ກາຕາຢຸດເປັນຄົນກາງເຈລະຈາຢຸດຍິງກາຊາ ກ່າວວ່າ ຈະຮັບໜ້າທີ່ອີກຖ້າອິດສະລາແອນ ແລະ ຮາມັດເຕັມໃຈຫາທາງຢຸດສົງຄາມ
ກະຊວງການຕ່າງປະເທດກາຕາ ເປີດເຜີຍໃນວັນທີ 9 ພະຈິກວ່າ: ແຈ້ງຝ່າຍຕ່າງໆກ່ຽວກັບການຕັດສິນຢຸດເປັນຄົນກາງເຈລະຈາຂໍ້ຕົກລົງຢຸດຍິງ ແລະ ການປ່ອຍຕົວປະກັນລະຫວ່າງອິດສະລາແອນ ແລະ ກຸ່ມຮາມັດ ໂດຍຈະກັບມາຮັບໜ້າທີ່ອີກ ຖ້າອິດສະລາແອນ ແລະ ຮາມັດສະແດງຄວາມເຕັມໃຈຈະເຈລະຈາເພື່ອຫາທາງຢຸດສົງຄາມ.
“ກາຕາແຈ້ງໃຫ້ຝ່າຍຕ່າງໆຮູ້ເມື່ອ 10 ວັນກ່ອນ ໃນລະຫວ່າງຄວາມພະຍາຍາມຄັ້ງສຸດທ້າຍເພື່ອບັນລຸຂໍ້ຕົກລົງ ໂດຍແຈ້ງວ່າຈະຢຸດຄວາມພະຍາຍາມໃນການເປັນຄົນກາງໄກ່ເກ່ຍລະຫວ່າງຮາມັດ ແລະ ອິດສະລາແອນ ຖ້າບໍ່ສາມາດບັນລຸຂໍ້ຕົກລົງໃນຮອບນັ້ນໄດ້ ໂດຍກາຕາຈະຮື້ຟື້ນຄວາມພະຍາຍາມເຫລົ່ານີ້ກັບປະເທດພັນທະມິດອີກ ເມື່ອຝ່າຍຕ່າງໆສະແດງຄວາມເຕັມໃຈ ແລະ ຈິງຈັງຈະຢຸດສົງຄາມອັນໂຫດຮ້າຍນີ້”.
ໄລຍະຫລາຍເດືອນຜ່ານມາ, ກາຕາຮ່ວມມືກັບອີຢິບ ແລະ ອາເມລິກາ ໃນຄວາມພະຍາຍາມເປັນຄົນກາງເຈລະຈາຂໍ້ຕົກລົງຢຸດຍິງ ແລະ ປ່ອຍຕົວປະກັນຢູ່ເຂດກາຊາ, ແຕ່ຍັງໄຮ້ຄວາມຄືບໜ້າ ເຊິ່ງໃນການເຈລະຈາຮອບຫລ້າສຸດໃນເດືອນຕຸລາ ກຸ່ມຮາມັດປະຕິເສດຂໍ້ສະເໜີຢຸດຍິງໄລຍະສັ້ນ, ຂະນະທີ່ຝ່າຍອິດສະລາແອນປະຕິເສດຂໍ້ສະເໜີໃຫ້ເພີ່ມໄລຍະເວລາໃນການຢຸດຍິງໃຫ້ດົນຂຶ້ນ.
ໂດຍການຖອນຕົວຂອງກາຕາອາດຍິ່ງສົ່ງຜົນເຮັດໃຫ້ຄວາມພະຍາຍາມໃນການບັນລຸຂໍ້ຕົກລົງມີຄວາມສັບຊ້ອນຂຶ້ນ.
ການຕັດສິນໃຈຖອນຕົວຂອງກາຕາເກີດຂຶ້ນຫລັງມີລາຍງານວ່າ: ເຈົ້າໜ້າທີ່ລະດັບສູງຂອງອາເມລິກາຈະບໍ່ຍອມຮັບຕົວແທນຂອງຮາມັດໃນກາຕາ ໂດຍກ່າວຫາວ່າກຸ່ມຮາມັດເປັນຝ່າຍປະຕິເສດຂໍ້ສະເໜີຫລ້າສຸດເພື່ອຢຸດສົງຄາມຢູ່ເຂດກາຊາ.
Reuters ອ້າງຄໍາກ່າວຂອງເຈົ້າໜ້າທີ່ອາເມລິກາວ່າ: ໃນໄລຍະ 2 ອາທິດຫລັງການເຈລະຈາຂໍ້ຕົກລົງໄລຍະເດືອນຕຸລາລົ້ມເຫລວ, ລັດຖະບານອາເມລິກາແຈ້ງຕໍ່ກາຕາວ່າ: ການມີຢູ່ຂອງກຸ່ມຮາມັດໃນນະຄອນຫລວງໂດຮາຈະບໍ່ເປັນທີ່ຍອມຮັບອີກຕໍ່ໄປ ແລະ ຂໍໃຫ້ກາຕາຂັບໄລ່ສໍານັກງານການເມືອງຂອງກຸ່ມຮາມັດອອກໄປຈາກໂດຮາ ເຊິ່ງລັດຖະບານກາຕາສົ່ງຂໍ້ຄວາມນີ້ໄປຫາກຸ່ມຮາມັດແລ້ວ, ແຕ່ກະຊວງການຕ່າງປະເທດກາຕາຢືນຢັນວ່າ: ລາຍງານດັ່ງກ່າວບໍ່ຖືກຕ້ອງ.
ເຖິງຢ່າງໃດກໍຕາມ, ຍັງບໍ່ມີການສະແດງທ່າທີຈາກກຸ່ມຮາມັດຕໍ່ທ່າທີຂອງກາຕາ ໂດຍ Reuters ລາຍງານຄໍາເວົ້າຂອງເຈົ້າໜ້າທີ່ຮາມັດ 3 ຄົນວ່າ: ລັດຖະບານກາຕາບໍ່ໄດ້ແຈ້ງຕໍ່ຮາມັດວ່າຜູ້ນໍາຂອງກຸ່ມນັ້ນບໍ່ເປັນທີ່ຕ້ອນຮັບໃນປະເທດອີກຕໍ່ໄປ.
ທັງນີ້, ກາຕາຕ້ອນຮັບຜູ້ນໍາທາງການເມືອງຂອງກຸ່ມຮາມັດມາແຕ່ປີ 2012 ໃນຍຸກລັດຖະບານ ໂອບາມາ ໂດຍເປັນສ່ວນໜຶ່ງຂອງຂໍ້ຕົກລົງກັບອາເມລິກາ ເຊິ່ງຕົວແທນຝ່າຍການເມືອງຂອງຮາມັດຈະໄດ້ຮັບການອໍານວຍຄວາມສະດວກໃນການເຈລະຈາ.
ອ້າງອີງ:
- https://www.bbc.com/news/articles/c774d4p2mx6o
- https://www.reuters.com/world/middle-east/qatar-pull-out-gaza-ceasefire-mediation-source-says-2024-11-09/
