ຕຳຫລວດໄທອອກໝາຍຈັບ “ໝໍບຸນ” ພ້ອມພັກພວກ ຖານຮ່ວມກັນສໍ້ໂກງ ໂດຍອ້າງວ່າເຮັດໂຄງການໂຮງໝໍຢູ່ຫວຽດນາມ ແລະ ລາວ

ສຳນັກຂ່າວສົດຂອງໄທ ລາຍງານ ວ່າ: ວັນທີ 22 ພະຈິກ 2024 ຜ່ານມາ ຄະນະພະນັກງານສືບສວນສອບສວນ ກອງບັນຊາການຕໍາຫລວດ ນະຄອນບານ 1 ຂອງໄທ ລວມພະຍານຫລັກຖານ ເພື່ອຂໍອໍານາດສານອາຍາອອກໝາຍຈັບ ນາຍໝໍບຸນ ວະນາສິນ ຜູ້ຖືກຫາກັບພັກພວກ 9 ຄົນ ໃນຂໍ້ຫາຮ່ວມກັນສໍ້ໂກງປະຊາຊົນ ເນື່ອງຈາກມີຜູ້ເສຍຫາຍໄດ້ເຂົ້າແຈ້ງຄວາມຮ້ອງທຸກຕໍ່ພະນັກງານສອບສວນ ສນ.ຫ້ວຍຂວາງ ໃນຄວາມຜິດຕາມ ພລບ ວ່າດ້ວຍຄວາມຜິດອັນເກີດຈາກການໃຊ້ໃບເຊັກ ພສ 2534 ຈໍານວນ 247 ຄົນ ມູນຄ່າຄວາມເສຍຫາຍປະມານ 7,500 ລ້ານບາດ

ກ່ອນໜ້ານີ້ ໝໍບຸນ ໄດ້ສ້າງຄວາມໜ້າເຊື່ອຖືໃຫ້ກັບຕົນເອງ ໂດຍອ້າງວ່າ ຈະມີການລົງທຶນດັ່ງກ່າວ ຜ່ານສື່ສາທາລະນະ, ເວັບໄຊ, ສື່ອອນລາຍ ແລະ ສໍານັກພິມຫລາຍແຫ່ງ ມີການເຮັດສັນຍາກູ້ຢືມເງິນ ໂດຍໃຫ້ຜົນຕອບແທນສູງກວ່າສະຖາບັນການເງິນ ແລະ ຈ່າຍໃບເຊັກເພື່ອຊໍາລະໜີ້ເງິນກູ້ຢືມ ແລະ ດອກເບ້ຍ 8%ຕໍ່ປີ ໃນຊື່ ບຸນ ວະນາສິນ ພ້ອມທັງມີບຸກຄົນໃນຄອບຄົວເປັນຜູ້ຄໍ້າປະກັນຕາມສັນຍາ ແລະ ເຊັນສະຫລັກຫລັງໃບເຊັກທຸກສະບັບ ມອບໃຫ້ແກ່ຜູ້ເສຍຫາຍ ຕໍ່ມາເມື່ອຄົບກໍານົດຊໍາລະເງິນຕາມໃບເຊັກ ປາກົດວ່າທະນາຄານປະຕິເສດການຈ່າຍເງິນ.

ພຶດຕິກໍາຄື ຜູ້ເສຍຫາຍໄດ້ຮັບການຕິດຕໍ່ ຊັກຊວນ ຈາກຕົວແທນ ບໍລິສັດຫລັກຊັບ (ໂບກເກີ້) ວ່າຕົນເປັນຕົວແທນການລະດົມເງິນລົງທຶນໃຫ້ ແພດບຸນ ວະນາສິນ ຫລື ໝໍບຸນ ແລະ ຄອບຄົວ ໂດຍແຈ້ງວ່ານໍາໄປລົງທຶນທຸລະກິດ ທີີ່ກ່ຽວຂ້ອງກັບການແພດ ເຊັ່ນ: ໂຄງການສ້າງສູນມະເຮັງ, ໂຄງການເວເນັດເຊັນເຕີ, ສ້າງໂຮງໝໍໃນ ສປປ ລາວ, ເຂົ້າຮ່ວມລົງທຶນໂຮງໝໍໃນຫວຽດນາມ ເປັນຕົ້ນ.

ຈາກການກວດສອບພົບວ່າ ໂຄງການຕ່າງໆ ທີ່ຜູ້ຖືກຫານໍາສະເໜີຜ່ານສື່ເອເລັກໂຕນິກດັ່ງກ່າວ ບໍ່ມີມູນຄວາມຈິງ ຊຶ່ງພຶດຕິກໍາດັ່ງກ່າວເຂົ້າຂ່າຍເປັນຄວາມຜິດ “ຮ່ວມກັນສໍ້ໂກງປະຊາຊົນ, ຮ່ວມກັນໃຫ້ກູ້ຢືມເງິນ ທີ່ເປັນການສໍ້ໂກງ ແລະ ຮ່ວມກັນຟອກເງິນ”

ຫລ້າສຸດ ເຈົ້າໜ້າທີ່ຕໍາຫລວດ ສາມາດຈັບກຸມກຸ່ມຜຸ້ຖືກຫາ ຕາມໝາຍຈັບໄດ້ 6 ຄົນ, ໃນຂະນະທີ່ຢູ່ລະຫວ່າງສືບສວນສອບສວນ ຂະຫຍາຍພົນເພື່ອຈັບກຸມຜູ້ຮ່ວມຂະບວນການນີ້ເພີ່ມເຕີມ ແລະ ເລັ່ງຕິດຕາມ ສືບຄົ້ນຢຶດ ອາຍັດ ຊັບສິນຕ່າງໆ ຂອງຜູ້ຖືກຫາ ເພື່ອນໍາມາຄືນສູ່ຜູ້ເສຍຫາຍໃຫ້ໄດ້ຫລາຍທີ່ສຸດ. ສ່ວນຕົວໝໍບຸນ ແມ່ນໄດ້ເອົາຕົວຫລົບໜີໄປຍັງປະເທດຈີນ ເຊິ່ງທາງການໄທ ເລັ່ງປະສານທາງການຈີນໃຫ້ຊ່ວຍຈັບ ແລະ ມອບຕົວເພື່ອມາດຳເນີນຄະດີ.

ທີ່ມາ: ຂ່າວສົດ