ປາກິດສະຖານຈໍາກັດກິດຈະກໍາກາງແຈ້ງ-ຫລຸດເວລາຊື້ຂາຍ ເພື່ອຄວບຄຸມພະຍາດຈາກມົນລະພິດອາກາດ

       ທາງການແຄວ້ນປັນຈາບຂອງປາກິດສະຖານ ປະກາດຫ້າມເຮັດກິດຈະກໍາກາງແຈ້ງສ່ວນຫລາຍ ແລະ ສັ່ງໃຫ້ຮ້ານຄ້າ, ຕະຫລາດ ແລະ ຫ້າງສັບພະສິນຄ້າໃນບາງພື້ນທີ່ ປິດໄວກວ່າປົກກະຕິ ເພື່ອຄວບຄຸມພະຍາດທີ່ເກີດຈາກມົນລະພິດທາງອາກາດທີ່ຮຸນແຮງ.

      ລັດຖະບານແຄວ້ນປັນຈາບ ມີຄໍາສັ່ງປິດສະຖານສຶກສາ ແລະ ສະຖານທີ່ສາທາລະນະຕ່າງໆເຊັ່ນ: ສວນສາທາລະນະ ແລະ ສວນສັດ ຈົນຮອດວັນທີ 17 ພະຈິກນີ້ ໃນຫລາຍພື້ນທີ່ທີ່ໄດ້ຮັບຜົນກະທົບຈາກມົນລະພິດທາງອາກາດ.

      ນອກຈາກນີ້, ຄໍາສັ່ງດັ່ງກ່າວຍັງລະບຸວ່າ: ຫລາຍເຂດໃນເມືອງລາຮໍ, ເມືອງມຸນຕານ, ເມືອງໄຟຊາລາບັດ ແລະ ເມືອງກຸດຣັນວາລາ ພົບຈໍານວນຄົນເຈັບພະຍາດທາງເດີນຫາຍໃຈ ແລະ ພະຍາດຕາແດງ ລວມທັງຜູ້ທີ່ມີອາການລາຍຄາຍເຄືອງຕາ ແລະ ລໍາຄໍ ເພີ່ມຂຶ້ນແບບບໍ່ເຄີຍປາກົດມາກ່ອນ.

      ຄໍາສັ່ງດັ່ງກ່າວຫ້າມບໍ່ໃຫ້ປະຊາຊົນຈັດ ຫລື ເຮັດກິດຈະກໍາກາງແຈ້ງຕ່າງໆ ບໍ່ວ່າຈະເປັນງານກິລາ, ນິເທດສະການ ແລະ ເທດສະການ ຕະຫລອດຈົນການຮັບປະທານອາຫານໃຫ້ຮ້ານອາຫານ ຍົກເວັ້ນພິທີທາງສາສະໜາທີ່ບໍ່ສາມາດຫລີກເວັ້ນໄດ້.

     ສ່ວນສະຖານທີ່ຫລາຍແຫ່ງຕ້ອງປິດພາຍໃນເວລາ 20:00 ໂມງ ຕາມເວລາທ້ອງຖິ່ນຂອງປາກິດສະຖານ. ຂະນະທີ່ຮ້ານຂາຍຢາ, ສາງນໍ້າມັນ, ຮ້ານຂາຍຜະລິດຕະພັນນົມ ແລະ ຮ້ານຂາຍໝາກໄມ້ ຍັງສາມາດເປີດ-ປິດໄດ້ຕາມເວລາປົກກະຕິ.

      ທັງນີ້, ແຄວ້ນປັນຈາບກ່າວຫາວ່າ: ອາກາດທີ່ເປັນພິດໃນປີນີ້ ມີສາເຫດມາຈາກມົນລະພິດທີ່ພັດມາຈາກອິນເດຍ. ພ້ອມກ່າວວ່າ: ທາງການຈະຫາລືບັນຫາດັ່ງກ່າວນໍາລັດຖະບານນິວເດລີ ຜ່ານກະຊວງການຕ່າງປະເທດອິນເດຍ.