ຄວາມຄືບໜ້າຂອງການກະກຽມການສຳຫລວດພົນລະເມືອງ ແລະ ທີ່ຢູ່ອາໄສຄັ້ງທີ V ຂອງ ສປປ ລາວ
ວັນທີ 8 ພະຈິກ 2024 ທີ່ ສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດ ກອງທຶນສຳລັບປະຊາກອນ ປະຈຳ ສປປ ລາວ (UNFPA) ໄດ້ຈັດກອງປະຊຸມຄູ່ຮ່ວມພັດທະນາ ແລະ ຂະແໜງການທີ່ກ່ຽວຂ້ອງເພື່ອປຶກສາຫາລື ແລະ ເພີ່ມການຮ່ວມມືເພື່ອການກະກຽມການສຳຫລວດພົນລະເມືອງ ແລະ ທີ່ຢູ່ອາໄສຄັ້ງທີ V ຂອງ ສປປ ລາວ ເຊິ່ງກຳນົດໄວ້ໃນປີ 2025.
ທ່ານ ນາງ ພອນສະຫລີ ສຸກສະຫວັດ ຮອງລັດຖະມົນຕີ ແລະ ຫົວໜ້າສູນສະຖິຕິແຫ່ງຊາດ ຂອງ ສປປ ລາວ ເປັນປະທານກອງປະຊຸມກ່ອນການດຳເນີນກອງປະຊຸມໂຕະມົນຄັ້ງທີ່ 2 (RTIM) ແລະ ກອງປະຊຸມຮ່ວມກັບຄູ່ຮ່ວມພັດທະນາແລະ ຂະແໜງການຄັ້ງທີ 5. ເຊິ່ງໄດ້ຍົກໃຫ້ເຫັນຄວາມຄືບໜ້າທີ່ພົ້ນເດັ່ນຫລາຍດ້ານຂອງການກະກຽມການ ສຳຫລວດພົນລະເມືອງ ພ້ອມທັງບັນດາສິ່ງທ້າທາຍທີ່ສຳຄັນທີ່ຕ້ອງປະຕິບັດໃນປີ 2025 ທີ່ຈະມາເຖິງ.
ໃນໄລຍະເຄິ່ງປີ 2024 ທີ່ຜ່ານມາ, UNFPA ໄດ້ໃຫ້ການສະໜັບສະໜູນສູນສະຖິຕິແຫ່ງຊາດ ເຊິ່ງມີຄວາມຄືບໜ້າຫລາຍດ້ານທີ່ພົ້ນເດັ່ນ ໂດຍສະເພາະການສ້າງຍຸດທະສາດການຄວາມຮ່ວມມື ກັບຄູ່ຮ່ວມພັດທະນາ ລວມມີ ອົງການຮ່ວມມື ແລະ ພັດທະນາສະວິດເຊີແລນ (SDC), ອົງການການພັດທະນາລຸກຊຳບວກ.
ການຮ່ວມມືກັບຄູ່ຮ່ວມຍຸດທະສາດໃໝ່ເຫລົ່ານີ້ໄດ້ສົ່ງເສີມການຮ່ວມມືທີ່ມີຢູ່ແລ້ວກັບອົງການ USAID ແລະ DFAT ຂອງປະເທດອອດສະເຕເລຍ ທີ່ໄດ້ໃຫ້ການສະໜັບສະໜູນທາງດ້ານງົບປະມານທີ່ສຳຄັນສຳລັບການກະກຽມ ແລະ ການດຳເນີນການສຳຫລວດພົນລະເມືອງ ແລະ ທີ່ຢູ່ອາໄສ. ນອກຈາກນີ້ ຍັງມີການຊ່ວຍເຫລືອ ຂອງອົງການຊ່ວຍເຫລືອຂອງ ສາທາລະນະລັດປະຊາຊົນຈີນ (ChinaAID) ຍັງໄດ້ໃຫ້ການຮ່ວມມືແລະ ສະໜັບສະໜູນການສຳຫລວດພົນລະເມືອງ ດ້ວຍການຮ່ວມມື ແລະ ໃຫ້ການສະໜັບສະໜູນໂດຍກົງແກ່ສູນສະຖິຕິແຫ່ງຊາດ.
