ອິດສະລາແອນເສຍທະຫານ 6 ຄົນໃນມື້ດຽວ ຈາກປະຕິບັດການຢູ່ພາກໃຕ້ລີບັງ
ທະຫານອິດສະລາແອນເສຍຊີວິດຢ່າງໜ້ອຍ 6 ຄົນ ຈາກປະຕິບັດການທາງທະຫານຮອບຫລ້າສຸດຢູ່ລີບັງ, ຂະນະທີ່ UNSC ປະນາມການໃຊ້ຄວາມຮຸນແຮງຕໍ່ທະຫານຮັກສາສັນຕິພາບ.
ກອງທັບອິດສະລາແອນອອກຖະແຫລງການວ່າ: ທະຫານອິດສະລາແອນຢ່າງໜ້ອຍ 6 ຄົນ ເສຍຊີວິດຈາກປະຕິບັດການຢູ່ພາກໃຕ້ຂອງລີບັງ ຖືເປັນການສູນເສຍກໍາລັງພົນຫລາຍທີ່ສຸດຄັ້ງໜຶ່ງ ນັບແຕ່ກອງທັບອິດສະລາແອນເລີ່ມປະຕິບັດການພາກພື້ນດິນ ຢູ່ທາງພາກໃຕ້ຂອງລີບັງ ໃນວັນທີ 30 ກັນຍາຜ່ານມາ ເຊິ່ງມາຮອດປັດຈຸບັນອິດສະລາແອນສູນເສຍທະຫານໄປແລ້ວ 47 ຄົນ.
ຂະນະທີ່ກຸ່ມແຮັດໂບລາອອກຖະແຫລງການວ່າ: ຍິງລູກສອນໄຟຫລາຍລູກໃສ່ສູນບັນຊາການທະຫານຂອງອິດສະລາແອນ ໃນນະຄອນຫລວງເທວອາວີບ ເຊິ່ງເປັນສະຖານທີ່ຕັ້ງຂອງກະຊວງປ້ອງກັນຄວາມສະຫງົບອິດສະລາແອນ, ແຕ່ບໍ່ໄດ້ລະບຸເຖິງການເສຍຊີວິດຂອງທະຫານອິດສະລາແອນ 6 ຄົນ.
ສ່ວນກອງທັບອິດສະລາແອນອອກຖະແຫລງການວ່າ: ລະບົບປ້ອງກັນສະກັດລູກສອນໄຟຢ່າງໜ້ອຍ 5 ລູກທີ່ມີການຍິງຂ້າມແດນຈາກລີບັງມາອິດສະລາແອນ.
ອີກດ້ານໜຶ່ງ, ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ອອກຖະແຫລງການປະນາມ ເຫດການຮຸນແຮງຫລາຍຄັ້ງ ເຊິ່ງເກີດຂຶ້ນຕໍ່ກອງກໍາລັງທະຫານຮັກສາສັນຕິພາບຢູ່ລີບັງ (ຢູນິຟິລ) ແລະ ຮຽກຮ້ອງໃຫ້ທຸກຝ່າຍທີ່ກ່ຽວຂ້ອງຄໍານຶງເຖິງຄວາມປອດໄພຂອງທະຫານຮັກສາສັນຕິພາບໃນລະດັບສູງສຸດ.
ທັງນີ້, ນັບແຕ່ອິດສະລາແອນ ແລະ ກຸ່ມແຮັດໂບລາ ເຊິ່ງມີຖານທີ່ໝັ້ນຢູ່ພາກໃຕ້ຂອງລີບັງ ເປີດສາກໂຈມຕີຕອບໂຕ້ກັນ ຄູ່ຂະໜານກັບສົງຄາມຢູ່ເຂດກາຊາ ເຊິ່ງເລີ່ມຂຶ້ນໃນວັນທີ 7 ຕຸລາ 2023 ມີຜູ້ເສຍຊີວິດຈາກຄວາມຮຸນແຮງຄັ້ງນີ້ແລ້ວຫລາຍກວ່າ 3,360 ຄົນ ສ່ວນຫລາຍເປັນພົນລະເຮືອນ.
