10 ເດືອນ ປີ 2024 ກວດພົບການສໍ້ລາດບັງຫລວງ 208 ຄົນ ຜົນເສຍຫາຍ 115 ຕື້ກີບ 25 ລ້ານກວ່າໂດລາ ແລະ ສະກຸນເງິນອື່ນອີກຫລາຍລ້ານ
ທ່ານ ຄໍາພັນ ພົມມະທັດ ປະທານອົງການກວດກາແຫ່ງລັດ ລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດຊຸດທີ IX ວັນທີ 27 ພະຈິກ 2024 ນີ້ວ່າ: ໄລຍະ 10 ເດືອນ ປີ 2024 ອົງການກວດກາແຫ່ງລັດ ໄດ້ດໍາເນີນການກວດກາບັນດາໜ້າວຽກ ຕາມພາລະບົດບາດ ແລະ ມະຕິກອງປະຊຸມສະພາແຫ່ງຊາດ ສະບັບເລກທີ 113/ສພຊ, ລົງວັນທີ 21 ພະຈິກ 2023 ແລະ ສະພາບການແກ້ໄຂຜົນຂອງການກວດກາຕົວຈິງ ສາມາດສະກັດກັ້ນ ແລະ ຕ້ານການສໍ້ລາດບັງຫລວງທີ່ສາມາດ ດໍາເນີນການສືບສວນ-ສອບສວນຄະດີສໍ້ລາດບັງຫຼວງສໍາເລັດ 4 ເລື່ອງ ມີຄວາມເສຍຫາຍ ທັງໝົດເປັນເງິນກີບ 115.08 ຕື້ກີບ, ເປັນ ເງິນບາດ 3.2 ລ້ານບາດ, ເປັນເງິນໂດລາ 25.61 ລ້ານໂດລາສະຫະລັດ, ເປັນເງິນຢວນ 7.8ລ້ານຢວນ; ພົວພັນກັບເປົ້າໝາຍ 208 ຄົນ, ດໍາເນີນຄະດີ 40 ຄົນ ມີຕ່າງປະເທດ 2 ຄົນ, ກັກຕົວ 39 ຄົນ, ແກ້ໄຂທາງລະບຽບບໍລິຫານ 158 ຄົນ;
ໃນນີ້ ເກັບກູ້ຄືນໄດ້ແລ້ວເປັນເງິນ ກີບ 63.62 ຕື້ກີບ, ເປັນເງິນບາດ 200,.000 ບາດ, ເປັນເງິນໂດລາ 4,700 ໂດລາສະຫະລັດ, ເປັນເງິນຢວນ 5.19 ລ້ານຢວນ; ຍັງເກັບກູ້ ບໍ່ໄດ້ ເງິນກີບ 51.46 ຕື້ກີບ, ເງິນບາດ 3 ລ້ານບາດ, ເງິນໂດລາ 25.60 ລ້ານໂດລາສະຫະລັດ ແລະ ເງິນຢວນ 2.63 ລ້ານຢວນ.
ກໍາລັງດໍາເນີນການສືບສວນ-ສອບສວນ ມີ 2 ເລື່ອງ, ມີຄວາມເສຍຫາຍ ເປັນເງິນກີບ 300 ລ້ານກວ່າກີບ, ເປັນເງິນໂດລາ 10 ລ້ານກວ່າ ໂດລາສະຫະລັດ, ມີເປົ້າໝາຍພົວພັນ 04 ຄົນ, ດໍາເນີນຄະດີ 4 ຄົນ, ກັກຕົວ 3 ຄົນ, ຍັງບໍ່ໄດ້ກັກຕົວ 1 ຄົນ; ໃນນີ້ເກັບກູ້ໄດ້ 10 ລ້ານກວ່າໂດລາສະຫະລັດ ກັບ 100 ລ້ານກວ່າກີບ.