ນອກຈາກນີ້, ການຮ່ວມມືກັບຂະແໜງການ ແລະ ພາກລັດຖະບານ, ອົງການຈັດຕັ້ງທາງສັງຄົມ, ພາກເອກະຊົນ, ນັກຊ່ຽວຊານສາກົນກໍ່ໄດ້ມີການເພີ່ມທະວີຂຶ້ນ, ເຊິ່ງປະກອບສ່ວນທີ່ສຳຄັນໃສ່ຜົນສຳເລັດຂອງການທົດລອງການສຳຫລວດພົນລະເມືອງ ແລະ ທີ່ຢູ່ອາໄສທີ່ດຳເນີນໃນຕົ້ນປີ 2024 ນີ້. ຂີດໝາຍສຳຄັນອີກອັນໜຶ່ງແມ່ນການສ້າງຍຸດທະສາດຂອງການສຳຫລວດພົນລະເມືອງທີ່ລວມເອົາຄວາມສະເໝີພາບລະຫວ່າງຍິງ-ຊາຍ ແລະ ຮັບປະກັນການເປັນຕົວແທນທີ່ສະເໝີພາບ.
ໃນບົດກ່າວເປີດກອງປະຊຸມ, ຕາງໜ້າໃຫ້ ສປປ ລາວ, ທ່ານ ນາງ ພອນສະຫລີ ສຸກສະຫວັດ ໄດ້ສະແດງຄວາມຂອບໃຈຕໍ່ ອົງການUNFPA ແລະ ບັນດາຄູ່ຮ່ວມພັດທະນາ ພ້ອມທັງຂອບໃຈບັນດາກະຊວງທີ່ໄດ້ປະກອບສ່ວນເຂົ້າໃນການກະ ກຽມານສຳຫຼວດພົນລະເມືອງ ແລະ ທີ່ຢູ່ອາໄສຢ່າງຕໍ່ເນື່ອງ.
ທ່ານໄດ້ເນັ້ນເຖິງຄວາມສຳຄັນຂອງການສຳຫລວດພົນລະເມືອງຕື່ມອີກວ່າ ຂໍ້ມູນຈາກການສຳຫລວດພົນລະເມືອງດັ່ງກ່າວ ຈະເປັນແຫລ່ງຂໍ້ມູນທີ່ສຳຄັນເພື່ອອະທິບາຍທ່າອ່ຽງດ້ານປະຊາກອນຂອງ ສປປ ລາວ ແລະ ດ້ານສະພາບເສດຖະກິດ-ສັງຄົມ ແລະ ສະຖານະພາບຄວາມສ່ຽງຂອງປະຊາກອນລາວ.
ທ່ານກ່າວວ່າ ຜົນການສຳຫລວດທີ່ຈະມາເຖິງຍັງຈະມີບົດບາດສຳຄັນໃນການຕິດຕາມ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີປະຈຸບັນ (2021-2025) ແລະ ວາງທິດທາງໃໝ່ຂອງແຜນພັດທະນາໄລຍະ 2026-2030.
ທ່ານຍັງກ່າວຕື່ມ ຂໍ້ມູນທີ່ເກັບກຳໄດ້ນັ້ນ ຈະເປັນຂໍ້ມູນອ້າງອິງທີ່ສຳຄັນ ໃນການປະເມີນຄວາມຄືບໜ້າຂອງ ສປປ ລາວ ເພື່ອບັນລຸເປົ້າໝາຍພັດທະນາແບບຍືນຍົງ (SDGs), ແຜນດຳເນີນງານຂອງກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ (ICPD PoA) ແລະ ຄວາມພະຍາຍາມຂອງ ສປປ ລາວ ທີ່ຈະຫຼຸດພົ້ນອອກຈາກສະຖານະພາບປະເທດດ້ອຍພັດທະນາ (LDC).
