ໝອກຄວັນພິດອິນເດຍຍັງວິກິດ ຄຸນນະພາບອາກາດກະທົບສຸຂະພາບປະຊາຊົນ
ສະຖານະການໝອກຄວັນພິດຢູ່ນະຄອນຫລວງນິວເດລີ ແລະ ຫລາຍພື້ນທີ່ທາງພາກເໜືອຂອງອິນເດຍຍັງວິກິດ ດັດຊະນີຄຸນນະພາບອາກາດ (AQI) ຢູ່ໃນລະດັບສົ່ງຜົນກະທົບຕໍ່ສຸຂະພາບຂອງປະຊາຊົນ. ຊາວອິນເດຍບາງຄົນກ່າວວ່າ: ສະພາບອາກາດຂອງອິນເດຍປັດຈຸບັນເຮັດໃຫ້ແສບຕາຄືກັບໝາກເຜັດເຂົ້າຕາ, ຫາຍໃຈບໍ່ສະດວກ ແລະ ສົ່ງຜົນຕໍ່ການແນມເຫັນ.
ທາງການທ້ອງຖິ່ນຈຶ່ງແນະນໍາປະຊາຊົນໃຫ້ຢູ່ໃນທີ່ພັກອາໄສ ແລະ ຫລີກລ່ຽງການເດີນທາງທີ່ບໍ່ຈໍາເປັນ ລວມທັງຊຸກຍູ້ເລື່ອງສີດນໍ້າ ແລະ ຝົນທຽມ ເພື່ອໃຊ້ແກ້ໄຂບັນຫາໝອກຄວັນພິດໃນປັດຈຸບັນ.
ວິກິດອາກາດຢູ່ອິນເດຍກ່ຽວຂ້ອງກັບການເຜົາໄໝ້ຖ່ານຫີນຈໍານວນຫລາຍໃນຂະແໜງການຜະລິດກະແສໄຟຟ້າພາຍໃນປະເທດ ບວກກັບການປ່ອຍແກັສເຮືອນແກ້ວຈາກຍານພາຫະນະຕ່າງໆຈໍານວນຫລາຍລ້ານຄັນ ລວມທັງຝຸ່ນຄວັນຈາກການເຜົາໄໝ້ຈາກຂະແໜງກະສິກໍາ ແລະ ຂະແໜງອຸດສາຫະກໍາ ເຊິ່ງບໍ່ມີການຄວບຄຸມມົນລະພິດຢ່າງເຂັ້ມງວດ ເຮັດໃຫ້ບັນຫາໝອກຄວັນພິດເປັນໜຶ່ງໃນບັນຫາຊໍາເຮື້ອຂອງອິນເດຍ.
ອ້າງອີງ:
- https://timesofindia.indiatimes.com/city/delhi/delhi-pollution-air-quality-remains-very-poor-smog-continues-to-blanket-city/articleshow/115615619.cms
- https://www.aljazeera.com/news/2024/11/20/delhi-air-pollution-why-has-india-failed-to-clean-up-its-toxic-smog
- https://edition.cnn.com/2024/11/20/india/delhi-pollution-clinic-smog-climate-intl-hnk/index.html
