ຮອງປະທານສະພາແຫ່ງຊາດ ເຂົ້າຮ່ວມ ແລະ ປາໄສໃນກອງປະຊຸມ ລັດຖະສະພາສາກົນ ຄັ້ງທີ 11 ທີ່ກຳປູເຈຍ
ວັນທີ 23-26 ພະຈິກ 2024, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມລັດຖະສະພາສາກົນ ເພື່ອສັນຕິພາບ ແລະ ຄວາມອົດກັ້ນ ຄັ້ງທີ 11 ທີ່ຣາຊະອານາຈັກກຳປູເຈຍ ໃນຫົວຂໍ້ “ການສະແຫວງຫາສັນຕິພາບ, ການປອງດອງກັນ ແລະ ຄວາມອົດກັ້ນ” ມີຄະນະຜູ້ແທນຈາກ 53 ປະເທດທີ່ເປັນສະມາຊິກອົງການ, ບັນດາປະເທດສັງເກດການ ແລະ ແຂກຮັບເຊີນ ເຂົ້າຮ່ວມທັງໝົດ 300 ທ່ານ, ໃນນີ້ ມີລະດັບປະທານສະພາແຫ່ງຊາດ 6 ປະເທດ ແລະ ຮອງປະທານສະພາແຫ່ງຊາດ 6 ປະເທດ.
ທ່ານຮອງປະທານສະພາແຫ່ງຊາດລາວ ຂຶ້້ນກ່າວປາໄສໃນຫົວຂໍ້ “ການເສີມສ້າງລະບົບພະຫຸພາຄີ, ການຮ່ວມມື, ການເປັນຄູ່ຮ່ວມເພື່ອການຢູ່ຮ່ວມກັນ ແລະ ການເຊື່ອມຈອດແບບກວມລວມ” ເຊິ່ງທ່ານໄດ້ຕີລາຄາສູງຕໍ່ບົດບາດ ແລະ ຄວາມພະຍາຍາມຂອງບັນດາທ່ານສະມາຊິກລັດຖະສະພາໃນໄລຍະຜ່ານມາ ທີ່ໄດ້ປຶກສາຫາລື, ແລກປ່ຽນທັດສະນະ ແລະ ການປະສານສົມທົບກັນ ຊອກຫາວີທີທາງໃນການສົ່ງ ເສີມການປົກປັກຮັກສາສັນຕິພາບ, ສ້າງຄວາມໄວ້ເນື້ອເຊື່ອໃຈເຊິ່ງກັນແລະກັນ, ພ້ອມກັນແກ້ໄຂບັນຫາຕ່າງໆທີ່ເກີດຂຶ້ນໂດຍສັນຕິວິທີ ຜ່ານກອງປະຊຸມລັດຖະສະພາພາກພື້ນ ແລະ ສາກົນຕ່າງໆເຊັ່ນ: ສະຫະພັນລັດຖະສະພາສາກົນ (IPU), ເວທີປຶກສາຫາລືລັດຖະສະພາອາຊີ-ປາຊີຟິກ (APPF), ສະມັດຊາລັດຖະສະພາທີ່ໃຊ້ພາສາຝຣັ່ງ (APF), ສະມັດຊາລັດຖະສະພາລະຫວ່າງຊາດອາຊຽນ (AIPA) ແລະ ເວທີອື່ນໆ. ພ້ອມທັງໄດ້ເນັ້ນກ່ຽວກັບການດຳເນີນນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືເພື່ອການພັດທະນາ ຢ່າງສະເໝີຕົ້ນສະເໝີປາຍຂອງ ສປປລາວ; ສົ່ງເສີມຄວາມສາມັກຄີເປັນປຶກແຜ່ນລະຫວ່າງບັນດາເຜົ່າ ໃຫ້ມີຄວາມສະເໝີພາບຕໍ່ໜ້າກົດໝາຍ; ຢຶດໝັ້ນຕາມເຈດຕະນາລົມ ແລະ ຄວາມໝາຍໝັ້ນທາງດ້ານການເມືອງທີ່ຈະຮ່ວມມືກັບວົງຄະນາຍາດສາກົນ ໂດຍໄດ້ປະກອບສ່ວນເຂົ້າໃນການສ້າງສະພາບແວດລ້ອມທີ່ອຳນວຍໃຫ້ແກ່ສັນຕິພາບ, ການຮ່ວມມື, ການເຊື່ອມໂຍງ-ເຊື່ອມຈອດພາຍໃນພາກພື້ນ; ໄດ້ຮ່ວມມືກັບບັນດາປະເທດເພື່ອນບ້ານໃກ້ຄຽງໃນການພັດທະນາເສດຖະກິດ-ສັງຄົມ ລວມທັງພັດທະນາພື້ນຖານໂຄງລ່າງເພື່ອເຊື່ອມຈອດດ້ານຄົມມະນາຄົມ ເປັນຕົ້ນແມ່ນເສັ້ນທາງລົດໄຟຄວາມໄວສູງ, ທາງດ່ວນ, ທາງຫຼວງ ແລະ ລະບົບສາຍສົ່ງໄຟຟ້າ ເພື່ອປະກອບສ່ວນອັນສຳຄັນເຮັດໃຫ້ ສປປ ລາວ ກາຍເປັນປະເທດເຊື່ອມຈອດ ແລະ ເຊື່ອມໂຍງກັບປະເທດຕ່າງໆໃນພາກພື້ນອາຊຽນ ແລະ ລະຫວ່າງອາຊຽນ ກັບປະເທດອື່ນໆໃນໂລກ.
