ນິດສັນ ເລີກຈ້າງພະນັກງານ 9,000 ຄົນທົ່ວໂລກ CEO ຫລຸດຄ່າຕອບແທນຕົນເອງເຄິ່ງໜຶ່ງ

      ໜຶ່ງໃນຜູ້ຜະລິດລົດຍັກໃຫຍ່ຂອງໂລກຈາກຍີ່ປຸ່ນຜະເຊີນສະພາບຍອດຂາຍຕົກຕໍ່າ ຈາກການຕີຕະຫລາດຂອງລົດໄຟຟ້າ ຈົນຕ້ອງປະກາດເລີກຈ້າງພະນັກງານ 9,000 ຄົນທົ່ວໂລກ ແລະ ຜູ້ບໍລິຫານຕ້ອງຫລຸດລາຍໄດ້ຂອງຕົນເອງ.

       ບໍລິສັດນິດສັນ ມໍເຕີ ໜຶ່ງໃນຜູ້ຜະລິດລົດລາຍໃຫຍ່ອັນດັບສາມຂອງຍີ່ປຸ່ນ ອອກຖະແຫລງການ ຄາດຄະເນລາຍຮັບຈາກການດໍາເນີນງານລົງເຫລືອ 150,000 ລ້ານເຢນ ຈາກທີ່ເຄີຍຄາດຄະເນໄວ້ 500,000 ລ້ານເຢນ ສໍາລັບປີງົບປະມານປັດຈຸບັນ ເຊິ່ງຈະສິ້ນສຸດໃນເດືອນມີນາ 2025.

       ຂະນະທີ່ຄາດຄະເນຍອດຈໍາໜ່າຍສຸດທິຫລຸດລົງຈາກ 14 ພັນຕື້ເຢນ ລົງມາຢູ່ 12.7 ພັນຕື້ເຢນ ຕໍ່າກວ່ານັກວິເຄາະຄາດຄະເນໄວ້ກ່ອນໜ້ານີ້.

      ດ້ວຍເຫດນີ້, ນິດສັນປະກາດມາດຕະການຫລຸດຕົ້ນທຶນຂອງບໍລິສັດຫລາຍລາຍການ ລວມທັງການເລີກຈ້າງພະນັກງານທົ່ວໂລກ 9,000 ອັດຕາ, ຫລຸດກໍາລັງການຜະລິດທົ່ວໂລກລົງ 20%.

      ທ່ານ ມາໂກໂຕະ ອູຊິດະ ປະທານຄະນະເຈົ້າໜ້າທີ່ບໍລິຫານ (CEO) ຂອງນິດສັນ ແລະ ເຈົ້າໜ້າທີ່ລະດັບສູງອີກຫລາຍຄົນໃນຄະນະກໍາມະການບໍລິຫານ ສະໝັກໃຈຫລຸດຄ່າຕອບແທນຂອງຕົນເອງເຄິ່ງໜຶ່ງ ເລີ່ມແຕ່ເດືອນພະຈິກນີ້ເປັນຕົ້ນໄປ ໂດຍຍັງບໍ່ມີການລະບຸຊັດເຈນວ່າຈະມີຜົນເປັນໄລຍະເວລາເທົ່າໃດ.

       ສະຖານະການຂອງນິດສັນເປັນກໍລະນີຫລ້າສຸດຂອງຜູ້ຜະລິດລົດລາຍໃຫຍ່ໃນຍີ່ປຸ່ນ ເຊິ່ງກໍາລັງຜະເຊີນການແຂ່ງຂັນຢ່າງໜັກຈາກບັນດາບໍລິສັດຜະລິດລົດໄຟຟ້າ (EV) ຂອງຕ່າງປະເທດ ໂດຍສະເພາະເທສລາຂອງອາເມລິກາ ແລະ ບໍລິສັດລາຍໃຫຍ່ຈາກຈີນ ເຊັ່ນ BYD.