ອົດສະຕຣາລີສະເໜີແຜນ ຫ້າມເດັກອາຍຸຕໍ່າກວ່າ 16 ປີ ໃຊ້ໂຊຊຽວມີເດຍ
ນາຍົກລັດຖະມົນຕີ ແອນໂທນີ ອັລບາເນຊີ ຜູ້ນໍາອົດສະຕຣາລີ ເປີດເຜີຍວ່າ: ລັດຖະບານມີແຜນຈະອອກກົດໝາຍ ຫ້າມເດັກອາຍຸຕໍ່າກວ່າ 16 ປີ ໃຊ້ໂຊຊຽວມີເດຍ.
ກົດໝາຍຫ້າມເດັກອາຍຸຕໍ່າກວ່າ 16 ປີ ຈະຖືກນໍາສະເໜີຕໍ່ລັດຖະສະພາໃນປີນີ້ ແລະ ຈະມີຜົນບັງຄັບໃຊ້ໃນອີກ 12 ເດືອນ ພາຍຫລັງສະມາຊິກລັດຖະສະພາລົງມະຕິຮັບຮອງ ໂດຍຈະບໍ່ມີຂໍ້ຍົກເວັ້ນສໍາລັບເຍົາວະຊົນ ເຖິງວ່າພວກເຂົາຈະໄດ້ຮັບການຍິນຍອມຈາກຜູ້ປົກຄອງກໍຕາມ.
“ຄວາມຮັບຜິດຊອບຈະຕົກຢູ່ນໍາແພກຟອມໂຊຊຽວມີເດຍ ໃນການດໍານີນງານເພື່ອປ້ອງກັນການເຂົ້າເຖິງ ແລະ ຈະບໍ່ຕົກຢູ່ນໍາຜູ້ປົກຄອງ ຫລື ເຍົາວະຊົນ” ທ່ານ ອັລບາເນເຊີ ກ່າວ.
ນາງ ມິເຊລ ໂຣແລນ ລັດຖະມົນຕີກະຊວງການສື່ສານອົດສະຕຣາລີ ລະບຸວ່າ: ແພກຟອມທີ່ຈະໄດ້ຮັບຜົນກະທົບໄດ້ແກ່ ອິນສຕາແກມ, ເຟສບຸກ, ຕິກຕັອກ ແລະ ເອັກ. ຂະນະທີ່ຢູທູບອາດເຂົ້າຂ່າຍຢູ່ພາຍໃຕ້ກົດໝາຍນີ້ນໍາ.
ເຖິງຢ່າງໃດກໍຕາມ, ບໍລິສັດເຈົ້າຂອງແພກຟອມທັງ 4 ແຫ່ງ ບໍ່ໄດ້ຕອບກັບ ເພື່ອໃຫ້ຄວາມຄິດເຫັນກ່ຽວກັບບັນຫາດັ່ງກ່າວ.
ຫລາຍປະເທດເຊັ່ນ: ຝຣັ່ງ ແລະ ອາເມລິກາ ມີນະໂຍບາຍຄວບຄຸມການໃຊ້ໂຊຊຽວມີເດຍຂອງເດັກ ແລະ ເຍົາວະຊົນ. ຂະນະທີ່ຮ່າງກົດໝາຍຂອງອົດສະຕຣາລີເປັນໜຶ່ງໃນນະໂຍບາຍເຊິ່ງເຂັ້ມງວດທີ່ສຸດໃນປັດຈຸບັນ.
