ຟ້າຜ່າກາງສະໜາມເຕະບານລະຫວ່າງແຂ່ງ ເຮັດໃຫ້ນັກກິລາບາດເຈັບ 4 ຄົນ ເສຍຊີວິດ 1 ຄົນ
ນັກເຕະບານຊາວເປຣູເສຍຊີວິດແບບບໍ່ຄາດຄິດ ຂະນະລົງແຂ່ງຂັນໃນສະໜາມແລ້ວເກີດເຫດຟ້າຝ່າກາງສະໜາມເຕະບານ.
ເມື່ອນັກເຕະບານຊາວເປຣູເສຍຊີວິດກະທັນຫັນຈາກການຖືກຟ້າຜ່າກາງສະໜາມເຕະບານລະຫວ່າງການແຂ່ງຂັນໃນວັນທີ 3 ພະຈິກຜ່ານມາ. ນອກຈາກນີ້ ຍັງມີນັກເຕະບານໄດ້ຮັບບາດເຈັບອີກ 5 ຄົນ.
ເຫດການດັ່ງກ່າວເກີດຂຶ້ນໃນນາທີ 22 ຂອງການແຂ່ງຂັນລະຫວ່າງທີມທ້ອງຖິ່ນ 2 ທີມ ຄືທີມ ຮູເວນຕຸດ ເບວລາວິສຕາ ແລະ ຟາມິເລຍ ຊອກກາ.
ເຫດການຈາກວິດີໂອທີ່ມີການບັນທຶກໄວ້ລະຫວ່າງເກີດເຫດ ສະແດງໄລຍະເວລາທີ່ຜູ້ຫລິ້ນໃນສະໜາມກໍາລັງຍ່າງອອກຈາກສະໜາມກິລາໂກໂຕ ໂກໂຕ ເມືອງຮວນກາໂຢ ເຊິ່ງຢູ່ຫ່າງຈາກນະຄອນຫລວງລິມາ ຂອງປະເທດເປຣູ ໄປທາງຕາເວັນອອກສຽງໃຕ້ປະມານ 70 ກິໂລແມັດ ຫລັງຈາກທີ່ຜູ້ຕັດສິນສັ່ງຢຸດເກາະລະຫວ່າງທີ່ມີພາຍຸ ແລະ ສຽງຟ້າຮ້ອງດັງຂຶ້ນ ເມື່ອເວລາປະມານ 16:00 ໂມງ ຂອງວັນທີ 3 ພະຈິກ 2024.
ຫລັງຈາກນັ້ນພຽງວິນາທີ ຜູ້ຫລິ້ນໃນສະໜາມຫລາຍຄົນລົ້ມລົງໃນລັກສະນະຂວໍ້າໜ້າຂະນະທີ່ເກີດເຫດຟ້າຜ່າລົງມາໃນສະໜາມ. ສະຖານີໂທລະພາບທ້ອງຖິ່ນ ໂອນດາ ເດປໍຕິວາ ຮວນກາເວລິກ ລາຍງານວ່າ: ມີຜູ້ເຫັນປະກາຍໄຟ ແລະ ຄວັນໃກ້ກັບຜູ້ຫລິ້ນຄົນໜຶ່ງ.
ເມື່ອເວລາຜ່ານໄປບໍ່ເທົ່າໃດວິນາທີ ຜູ້ຫລິ້ນບາງຄົນສະແດງທ່າທາງວ່າ ເລີ່ມຮູ້ສຶກຕົວ ແລະ ພະຍາຍາມຈະລຸກຂຶ້ນມາຈາກພື້ນ, ແຕ່ມີນັກເຕະບານຜູ້ໂຊກຮ້າຍທີ່ເສຍຊີວິດ 1 ຄົນຊື່ວ່າທ້າວ ໂຮເຊ ອູໂກ ເດລາຄຣູ ຜູ້ຫລິ້ນຕໍາແໜ່ງກອງຫລັງອາຍຸ 39 ປີ.
ສ່ວນຜູ້ຫລິ້ນອີກຫລາຍຄົນໄດ້ຮັບບາດເຈັບ ໄດ້ແກ່ທ້າວ ຮວນ ຊອກກາ ຍຍັດຕາ ຜູ້ຮັກສາປະຕູອາຍຸ 40 ປີ ຖືກຟ້າຜ່າຈົນຜິວໜັງໄໝ້ທົ່ວຮ່າງກາຍ ລາວໄດ້ຮັບການນໍາສົ່ງໂຮງໝໍຢ່າງຮີບດ່ວນ. ນອກຈາກນີ້ ຍັງມີນັກເຕະບານລຸ້ນເຍົາວະຊົນອີກ 3 ຄົນ ອາຍຸ 16, 19 ແລະ 24 ປີ ໄດ້ຮັບບາດເຈັບ, ແຕ່ພາຍຫລັງເຂົ້າຮັບການປິ່ນປົວຢູ່ໂຮງໝໍແລ້ວ ອາການຂອງພວກເຂົາໄດ້ພົ້ນຂີດອັນຕະລາຍ.
ສ່ວນທ້າວ ເດລາຄຣູ ນັ້ນ ພາຍຫລັງສົ່ງໄປໂຮງໝໍ ທີມແພດໝໍໄດ້ປະກາດວ່າລາວເສຍຊີວິດແລ້ວ ໂດຍລາຍງານລະບຸວ່າລາວເສຍຊີວິດເກືອບຈະທັນທີທີ່ຖືກຟ້າຜ່າ.
ຕໍ່ມາມີລາຍງານຂ່າວວ່າລະຫວ່າງເກີດເຫດຟ້າຜ່ານັ້ນ ມີນັກກິລາຢ່າງໜ້ອຍ 8 ຄົນທີ່ລົ້ມລົງໃນສະໜາມ. ຂະນະທີ່ເກມການແຂ່ງຂັນເຊິ່ງສະໂມສອນຮູເວນຕຸດ ເບວລາວິສຕາ ກໍາລັງເປັນຝ່າຍນໍາດ້ວຍຄະແນນ 2-0 ຕ້ອງຍົກເລີກ.
