ປີ 2030 ທົ່ວໂລກ ຈະມີຄົນເປັນພະຍາດເບົາຫວານເພີ່ມຂຶ້ນເປັນ 643 ລ້ານຄົນ ແລະ ຈະມີຄົນຕາຍຍ້ອນພະຍາດເບົາຫວານໃນທຸກໆ 6 ວິນາທີ/1ຄົນ

ທ່ານ ຄໍາປະສົງ ເສດຖາວັນໄຊ ຮອງອະທິການບໍດີ ມະຫາວິທະຍາໄລວິທະຍາສາດສຸຂະພາບ ມວສ ກ່າວ ໃນພິທີສະເຫຼີມສະຫຼອງວັນເບົາຫວານໂລກ ປະຈຳປີ 2024 ຂຶ້ນ ວັນທີ 8 ພະຈິກ 2024 ນີ້ວ່າ: ພະຍາດເບົາຫວານ ແມ່ນພະຍາດໜຶ່ງທີ່ເກີດມາຈາກການປັ່ນປ່ວນທາງດ້ານການເຜົາປ່ຽນທາດທີ່ບໍ່ສົມສ່ວນເຮັດໃຫ້ເກີດມີພາວະທາດນໍ້າຕານສູງຂຶ້ນໃນເລືອດ ກາຍເປັນພະຍາດເບົາຫວານ ດົນໄປກໍຈະເຮັດໃຫ້ເກີດການທໍາລາຍຫຼາຍອະໄວຍະວະຕ່າງໆ ໂດຍສະເພາະແມ່ນຫົວໃຈ-ເສັ້ນເລືອດ, ໄຂ່ຫຼັງ, ຕາ, ເສັ້ນປະສາດ ແລະ ອື່ນໆ. ການສະເຫລີມສະຫລອງວັນເບົາຫວານໂລກ ຊຶ່ງມີການປະຕິບັດກິດຈະກຳຕ່າງໆ ໂດຍແນໃສ່ໃຫ້ຄວາມຮູ້ກ່ຽວກັບການປ້ອງກັນພະຍາດເບົາຫວານ ການຊອກຮູ້ບັນຫາແຕ່ຫົວທີ ການດູແລປິ່ນປົວຄົນທີ່ເປັນພະຍາດເບົາຫວານ ແລະ ຄົນທີ່ເປັນພະຍາດເບົາຫວານ ຮ່ວມກັບພະຍາດອື່ນເຊັ່ນ: ພະຍາດຫົວໃຈເສັ້ນເລືອດ, ພະຍາດໄຂ່ຫຼັງຊຸດໂຊມ ແລະ ອື່ນໆ. ຈໍານວນຄົນທີ່ເປັນພະຍາດເບົາຫວານໄດ້ມີທ່າອ່ຽງນັບມື້ນັບສູງຂຶ້ນ ໂດຍສະເພາະແມ່ນຢູ່ໃນປະເທດກຳລັງພັດທະນາ ແລະ ປະເທດທີ່ພັດທະນາແລ້ວ ຊຶ່ງໄດ້ສົ່ງຜົນກະທົບອັນໃຫຍ່ຫຼວງຕໍ່ສຸຂະພາບເປັນໄພອັນຕະລາຍຕໍ່ຊີວິດ ແລະ ຊັບສິນຂອງຄົນໃນທົ່ວໂລກຈໍານວນບໍ່ໜ້ອຍ.

ປັດຈຸບັນທຸກໆ 11 ຄົນໃດຈະມີ 1 ຄົນເປັນເບົາຫວານ, ທຸກໆ 1 ວິນາທີຈະມີ 3 ຄົນຖືກບົ່ງມະຕິວ່າເປັນເບົາຫວານ ແລະ ທຸກໆ 6 ວິນາທີຈະມີຄົນຕາຍຍ້ອນພະຍາດເບົາຫວານ 1 ຄົນ. ປີ 2021, ຄາດຄະເນວ່າໃນເກນອາຍຸ 20-79 ປີມີຫຼາຍກວ່າ 6,7 ລ້ານຄົນມີການຕາຍທີ່ມີການພົວພັນກັບພະຍາດເບົາຫວານ. ປີ 2021, ໂຕເລກຄາດຄະເນຈະມີ 541 ລ້ານຄົນ ກຽມເປັນເບົາຫວານ, ຈະມີຄົນເປັນເບົາຫວານ 537 ລ້ານຄົນ, ຄ່າໃຊ້ຈ່າຍໂດຍກົງໃນການປິ່ນປົວເບົາຫວານເກືອບບັນລຸ 1,000 ຕື້ໂດລາ.

ໃນປີ 2030 ຄົນເປັນເບົາຫວານຈະເພີ່ມຂຶ້ນເປັນ 643 ລ້ານຄົນ ແລະ ຮອດປີ 2045 ຄົນເປັນເບົາຫວານຈະເພີ່ມຂຶ້ນເປັນ 783 ລ້ານຄົນ, ສໍາລັບຢູ່ປະເທດລາວ ແມ່ນປະເທດໜຶ່ງທີ່ໄດ້ຮັບຜົນກະທົບຈາກພະຍາດດັ່ງກ່າວ, ສະຖິຕິຄົນເປັນພະຍາດເບົາຫວານຢູ່ໃນປະເທດເຮົາ ມີທ່າອ່ຽງນັບມື້ນັບສູງຂຶ້ນເຊັ່ນດຽວກັນ.

ທີ່ມາ: ປະຊາຊົນ