ຟີລິບປິນເຕືອນໄພສູງສຸດ ຮັບມືພາຍຸໄຕ້ຝຸ່ນອູຊາງິ ກຽມພັດຖະຫລົ່ມເປັນຫົວທີ 5 ໃນເດືອນດຽວ
ໜ່ວຍງານຂອງຟີລິບປິນ ເຕືອນໄພຂັ້ນສູງສຸດ ພາຍຸໄຕ້ຝຸ່ນອູຊາງິ ທີ່ກຽມພັດຖະຫລົ່ມເກາະລູຊອນ ເປັນຫົວທີ 5 ພາຍໃນໄລຍະເວລາພຽງເດືອນດຽວ.
ກົມອຸຕຸນິຍົມວິທະຍາແຫ່ງຊາດຟີລິບປິນ ອອກຖະແຫລງການຍົກລະດັບການເຕືອນໄພສະພາບອາກາດ ຄວບຄຸມເກາະລູຊອນທີ່ຢູ່ທາງເໜືອຂອງປະເທດ ເພື່ອເພີ່ມຄວາມຕື່ນຕົວໃຫ້ປະຊາຊົນໃນການພ້ອມຮັບມືອິດທິພົນຮຸນແຮງຂອງພາຍຸໄຕ້ຝຸ່ນອູຊາງິ ເຊິ່ງເຄື່ອນທີ່ດ້ວຍຄວາມໄວລົມສູງສຸດໃກ້ສູນກາງ 180 ກິໂລແມັດຕໍ່ຊົ່ວໂມງ ໃນຕອນເຊົ້າຂອງວັນທີ 14 ພະຈິກ ຕາມເວລາທ້ອງຖິ່ນ ແລະ ມີການຄາດຄະເນວ່າ: ພາຍຸຈະຂຶ້ນຝັ່ງໃນຕອນບ່າຍຫາຄ້າຍແລງຂອງວັນດຽວກັນ.
ທັງນີ້, ພາຍຸອູຊາງິເປັນພາຍຸຫົວທີ 5 ທີ່ພັດຜ່ານຟີລິບປິນ ພາຍໃນໄລຍະເວລາປະມານ 1 ເດືອນເທົ່ານັ້ນ ໂດຍພາຍຸທັງສາມຫົວກ່ອນໜ້ານັ້ນ ນັບແຕ່ພາຍຸເຂດຮ້ອນຈ່າມີ, ຊຸບເປີໄຕ້ຝຸ່ນກອງເຣຍ, ພາຍຸໄຕ້ຝຸ່ນຫຍິນຊິ່ງ ແລະ ພາຍຸໄຕ້ຝຸ່ນໂທຣາຈີຫາກໍພັດຂຶ້ນຝັ່ງເກາະລູຊອນ ໃນວັນທີ 11 ພະຈິກຜ່ານມາ.
ສ່ວນໜ່ວຍງານທີ່ກ່ຽວຂ້ອງ ອົບພະຍົບປະຊາຊົນໃນພື້ນທີ່ສ່ຽງແລ້ວ 40,000 ກວ່າຄົນ ໃນອາທິດນີ້ ເນື່ອງຈາກມີຄວາມສ່ຽງທີ່ພາຍຸໄຕ້ຝຸ່ນໝ່ານຫຍີ່ ເຊິ່ງກໍາລັງກໍ່ຕົວຢູ່ມະຫາສະໝຸດປາຊີຟິກ ອາດເຄື່ອນທີ່ເຂົ້າສູ່ຟີລິບປິນໃນອາທິດນີ້ ແລະ ຈະເປັນພາຍຸຫົວທີ 6 ທີ່ຟີລິບປິນຕ້ອງຮັບມື ພາຍໃນໄລຍະເວລາປະມານ 1 ເດືອນເທົ່ານັ້ນ.
ຂະນະທີ່ຂໍ້ມູນເບື້ອງຕົ້ນຂອງສະຫະປະຊາຊາດ (UN) ລະບຸວ່າ: ສະພາບອາກາດຮຸນແຮງຢ່າງຕໍ່ເນື່ອງທີ່ເກີດຂຶ້ນກັບຟີລິບປິນ ສົ່ງຜົນເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 159 ຄົນ ແລະ ຈົນຮອດຕອນນີ້ມີການອົບພະຍົບປະຊາຊົນແລ້ວ 700,000 ຄົນ. ອີກທັງ UN ຢູ່ລະຫວ່າງລະດົມທຶນໃຫ້ໄດ້ 32.9 ລ້ານໂດລາສະຫະລັດ ເພື່ອຊ່ວຍເຫລືອປະຊາຊົນໃນພື້ນທີ່ປະສົບໄພ.
