ອຸທາຫອນ ! ເດັກນ້ອຍ 1 ປີເສຍຊີວິດ ຫລັງຈາກຖືກພໍ່ລືມປະໄວ້ໃນລົດ
ເດັກນ້ອຍຜູ້ຊາຍອາຍຸ 1 ປີເສຍຊີວິດຢ່າງໜ້າເສົ້າໃຈ ເພາະຄວາມລະເຫລີງຂອງຜູ້ເປັນພໍ່ທີ່ລືມເດັກໄວ້ໃນລົດເປັນເວລາຫລາຍຊົ່ວໂມງທ່າມກາງອາກາດຮ້ອນ.
ໜ່ວຍຕໍາຫລວດເມືອງເຊນປີເຕີສເບີກ ລັດຟໍຣິດາ ຖະແຫລງຂ່າວກໍລະນີການເສຍຊີວິດຢ່າງໜ້າເສົ້າໃຈຂອງເດັກນ້ອຍຊາຍອາຍຸ 1 ປີ ທີ່ຖືກພໍ່ລືມປະໄວ້ຢູ່ເບາະຫລັງລົດ ເຊິ່ງຈອດປະໄວ້ເປັນເວລາຫລາຍຊົ່ວໂມງລະຫວ່າງທີ່ມີອາກາດຮ້ອນໃນວັນທີ 6 ພະຈິກ 2024.
ເຈົ້າໜ້າທີ່ພົບສົບຂອງເດັກນ້ອຍຢູ່ເບາະຫລັງຂອງລົດທີ່ຜູ້ເປັນພໍ່ຈອດປະໄວ້. ຝ່າຍຕໍາຫລວດໃຫ້ຂໍ້ມູນວ່າ: ພໍ່ຂອງເດັກຫາກໍຮູ້ຕົວວ່າລືມລູກປະໄວ້ໃນລົດ ເພາະລາວຂັບລົດໄປສູນຮັບຝາກລ້ຽງເດັກເພື່ອຮັບລູກ, ແຕ່ພະນັກງານແຈ້ງວ່າ: ລາວບໍ່ໄດ້ມາສົ່ງລູກໃນມື້ນັ້ນ.
ທ່ານ ໂຢແລນດາ ເຟີນັນເດ ໂຄສົກຕໍາຫລວດອະທິບາຍວ່າ: ພໍ່ຂອງເດັກເປັນຄົນເບິ່ງແຍງເດັກໃນຕອນເຊົ້າ ແລະ ພາເດັກໄປພົບໝໍ, ຈາກນັ້ນ ລາວຄວນພາລູກໄປສົ່ງຢູ່ສູນຮັບລ້ຽງເດັກກ່ອນຈະກັບເຮືອນ ເພື່ອເຮັດວຽກຕໍ່.
ແຕ່ເມື່ອເຖິງເວລາ 17:00 ໂມງ ຂອງມື້ເກີດເຫດ ພໍ່ຂອງເດັກຂັບລົດອອກຈາກເຮືອນໄປເພື່ອຮັບລູກຊາຍກັບເຮືອນຈາກສູນຮັບລ້ຽງເດັກເບຍຟຣອນ ເຮລ ໄຊລ໌, ແຕ່ເມື່ອລາວໄປຮອດ ພະນັກງານຢູ່ສູນພັດບອກວ່າ: ລາວບໍ່ໄດ້ພາລູກມາສົ່ງໃນວັນນັ້ນ.
ເຖິງໄລຍະນີ້ເອງພໍ່ຂອງເດັກເລີ່ມຄິດອອກ ລາວຟ້າວກັບໄປຫາລົດຂອງຕົນເອງ, ແຕ່ກໍຊ້າເກີນໄປ ເມື່ອທີມກູ້ຊີບສຸກເສີນມາເຖິງ ແລະ ພະຍາຍາມຊ່ວຍຊີວິດເດັກດ້ວຍການຜາຍປອດ ແລະ ປໍ້າຫົວໃຈ ແຕ່ເດັກໄດ້ເສຍຊີວິດແລ້ວ.
ທີມສືບສວນເຊື່ອວ່າເດັກຖືກຖິ້ມໄວ້ໃນລົດໝົດມື້ຢູ່ເບາະຫລັງ ລະຫວ່າງນີ້ທີມຊັນນະສູດກໍາລັງດໍາເນີນງານເພື່ອຫາສາເຫດທີ່ແທ້ຈິງ ແລະ ຍັງບໍ່ມີການຕັ້ງຂໍ້ຫາໃດໆຕໍ່ຜູ້ເປັນພໍ່.
“ພາຍໃນເວລາພຽງ 10 ນາທີ ອາກາດໃນລົດທີ່ອັດປະຕູທັງໝົດອາດຮ້ອນຂຶ້ນໄດ້ເຖິງ 20 ອົງສາ” ນາງ ລິນຊີ ຈູດາ ຫົວໜ້າກອງກູ້ໄພມອດໄພເຊນປີເຕີສເບີກ ອະທິບາຍ. ນອກຈາກນີ້ ຝ່າຍອຸຕຸນິຍົມວິທະຍາຂອງສະຖານີໂທລະພາບທ້ອງຖິ່ນລາຍງານວ່າ: ໃນມື້ເກີດເຫດນັ້ນ ອາກາດຮ້ອນອົບເອົ້າ ອຸນຫະພູມຂຶ້ນສູງເປັນປະຫວັດສາດປະມານ 32.7 ອົງສາ ເຊິ່ງຮ້ອນກວ່າຄ່າສະເລ່ຍທົ່ວໄປໃນໄລຍະເວລານີ້ຂອງປີປະມານ 10 ອົງສາ.
