ປາກິດສະຖານປະກາດສະຫງົບເສິກ 7 ວັນ ຫລັງການປະທະລະຫວ່າງນິກາຍ ມີຜູ້ເສຍຊີວິດແລ້ວ 82 ຄົນ
ເຈົ້າໜ້າທີ່ລັດຂອງປາກິດສະຖານ ປະກາດສະຫງົບເສິກ 1 ອາທິດ ຫລັງເກີດການຍິງຕໍ່ສູ້ຢ່າງຮຸນແຮງລະຫວ່າງກຸ່ມນິກາຍເປັນເວລາຫລາຍວັນໃນເຂດຄູຣໍາ ທາງຕາເວັນຕົກສຽງເໜືອຂອງປະເທດ ເຊິ່ງມີຜູ້ເສຍຊີວິດຢ່າງໜ້ອຍ 82 ຄົນ ແລະ ຜູ້ບາດເຈັບອີກປະມານ 156 ຄົນ.
ປາກິດສະຖານເປັນປະເທດທີ່ມີຊາວມຸດສະລິມນິກາຍຊຸນນີເປັນສ່ວນຫລາຍ, ແຕ່ຢູ່ເຂດຄູຣໍາຂອງແຄວ້ນໄຄເບີປັກຕຸນຄວາ ໃກ້ຊາຍແດນທີ່ຕິດກັບອັບການິດສະຖານ ມີປະຊາກອນຊາວມຸດສະລິມນິກາຍຊີອະຈໍານວນຫລາຍ ເຊິ່ງທັງສອງຊຸມຊົນປະທະກັນມາຫລາຍສິບປີແລ້ວ.
“ທັງສອງຝ່າຍຕົກລົງຈະຢຸດຍິງເປັນເວລາ 7 ວັນ ເຊິ່ງໃນລະຫວ່າງນີ້ ພວກເຂົາຈະແລກປ່ຽນນັກໂທດ ແລະ ສົ່ງສົບຜູ້ເສຍຊີວິດໃຫ້ອີກຝ່າຍ” ທ່ານ ມູຮໍາໝັດ ອາລີ ຊາອິບ ໂຄສົກຂອງລັດຖະບານແຄວ້ນໄຄເບີປັກຕຸນຄວາ ກ່າວ.
ຄວາມຮຸນແຮງຄັ້ງຫລ້າສຸດນີ້ ເລີ່ມຂຶ້ນໃນວັນທີ 21 ພະຈິກຜ່ານມາ ເມື່ອຂະບວນລົດຂອງກຸ່ມຊາວມຸດສະລິມນິກາຍຊີອະ 2 ຂະບວນ ເຊິ່ງເດີນທາງພາຍໃຕ້ການຄຸ້ມກັນຂອງຕໍາຫລວດ ຖືກໂຈມຕີ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 43 ຄົນ ແລະ ຈຸດສະນວນການຍິງຕໍ່ສູ້ທີ່ຍາວນານເຖິງ 2 ວັນ.
“ການປະທະ ແລະ ການໂຈມຕີຂະບວນລົດ ໃນວັນທີ 21-23 ພະຈິກຜ່ານມາ ເຮັດໃຫ້ມີຜູ້ເສຍຊີວິດ 82 ຄົນ ແລະ ຜູ້ໄດ້ຮັບບາດເຈັບ 156 ຄົນ ເຊິ່ງຈໍານວນຜູ້ເສຍຊີວິດແບ່ງເປັນຊາວມຸດສະລິມນິກາຍຊຸນນີ 16 ຄົນ ແລະ ຊາວມຸດສະລິມນິກາຍຊີອະ 66 ຄົນ” ເຈົ້າໜ້າທີ່ອົງການປົກຄອງທ່ານໜຶ່ງກ່າວ.
ທັງນີ້, ເຈົ້າໜ້າທີ່ຕໍາຫລວດພະຍາຍາມຄວບຄຸມຄວາມຮຸນແຮງໃນເຂດຄູຣໍາ ແລະ ຂໍ້ຕົກລົງຢຸດຍິງເກີດຂຶ້ນ ຫລັງຄະນະຜູ້ແທນຈາກລັດຖະບານປະຈໍາແຄວ້ນ ຫາລືກັບຊຸມຊົນຊີອະ ແລະ ຊຸມຊົນຊຸນນີ ໃນວັນທີ 23 ແລະ 24 ພະຈິກຜ່ານມາ ເຊິ່ງມີລາຍງານວ່າ: ເຮລິກອບເຕີຂອງຜູ້ເຈລະຈາຖືກຍິງເວລາມາເຖິງພາກພື້ນນີ້, ແຕ່ໂຊກດີບໍ່ມີໃຜໄດ້ຮັບບາດເຈັບ.
