ອິດສະລາແອນໂຈມຕີ ສູນບັນຊາການຂ່າວຂອງກຸ່ມແຮັດໂບລາຢູ່ຊິຣີ

      ອິດສະລາແອນປະຕິບັດການທາງທະຫານຢູ່ຊິຣີ ເຊິ່ງສາມາດທໍາລາຍກອງບັນຊາການຂ່າວຂອງກຸ່ມແຮັດໂບລາ.

      ກອງທັບອິດສະລາແອນອອກຖະແຫລງການ ຢືນຢັນການໂຈມຕີທາງອາກາດຕໍ່ເປົ້າໝາຍຫລາຍແຫ່ງໃນນະຄອນຫລວງດາມັດກັດ ເມືອງຫລວຂອງຊິຣີ ໃນວັນທີ 4 ພະຈິກຜ່ານມາ ໂດຍເປົ້າໝາຍທີ່ມີການຖິ້ມລະເບີດທໍາລາຍນັ້ນ ກ່ຽວຂ້ອງກັບການເປັນສໍານັກງານໃຫຍ່ດ້ານຂ່າວຂອງກຸ່ມແຮັດໂບລາຢູ່ຊິຣີ.

       ກະຊວງການຕ່າງປະເທດຊິຣີອອກຖະແຫລງການ ປະນາມປະຕິບັດການທາງທະຫານດັ່ງກ່າວເປັນການລະເມີດອະທິປະໄຕ ແລະ ບູລະນະພາບແຫ່ງດິນແດນຂອງຊິຣີ. ອີກທັງຍັງເປັນການໂຈມຕີໂຄງລ່າງພື້ນຖານທີ່ຕັ້ງຢູ່ໃນເຂດທີ່ຢູ່ອາໄສຂອງປະຊາຊົນ, ແຕ່ບໍ່ມີການຢືນຢັນກ່ຽວກັບຂອບເຂດຄວາມເສຍຫາຍ.

       ຂະນະທີ່ອົງການສັງເກດການດ້ານສິດທິມະນຸດຊິຣີ (SOHR) ລາຍງານວ່າ: ການໂຈມຕີດັ່ງກ່າວຂອງກອງທັບອິດສະລາແອນເກີດຂຶ້ນຢູ່ເຂດເຊຢາດາ ໄຊນັບ ທາງພາກໃຕ້ຂອງນະຄອນຫລວງດາມັດກັດ ເຊິ່ງເປັນຖານທີ່ໝັ້ນຂອງກໍາລັງສະໜັບສະໜູນອີຣານຫລາຍກຸ່ມ. ເບື້ອງຕົ້ນພົບຜູ້ເສຍຊີວິດຢ່າງໜ້ອຍ 2 ຄົນ ທັງສອງເປັນສະມາຊິກຂອງກຸ່ມແຮັດໂບລາ.