ຫວຽດນາມເລັ່ງຮື້ຟື້ນໂຄງການພະລັງງານນິວເຄຼຍ ຕອບສະໜອງຄວາມຕ້ອງການພາຍໃນປະເທດ
ລັດຖະບານຫວຽດນາມຕ້ອງການເລີ່ມດໍາເນີນແຜນພະລັງງານນິວເຄຼຍອີກ ເພື່ອຕອບສະໜອງຕໍ່ຄວາມຕ້ອງການພະລັງງານທີ່ເພີ່ມຂຶ້ນຢ່າງວ່ອງໄວ ພາຍຫລັງທາງການຍົກເລີກໂຄງການມູນຄ່າຫລາຍພັນລ້ານໂດລາສະຫະລັດ 2 ໂຄງການ ໃນປີ 2016.
ທ່ານ ຟາມ ມິງ ຈິງ ນາຍົກລັດຖະມົນຕີຫວຽດນາມ ກ່າວຕໍ່ສະພາແຫ່ງຊາດຫວຽດນາມ ໃນວັນທີ 12 ພະຈິກຜ່ານມາວ່າ: ລັດຖະບານຍື່ນຄໍາຂໍໃຫ້ທາງການເລີ່ມດໍາເນີນໂຄງການພະລັງງານນິວເຄຼຍອີກ.
“ການເຄື່ອນໄຫວນີ້ມີຈຸດປະສົງເພື່ອຮັບປະກັນພະລັງງານທີ່ພຽງພໍ ສໍາລັບການພັດທະນາທາງເສດຖະກິດ ແລະ ສັງຄົມທີ່ວ່ອງໄວ ແລະ ຍືນຍົງໃນໄລຍະຍາວ ເພາະຖ້າຕັ້ງເປົ້າຈະສ້າງສະຖານະການການເຕີບໃຫຍ່ທາງເສດຖະກິດທີ່ມີຕົວເລກສອງຫລັກ ຄວາມຕ້ອງການພະລັງງານຈະເພີ່ມຂຶ້ນ 1.5 ເທົ່າ” ທ່ານ ຟາມ ມິງ ຈິງ ກ່າວ.
ໃນທ້າຍປີ 2016 ລັດຖະບານຮ່າໂນ້ຍຍົກເລີກແຜນການສ້າງໂຮງໄຟຟ້ານິວເຄຼຍມູນຄ່າຫລາຍພັນລ້ານໂດລາສະຫະລັດ ຈໍານວນ 2 ໂຄງການ ໂດຍອ້າງເຫດຜົນດ້ານສິ່ງແວດລ້ອມ ແລະ ການເງິນ ເຊິ່ງໂຄງການດັ່ງກ່າວຖືເປັນໂຄງການທໍາອິດໃນອາຊີຕາເວັນອອກສຽງໃຕ້, ແຕ່ຫວຽດນາມຕັດສິນໃຈໂຈະທັງສອງໂຄງການ ພາຍຫລັງການປະເມີນຕົ້ນທຶນເພີ່ມຂຶ້ນສອງເທົ່າ ເປັນ 18,000 ລ້ານໂດລາສະຫະລັດ.
ທັງນີ້, ໂຮງໄຟຟ້ານິວເຄຼຍ 2 ແຫ່ງ ຢູ່ແຂວງນິນຖ່ວນ ທາງພາກກາງຂອງຫວຽດນາມ ເຊິ່ງມີກໍາລັງການຜະລິດ 4,000 ເມກາວັດ ຈະຖືກພັດທະນາໂດຍໄດ້ຮັບການຊ່ວຍເຫລືອຈາກບໍລິສັດ ຣອສອະຕອມ ຂອງຣັດເຊຍ ແລະ ກຸ່ມບໍລິສັດ ຈິນເອດ (JINED) ຂອງຍີ່ປຸ່ນ.
