ນະຄອນຫລວງນິວເດລີປິດໂຮງຮຽນປະຖົມຊົ່ວຄາວ ຫລັງມົນລະພິດເພີ່ມສູງເກີນຂີດອັນຕະລາຍ

      ເມືອງຫລວງຂອງອິນເດຍ ສັ່ງປິດໂຮງຮຽນປະຖົມສຶກສາທັງໝົດ ຈົນກວ່າຈະມີປະກາດເພີ່ມຕື່ມ ເນື່ອງຈາກບັນຫາໝອກຄວັນພິດໃນມະຫານະຄອນແຫ່ງນີ້ຢູ່ໃນລະດັບຮຸນແຮງ.

      ທ່ານ ອາຕິຊິ ເຈົ້າຄອງນະຄອນຫລວງນິວເດລີ ກ່າວວ່າ: ໂຮງຮຽນປະຖົມສຶກສາທຸກແຫ່ງໃນພື້ນທີ່ຈະປ່ຽນເປັນການຮຽນການສອນທາງອອນລາຍ ເນື່ອງຈາກລະດັບມົນລະພິດທີ່ເພີ່ມສູງຂຶ້ນ ແລະ ມາດຕະການດັ່ງກ່າວຈະດໍາເນີນໄປເລື້ອຍໆຈົນກວ່າຈະມີຄໍາສັ່ງປ່ຽນແປງ.

      ນອກຈາກນັ້ນ, ທາງການຍັງອອກຄໍາສັ່ງຫ້າມກິດຈະກໍາກໍ່ສ້າງ ແລະ ຈໍາກັດບໍ່ໃຫ້ລົດບັນທຸກສິນຄ້າທີ່ໃຊ້ນໍ້າມັນກາຊວນເຂົ້າໄປພື້ນທີ່ອື່ນຂອງນະຄອນຫລວງນິວເດລີ ເພື່ອບັນເທົາບັນຫາໝອກຄວັນພິດທີ່ຍັງປົກຄຸມເມືອງຫລວງ.

     ລະດັບອະນຸພາ PM2.5 ໃນນະຄອນຫລວງນິວເດລີ ເຊິ່ງເປັນອະນຸພາກຂະໜາດນ້ອຍທີ່ເຮັດໃຫ້ເກີດມະເຮັງສູງກວ່າຄ່າສູງສຸດຂອງອົງການອະນາໄມໂລກ (WHO) ເຖິງ 50 ເທົ່າ ໃນວັນທີ 13 ພະຈິກຜ່ານມາ.

     ເຖິງຢ່າງໃດກໍດີ, ເທດສະບານນະຄອນຫລວງນິວເດລີເລີ່ມໂຄງການຈໍານວນຫລາຍ ເພື່ອແກ້ໄຂບັນຫາມົນລະພິດ ເຊິ່ງໃນທາງປະຕິບັດບໍ່ໄດ້ຊ່ວຍຫຍັງ ລວມທັງການໃຊ້ລົດບັນທຸກນໍ້າຂອງເທດສະບານແລ່ນຕາມຖະໜົນ ເພື່ອສີດພົ່ນນໍ້າ.

     ນອກຈາກນັ້ນ, ຍັງມີໂຄງການໃໝ່ທີ່ເປີດຂຶ້ນໃນເດືອນນີ້ ເຊິ່ງເປັນການໃຊ້ໂດຣນຂະໜາດນ້ອຍ 3 ລໍາ ບິນສີດລະອອງນໍ້າ, ແຕ່ປະຊາຊົນວິຈານຢ່າງໜັກວ່າເປັນວິທີແກ້ບັນຫາຊົ່ວຄາວເທົ່ານັ້ນ.