ໄຟໄໝ້ໂຮງໝໍຢູ່ອິນເດຍ ມີເດັກນ້ອຍເກີດໃໝ່ເສຍຊີວິດຢ່າງໜ້ອຍ 10 ຄົນ

      ເດັກນ້ອຍເກີດໃໝ່ເສຍຊີວິດຢ່າງໜ້ອຍ 10 ຄົນ ຈາກເຫດໄຟໄໝ້ຢູ່ໂຮງໝໍແຫ່ງໜຶ່ງ ທາງພາກເໜືອຂອງອິນເດຍ.

      ເກີດເຫດໄຟໄໝ້ຢູ່ພະແນກເບິ່ງແຍງເດັກເກີດໃໝ່ ຂອງໂຮງໝໍມະຫາຣານີ ລັກສະມີໄບ ໃນເມືອງຈັນສີ ຫ່າງຈາກນະຄອນຫລວງນິວເດລີໄປທາງໃຕ້ປະມານ 450 ກິໂລແມັດ ໃນຄືນວັນທີ 15 ພະຈິກຜ່ານມາ.

      ເຫດການດັ່ງກ່າວເຮັດໃຫ້ມີເດັກນ້ອຍເກີດໃໝ່ເສຍຊີວິດຢ່າງໜ້ອຍ 10 ຄົນ ແລະ ຍັງມີເດັກນ້ອຍອີກຢ່າງໜ້ອຍ 16 ຄົນ ໄດ້ຮັບບາດເຈັບສາຫັດ. ຂະນະທີ່ສື່ທ້ອງຖິ່ນລາຍງານໂດຍອ້າງຂໍ້ມູນຈາກແຫລ່ງຂ່າວວ່າ: ໃນໄລຍະເກີດເຫດມີເດັກນ້ອຍຢູ່ໃນພະແນກ 54 ຄົນ ແລະ ສາເຫດໄຟໄໝ້ອາດຈະມາຈາກໄຟຟ້າລັດວົງຈອນ.

      ສ່ວນນາຍົກລັດຖະມົນຕີ ນາເຣນທຣາ ໂມດີ ຜູ້ນໍາອິນເດຍ ສະແດງຄວາມເສຍໃຈຢ່າງສູງສຸດ, ສ່ວນທາງການລັດອຸດຕໍປະເທດ ທີ່ຢູ່ທາງເໜືອຂອງອິນເດຍ ປະກາດມອບເງິນຊ່ວຍເຫລືອໃນເບື້ອງຕົ້ນ 500,000 ຣູປີ ໃຫ້ຄອບຄົວຜູ້ເສຍຊີວິດ.