ເສັ້ນທາງ 13 ໃຕ້ ໃນຄວາມເປັນຫ່ວງ ແລະ ຄວາມຫວັງຂອງສັງຄົມ
ໂດຍ: ທິດກໍ່າ
ອາທິດຜ່ານມາ, ທິດກໍ່າໄດ້ມີໂອກາດໄປສໍາຜັດກັບເສັ້ນທາງ 13 ໃຕ້ ນັບແຕ່ຍ່ານຫລັກ21 ນະຄອນຫລວງວຽງຈັນ ໄປຮອດເມືອງທ່າແຂກ ແຂວງຄໍາມ່ວນ ໄດ້ເຫັນສະພາບການປັບປຸງກໍ່ສ້າງເສັ້ນທາງໃໝ່ ນັບແຕ່ຍ່ານຫລັກ 71 ເມືອງທ່າພະບາດ ແຂວງບໍລິຄໍາໄຊ ໄປຫາທ່າແຂກ ແມ່ນໄດ້ສໍາເລັດໄປເກືອບ 100% ແລ້ວ. ສ່ວນທີ່ຍັງເຫລືອກໍບໍ່ພໍເທົ່າໃດກິໂລແມັດ ຍ່ານໃດທີ່ໄດ້ຮັບການກໍ່ສ້າງສໍາເລັດກໍມີການແຕ້ມເສັ້ນຈະລາຈອນຢ່າງມາດຕະຖານສວຍງາມ, ຍ່ານໃດເສັ້ນທາງຜ່ານໝູ່ບ້ານກໍມີການຕິດຕັ້ງເສົາໄຟຟ້າໂຊລາເຊວເຍືອງທາງເດຍລະດາດ ຄາດວ່າຍັງອີກບໍ່ພໍເທົ່າໃດເດືອນ ເສັ້ນທາງດັ່ງກ່າວກໍຈະສໍາເລັດເສັດສິ້ນຢ່າງສົມບູນແບບ.
ສ່ວນໄລຍະນັບແຕ່ຍ່ານຫລັກ 21 ເມືອງໄຊທານີ ນະຄອນຫລວງວຽງຈັນ ໄປຫາກິໂລແມັດທີ 71 ແມ່ນຍັງບໍ່ທັນເຫັນວີ່ແວວໃນການລົງໄມ້ລົງມືປັບປຸງກໍ່ສ້າງ ເພື່ອເຮັດໃຫ້ການສັນຈອນໄປມາສະດວກສະບາຍ ເພາະໃນສະພາບປັດຈຸບັນ ເສັ້ນທາງຍ່ານນີ້ເກົ່າແກ່ເປ່ເພເປັນບວກຂຸມລຸລັງສະສັບຊັບຊ້ອນ ລົດແລ່ນຜ່ານໄປມາຊັກຊ້າປານໃສ່ນໍ້າມັນກາເຕົ່າ ຊິ້ນເປືອງເວລາລໍາບາກທັງຄົນທັງລົດ.
ຢ່າງໃດກໍດີ, ເມື່ອມາເບິ່ງສາຍທາງຍ່ານທີ່ໄດ້ກໍ່ສ້າງສ້ອມແປງສໍາເລັດໄປແລ້ວ ຖືວ່າມັນກໍໄດ້ມາດຕະຖານສວຍງາມສົມກັບວ່າເປັນເສັ້ນທາງໃໝ່ອ່ຽມ, ແຕ່ສິ່ງທີ່ໜ້າເປັນຫ່ວງນັ້ນກໍຄືການປົກປັກຮັກສາ ແລະ ນໍາໃຊ້ໃຫ້ມັນຍາວນານ ແລະ ມີຜົນປະໂຫຍດສູງສຸດ ເພາະວ່າເຫັນບາງຈຸດບາງບ່ອນມັນເລີ່ມເປັນຂຸມເປັນໂນນເປັນຄື້ນ ອີກບໍ່ພໍເທົ່າໃດປີກໍຈະມີການຕາບຈູນຄືນໃໝ່ ຍ້ອນວ່າລົດທີ່ມີນໍ້າໜັກເກືອບ 100 ໂຕນແລ່ນຜ່ານໄປມາປານເສັ້ນເຂົ້າປຸ້ນ ອັນເປັນເຫດໃຫ້ເສັ້ນທາງດັ່ງກ່າວເປ່ເພເສຍຫາຍໄດ້ງ່າຍ.
ຈາກຄໍາບອກເລົ່າຂອງພະນັກງານບໍານານທ່ານໜຶ່ງຢູ່ທີ່ບ້ານຄໍາແກ້ວ ເມືອງຫີນບູນ ແຂວງຄໍາມ່ວນ ໄດ້ກ່າວວ່າ: ເຫັນທາງດີທາງງາມ ຄົນທັງຫລາຍກໍດີໃຈ, ການໄປມາສະດວກສະບາຍໄປງ່າຍມາງ່າຍຮອດໄວແຕ່ກໍເປັນຫ່ວງນໍາການປົກປັກຮັກສາ ເມື່ອສ້າງໄປແລ້ວພັດເປ່ເພໄວ້ຍ້ອນລົດຂົນສົ່ງນໍ້າໜັກເກີນແລ່ນຜ່ານ. ມາຮອດປັດຈຸບັນ ເຫັນບາງຈຸດບາງບ່ອນເລີ່ມມີຄື້ນເປັນລຸບເປັນໂນນ.
ຕໍ່ສະພາບດັ່ງກ່າວ ຫາກຕັ້ງໂຈດກັນວ່າ ດ້ວຍສາເຫດໃດລົດເກີນນໍ້າໜັກຈຶ່ງສາມາດແລ່ນຜ່ານໄປມາໄດ້ ທັງໆທີ່ມີດ່ານກວດກາຊັ່ງນໍ້າໜັກຕາມສາຍທາງໃນແຕ່ລະຈຸດແຕ່ລະບ່ອນ. ພະນັກງານບໍານານທ່ານນັ້ນໄດ້ເລົ່າຕອບຢ່າງມີອາລົມຂັນວ່າ: ເວົາເລື່ອງດ່ານກວດກາຊັ່ງນໍ້າໜັກມັນກໍມີແທ້, ແຕ່ເມື່ອເວລາລົດແລ່ນເຂົ້າໄປຕິດຊັ່ງຈາກສະພາບລົດໜັກພັດກັບກາຍມາເປັນລົດເບົາ. ນີ້ລະຄືໜຶ່ງໃນຕົ້ນເຫດທີ່ເຮັດໃຫ້ທາງເພ.
