນະທີ່ຜົນກະທົບຂອງສົງຄາມຢູ່ກາຊາຂ້າຊີວິດຊາວປາແລັສຕິນໄປແລ້ວຫລາຍກວ່າ 44,000 ຄົນ ໂດຍການໂຈມຕີຂອງອິດສະລາແອນເຮັດໃຫ້ປະຊາກອນກາຊາເກືອບ 2 ລ້ານຄົນບໍ່ມີບ່ອນຢູ່ອາໄສ ແລະ ເມືອງຕ່າງໆເປ່ເພເສຍຫາຍ.
ທັງນີ້, ເຈົ້າໜ້າທີ່ລະດັບສູງຂອງອາເມລິກາຄົນໜຶ່ງໃຫ້ສໍາພາດຕໍ່ CNN ໃນອາທິດຜ່ານມາວ່າ: ຂໍ້ຕົກລົງລະຫວ່າງອິດສະລາແອນກັບກຸ່ມແຮັດໂບລາຈະເປັນການສົ່ງສັນຍານໄປຫາຮາມັດວ່າ: ອິດສະລາແອນ ແລະ ປະເທດພັນທະມິດຈະໃຊ້ຄວາມພະຍາຍາມຢ່າງເຕັມສ່ວນ ເພື່ອບັນລຸຂໍ້ຕົກລົງທີ່ຈະປົດປ່ອຍຕົວປະກັນຢູ່ກາຊາ, ແຕ່ເບິ່ງວ່າອິດສະລາແອນຈໍາເປັນຕ້ອງປ່ຽນຜົນສໍາເລັດທາງທະຫານໃຫ້ກາຍເປັນຜົນສໍາເລັດທາງຍຸດທະສາດກ່ອນ.
ເຖິງຢ່າງໃດກໍຕາມ, ໃນອາທິດຜ່ານມາ ອາເມລິກາໃຊ້ສິດຢັບຢັ້ງມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດອີກສະບັບໜຶ່ງທີ່ຮຽກຮ້ອງໃຫ້ມີການຢຸດຍິງຢູ່ກາຊາໂດຍທັນທີແບບບໍ່ມີເງື່ອນໄຂ ແລະ ຖາວອນ ໂດຍອາເມລິກາໃຫ້ເຫດຜົນວ່າມະຕິດັ່ງກ່າວບໍ່ພຽງພໍຈະເຮັດໃຫ້ເກີດການເຊື່ອມໂຍງລະຫວ່າງການຢຸດຍິງກັບການປົດປ່ອຍຕົວປະກັນຢູ່ກາຊາ.
ອ້າງອີງ:
