ກໍາປູເຈຍຕັ້ງເປົ້າຫລຸດພົ້ນສະຖານະປະເທດພັດທະນານ້ອຍທີ່ສຸດພາຍໃນປີ 2029
ກໍາປູເຈຍ ແລະ ໂຄງການພັດທະນາແຫ່ງສະຫະປະຊາຊາດ (UNDP) ສະຫລຸບນະໂຍບາຍກ່ຽວກັບການຊຸກຍູ້ໃຫ້ກໍາປູເຈຍ ຫລຸດພົ້ນຈາກສະຖານະປະເທດພັດທະນານ້ອຍທີ່ສຸດ ພາຍໃນປີ 2029.
ສໍານັກຂ່າວຊິນຮົວລາຍງານວ່າ: ເອກະສານດັ່ງກ່າວປະເມີນເຖິງໂອກາດການສູນເສຍມາດຕະການສະໜັບສະໜູນລະຫວ່າງປະເທດເຊັ່ນ: ຂໍ້ສະເໜີທີ່ໃຫ້ຍົກເວັ້ນການປະຕິບັດຕາມຂໍ້ຕົກລົງການຄຸ້ມຄອງຊັບສິນທາງປັນຍາ (TRIPS waivers) ພາຍໃຕ້ກົດຂອງອົງການການຄ້າໂລກ (WTO), ການເຂົ້າເຖິງຕະຫລາດໂດຍໄດ້ຮັບສິດພິເສດ ແລະ ການຈັດຫາເງິນທຶນແບບຫລຸດຜ່ອນ ແລະ ອື່ນໆ ເຊິ່ງອາດສົ່ງຜົນຕໍ່ສາທາລະນະສຸກ, ສິນຄ້າສົ່ງອອກທີ່ສໍາຄັນ ຄືເສື້ອຜ້າສໍາເລັດຮູບ, ເຂົ້າ ແລະ ລົດຈັກ ແລະ ຫລຸດການເຕີບໃຫຍ່ທາງເສດຖະກິດໂດຍລວມ.
ຂະນະທີ່ການເຕີບໃຫຍ່ຂອງລວມຍອດຜະລິດຕະພັນພາຍໃນ (GDP) ອາດຊ້າລົງ 0.5-1.5% ແລະ ອາດມີການສູນເສຍຕໍາແໜ່ງວຽກ 165,000 ອັດຕາ ໂດຍສະເພາະໃນກຸ່ມຜູ້ຍິງທີ່ເຮັດວຽກໃນຂະແໜງເສື້ອຜ້າສໍາເລັດຮູບ ເຊິ່ງຈະສົ່ງຜົນເຮັດໃຫ້ປະຊາຊົນປະມານ 432,000 ຄົນ ສ່ຽງຕົກຢູ່ໃນຄວາມທຸກຍາກ ຖ້າບໍ່ວາງຮາກຖານທີ່ຖືກຕ້ອງໃຫ້ໄວທີ່ສຸດ.
ຂໍ້ມູນຈາກກະຊວງການວາງແຜນຂອງກໍາປູເຈຍ ລະບຸວ່າ: ແຜນຍຸດທະສາດນີ້ຈະສອດຄ່ອງກັບຍຸດທະສາດຫ້າຫລ່ຽມຂອງລັດຖະບານ ເຊິ່ງເນັ້ນໃສ່ 6 ບັນຫາສໍາຄັນ ໄດ້ແກ່ ການສົ່ງເສີມທຶນມະນຸດ, ການກະຈາຍຄວາມສ່ຽງທາງເສດຖະກິດ, ການຂະຫຍາຍຕະຫລາດການຄ້າ, ການດຶງດູດການລົງທຶນຈາກຕ່າງປະເທດ, ການພັດທະນາວິທະຍາສາດ, ເຕັກໂນໂລຊີ ແລະ ນະວັດຕະກໍາ ແລະ ການສົ່ງເສີມກົນໄກສະໜັບສະໜູນທາງສັງຄົມ.
ສ່ວນລາຍງານຂອງ UNDP ໃຫ້ຄວາມເຫັນວ່າ: ການຫລຸດພົ້ນຈາກສະຖານະປະເທດພັດທະນານ້ອຍທີ່ສຸດ ຈະເປັນຜົນສໍາເລັດຄັ້ງສໍາຄັນຂອງເສັ້ນທາງການພັດທະນາຂອງກໍາປູເຈຍ ເຊິ່ງຈະສ້າງຄວາມທ້າທາຍ ແລະ ໂອກາດ.
ການປ່ຽນຜ່ານຄັ້ງນີ້ ຈະເປີດເສັ້ນທາງໃໝ່ສູ່ການເຕີບໃຫຍ່ທີ່ແຂງແກ່ນ ແລະ ຢືດຢຸ່ນ ແລະ ເປັນຄວາມພະຍາຍາມຮ່ວມກັນນອກເໜືອຈາກດ້ານການຄ້າ ເຊິ່ງຕ້ອງອາໄສການຮ່ວມມືຂອງຫຸ້ນສ່ວນການພັດທະນາ ແລະ ຜູ້ມີສ່ວນໄດ້ຮັບທາງສັງຄົມທັງໝົດ ເພື່ອຄວ້າໂອກາດ ແລະ ສົ່ງເສີມພາບພົດໃໝ່ໃຫ້ກໍາປູເຈຍ.
