ເຈົ້າສາວອາຍຸ 8 ປີເສຍຊີວິດ ຫລັງແຕ່ງດອງກັບຊາຍໜຸ່ມ 40 ປີ ມົດລູກແຕກ ແຕ່ຕໍາຫລວດບໍ່ເອົາຜິດຝ່າຍຊາຍ
ເກີດເຫດເສົ້າໃຈ ເຈົ້າສາວອາຍຸ 8 ປີເສຍຊີວິດ ຫລັງແຕ່ງດອງກັບຊາຍໜຸ່ມອາຍຸ 40 ປີ ເນື່ອງຈາກມົດລູກແຕກ ເລືອດອອກພາຍໃນ. ຂະນະທີ່ເຈົ້າໜ້າທີ່ບໍ່ແຈ້ງຂໍ້ຫານໍາທາງຜູ້ຊາຍ ແລະ ຄອບຄົວຝ່າຍຍິງ.
ການບັງຄັບເດັກຍິງໃຫ້ແຕ່ງດອງກັບຜູ້ຊາຍສູງອາຍຸມັກຈະເຮັດໃຫ້ເກີດເຫດເສົ້າສະຫລົດຂຶ້ນ ດັ່ງຈະເຫັນໃນຂ່າວເສົ້າໃນຫລາຍໆປະເທດ, ເລື່ອງດັ່ງກ່າວ ກຸ່ມນັກສິດທິມະນຸດໄດ້ມີການເຄື່ອນໄຫວຕໍ່ຕ້ານ ປົກປ້ອງສິດທິແມ່ຍິງມຸດສະລິມ.
ຫລ້າສຸດສໍານັກຂ່າວຕ່າງປະເທດ ກາດຽນ ໄດ້ລາຍງານຂ່າວເສົ້າ ໂດຍເລື່ອງນີ້ເກີດຂຶ້ນຢູ່ເມືອງມີດິ ແຂວງຮັດຈາ ທາງຕາເວັນຕົກສຽງເໜືອຂອງປະເທດເຢເມນ ໃນປີ 2022 ເມື່ອເດັກຍິງເຄາະຮ້າຍຄົນນີ້ມີຊື່ວ່າ: ຣາວັນ ອາຍຸ 8 ປີ ຖືກບັງຄັບໃຫ້ແຕ່ງດອງ ແລະ ເສຍຊີວິດໃນຄືນແຕ່ງດອງຫລັງມີເພດສໍາພັນກັບເຈົ້າບ່າວ.
ນາງເສຍຊີວິດ ດ້ວຍອາການເລືອດອອກພາຍໃນ ໃນຄືນແຕ່ງດອງຂອງນາງ, ຫລັງຈາກແຕ່ງດອງກັບຜູ້ຊາຍທີ່ມີອາຍຸຫລາຍກວ່ານາງ 5 ເທົ່າ. ນັກເຄື່ອນໄຫວທາງສັງຄົມ ແລະ ຊາວທ້ອງຖິ່ນ 2 ຄົນ ກ່າວວ່າ: ກໍລະນີດັ່ງກ່າວເຮັດໃຫ້ເກີດການຖົກຖຽງກັນໃນສັງຄົມ ແລະ ໃນສື່ ກ່ຽວກັບເຈົ້າສາວເດັກນ້ອຍ.
ໂດຍນາງ ອາວາ ອໍມານ ຫົວໜ້າກຸ່ມ House of Folklore ຂອງເຢເມນ ແລະ ຜູ້ປຸກລະດົມດ້ານສິດທິຊັ້ນນໍາ ກ່າວວ່າ: ເດັກຍິງຄົນດັ່ງກ່າວ ເຊິ່ງລະບຸໄດ້ພຽງວ່າ: ຣາວັນ ໄດ້ແຕ່ງດອງກັບຊາຍອາຍຸ 40 ປີ ເມື່ອທ້າຍອາທິດຜ່ານມາຢູ່ເມືອງມີດິ ແຂວງຮັດຈາ ທາງຕາເວັນຕົກສຽງເໜືອຂອງເຢເມນ.
“ໃນຄືນແຕ່ງດອງ ແລະ ຫລັງມີເພດສໍາພັນ ນາງມີເລືອດອອກ ແລະ ມົດລູກແຕກ ເຊິ່ງເຮັດໃຫ້ນາງເສຍຊີວິດ” ນາງ ອໍມານ ກ່າວ. “ພວກເຂົາພານາງໄປຄລີນິກ ແຕ່ທີມແພດບໍ່ສາມາດຊ່ວຍຊີວິດນາງໄດ້”. ເຖິງຢ່າງໃດກໍຕາມ, ທາງເຈົ້າໜ້າທີ່ບໍ່ໄດ້ດໍາເນີນການໃດໆຕໍ່ຄອບຄົວຂອງເດັກຍິງ ຫລື ຜົວຂອງນາງ.
ຂະນະທີ່ເຈົ້າໜ້າທີ່ຄວາມໝັ້ນຄົງຢູ່ເມືອງຮາຣາດ ປະຕິເສດວ່າ: ເຫດການດັ່ງກ່າວເກີດຂຶ້ນ, ລາວບໍ່ຕ້ອງການໃຫ້ລະບຸຕົວຕົນ ເພາະລາວບໍ່ໄດ້ຮັບອະນຸຍາດໃຫ້ສໍາພາດຕໍ່ສື່ມວນຊົນ.
ໂດຍເຫດການນີ້ໄດ້ສ້າງບັນຫາຖົກຖຽງເລື່ອງການແຕ່ງດອງເດັກຂຶ້ນມາອີກ ເຊິ່ງຄອບຄົວທີ່ມີຖານະທຸກຍາກມັກບັງຄັບໃຫ້ລູກສາວແຕ່ງດອງແຕ່ອາຍຸຍັງນ້ອຍ ເພື່ອຫລຸດຄ່າໃຊ້ຈ່າຍ ແລະ ໄດ້ເງິນສິນສອດມາເພື່ອດໍາລົງຊີວິດ.
ລາຍງານຂອງ UN (United Nations) ຫລື ສະຫະປະຊາຊາດ ເຜີຍວ່າ: ປະຊາກອນ 10.5 ລ້ານຄົນຈາກທັງໝົດ 24 ລ້ານຄົນໃນເຢເມນ ປະສົບສະພາບຂາດເຂີນອາຫານ ແລະ ຈໍານວນ 13 ລ້ານຄົນບໍ່ມີນໍ້າສະອາດໃຊ້ ລວມທັງສຸຂະອະນາໄມຂັ້ນພື້ນຖານຢ່າງອື່ນນໍາ.
HRW (Human Rights Watch) ຮຽກຮ້ອງໃຫ້ເຢເມນຍົກເລີກການໃຫ້ເດັກຍິງອາຍຸຕໍ່າກວ່າ 18 ປີແຕ່ງດອງ ເນື່ອງຈາກການແຕ່ງດອງໃນໄວເດັກເກີນໄປສົ່ງຜົນກະທົບຕໍ່ການສຶກສາ ແລະ ສຸຂະພາບຂອງເດັກເອງ ແລະ ຍັງເປັນບັນຫາສິດທິມະນຸດ ແລະ ຄວາມເທົ່າທຽມທາງເພດມາຫລາຍສິບປີ.