ທ່ານ ແກມບິດ ຄາບິຣິ, ຜູ້ປະສານງານດ້ານນະໂຍບາຍ ແລະ ການສຳຫຼວດພົນລະເມືອງ ໄດ້ຂຶ້ນກ່າວໃຫ້ຄຳປາໄສໃນນາມຂອງອົງ UNFPA ທີ່ກອງປະຊຸມ, ໂດຍໄດ້ຮຽກຮ້ອງໃຫ້ມີຄວາມຮ່ວມມືທີ່ເຂັ້ມແຂງຍິ່ງຂຶ້ນ, ການດຳເນີນງານຮ່ວມກັນ ແລະ ການສະໜັບສະໜູນຈາກພາກສ່ວນທີ່ກ່ຽວຂ້ອງ ແລະ ຄູ່ຮ່ວມພັດທະນາທັງໝົດເພື່ອແກ້ໄຂສິ່ງທ້າທາຍ ແລະ ຊ່ອງຫວ່າງທີ່ມີຢູ່ແລ້ວ ເພື່ອຮັບປະກັນວ່າການສຳຫຼວດພົນລະເມືອງ ແລະ ທີ່ຢູ່ອາໄສ ຄັ້ງທີ5 ຈະດຳເນີນໄປ ຢ່າງເຕັມສ່ວນ, ມີປະສິດທິພາບ ແລະ ປະສິທິຜົນສູງ.
ນອກຈາກນີ້, ທ່ານຍັງໄດ້ຢືນຢັນຄືນຄຳໝັ້ນສັນຍາຂອງ UNFPA ທີ່ຈະສະໜັບສະໜູນ ແກ່ສູນສະຖິຕິຂອງແຫ່ງຊາດ ໃນທຸກດ້ານ ແລະ ໃນໄລຍະຂອງການສຳຫຼວດພົນລະເມືອງ ແລະ ທີ່ຢູ່ອາໄສ ລວມທັງມາດຕະການກ່ອນການລົງສຳຫລວດ, ໄລຍະການສຳຫລວດ ແລະ ພາຍຫຼັງການສຳຫລວດ.
ໂດຍຮັບຮູ້ເຖິງຄວາມຕ້ອງການອັນສຳຄັນຂອງຂໍ້ມູນສະຖິຕິທີ່ຖືກຕ້ອງ, ທັນເວລາ, ແລະ ເຊື່ອຖືໄດ້, ສປປ ລາວ ໄດ້ເລີ່ມກະກຽມການສຳຫລວດລະດັບຊາດທີ່ສຳຄັນນີ້ຕັ້ງແຕ່ປີ 2021. ໂດຍໄດ້ຮັບການສະໜັບສະໜູນ ດ້ານວິຊາການຈາກອົງການ UNFPA ແລະ ຜູ້ຊ່ຽວຊານລະດັບຊາດ ແລະ ສາກົນ, ການສຳຫຼວດພົນລະເມືອງ ແລະ ທີ່ຢູ່ອາໄສຈະນຳໃຊ້ເຕັກໂນໂລຊີດີຈີຕອນ, ການນຳໃຊ້ອຸປະກອນແທບເລດ ແລະ ຂໍ້ມູນແຜນທີ່(GIS). ການສ້າງແຜນທີ່ເພື່ອຮັບປະກັນການເກັບກໍາຂໍ້ມູນທັນເວລາ ແລະ ຊັດເຈນ. ພະນັກງານນັກເດີນສຳຫລວດພາກສະໜາມຈຳນວນ 13,000 ຄົນ ຈະຖືກຄັດເລືອກເພື່ອຈົດນັບຂໍ້ມູນຈາກ ຄົວເຮືອນປະມານ 1,4 ລ້ານຄົວເຮືອນ ໃນ 18 ແຂວງທົ່ວປະເທດ; ການສຳຫລວດພົນລະເມືອງ ແລະ ທີ່ຢູ່ອາໄສຈະສະໜອງຂໍ້ມູນພື້ນຖານທີ່ສຳຄັນ ເພື່ອກຳນົດ ແລະ ສ້າງແຜນ ພັດທະນາປະເທດຊາດໃນອະນາຄົດ.