ທ່ານ ຄໍາໃບ ດໍາລັດ ໄດ້ຍົກໃຫ້ເຫັນການປະຕິບັດໜ້າທີ່ ແລະ ບົດບາດຂອງສະພາແຫ່ງຊາດລາວ ໃນການເພີ່ມທະວີການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ເຊິ່ງມີການຮັບຮອງເອົາກົດໝາຍຫຼາຍສະບັບທີ່ສອດຄ່ອງກັບຫຼັກການສາກົນ, ສະພາບຄວາມເປັນຈິງຂອງປະເທດ, ມີການຕິດຕາມກວດກາການຈັດຕັ້ງປະຕິບັດກົດໝາຍ ກໍຄືການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ພ້ອມທັງໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນ ເຊິ່ງເປັນການປະກອບສ່ວນຢ່າງຕັ້ງໜ້າເຂົ້າໃນການເສີມສ້າງສັນຕິພາບ, ຄວາມໝັ້ນຄົງ, ສະຖຽນລະພາບ, ການພັດທະນາແບບຍືນຍົງ ແລະ ຄວາມຢູ່ດີກິນດີຂອງປະຊາຊົນ.
ທ່ານຮອງປະທານສະພາແຫ່ງຊາດລາວ ໄດ້ຮ່ວມກັບຫົວໜ້າຄະນະຜູ້ແທນປະເທດຕ່າງໆ ເຂົ້າຢ້ຽມຂໍ່ານັບ ສົມເດັດອັກຄະມະຫາ ເສນາບໍດີ ເຕໂຈ ຮຸນເຊັນ ປະທານສະພາສູງ, ສົມເດັດມະຫາ ຣັດສະເພຍ ທິກາທິພາໄດ ຄູນ ສຸດາຣີ ປະທານສະພາແຫ່ງຊາດ ແລະ ສົມເດັດ ມະຫາ ໂບຣທິພາໄດ ຮຸນ ມາເນດ ນາຍົກລັດຖະມົນຕີ ແຫ່ງ ລາຊະອານາຈັກກຳປູເຈຍ ເຊິ່ງການນຳຂັ້ນສູງຂອງປະເທດເຈົ້າພາບ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ຄະນະຜູ້ແທນປະເທດຕ່າງໆທີ່ໄດ້ເຂົ້າຮ່ວມກອງປະ ຊຸມລັດຖະສະພາສາກົນ ເພື່ອສັນຕິພາບ ແລະ ຄວາມອົດກັ້ນ ຄັ້ງທີ 11 ນີ້.
ນອກຈາກນັ້ນ, ຄະນະຜູ້ແທນລາວ ຍັງໄດ້ພົບປະເຮັດວຽກກັບປະທານສະມາຄົມມິດຕະພາບ ກຳປູເຈຍ-ລາວ ເພື່ອປຶກສາຫາລືກ່ຽວກັບການຊຸກຍູ້ສົ່ງເສີມການພົວພັນຮ່ວມມືລະຫວ່າງສອງສະມາຄົມໃນຕໍ່ໜ້າ; ພ້ອມທັງໄປຢ້ຽມຊົມພິພິທະພັນ ສານພິເສດໃນຄະດີຂະເໝນແດງ ແລະ ອະນຸສາວະລີ ວິນ ວິນ ທີ່ນະຄອນຫຼວງພະນົມເປັນ.
ທີ່ມາ: ຜູ້ແທນປະຊາຊົນ
