ສິງກະໂປແອຣລາຍ ທຸ້ມງົບ 1,100 ລ້ານໂດລາສິງກະໂປ ປັບປຸງເຮືອບິນ 40 ກວ່າລໍາ

      ສິງກະໂປ ແອຣລາຍ (SIA) ປະກາດທຸ້ມງົບ 1,100 ລ້ານໂດລາສະຫະລັດສິງກະໂປ ເພື່ອປັບປຸງຫ້ອງໂດຍສານຂອງເຮືອບິນແອຣບັສ A350-900 ເພື່ອເພີ່ມປະສິດທິພາບດ້ານການແຂ່ງຂັນໃນຕະຫລາດການບິນລະດັບສູງທີ່ເຂັ້ມຂຸ້ນຂຶ້ນທຸກເວລາ.

      ສາຍການບິນແຫ່ງຊາດຂອງສິງກະໂປ ປະກາດປັບປຸງຫ້ອງໂດຍສານທັງໝົດໃນເຮືອບິນ A350-900 ໃນເຮືອບິນໄລຍະໄກ ແລະ ໄກພິເສດ (ultra long-range) ທັງໝົດ 41 ລໍາ ເປັນເງິນປະມານ 1,100 ລ້ານໂດລາສະຫະລັດສິງກະໂປ.

      ສິງກະໂປ ແອຣລາຍ ຈະເປີດຕົວຫ້ອງໂດຍສານຊັ້ນເຟິຣ໌ສຄາສສຸດຫລູ ໃນເຮືອບິນ A350-900 ໄລຍະໄກພິເສດ 7 ລໍາ ມີເປົ້າໝາຍເພື່ອສ້າງມາດຕະຖານໃໝ່ຂອງການບິນໃນເສັ້ນທາງບິນຍາວທີ່ສຸດໃນໂລກ ເພື່ອແຂ່ງຂັນກັບສາຍການບິນຈາກອ່າວເປີເຊຍ ໂດຍສະເພາະກາຕາ ແລະ ເອມິເຣດ.

      ກ່ອນໜ້ານີ້, SIA ຮັບມອບເຮືອບິນ A350-900 ຄັ້ງທໍາອິດໃນປີ 2016 ເປັຍເວລາ 1 ປີ ຫລັງກາຕາ ແອຣເວ ໄດ້ຮັບມອບໃນຖານະລູກຄ້າຄົນທໍາອິດ.

      ນອກຈາກຫ້ອງໂດຍສານຊັ້ນທຸລະກິດ ແລະ ເຟິຣ໌ສຄາສແລ້ວ, ຊັ້ນປະຢັດພຣີມ້ຽມ ແລະ ຊັ້ນປະຢັດ ຈະໄດ້ຮັບການປັບປຸງໃໝ່ເຊັ່ນກັນ.

      ທ່ານ ຊູກໍ ຢູຊູບ ຜູ້ສ້າງຕັ້ງບໍລິສັດວິໄຈການບິນຂອງສິງກະໂປ ອະທິບາຍວ່າ: ການລົງທຶນຄັ້ງນີ້ມີຈຸດປະສົງເພື່ອຮັກສາຄວາມໄດ້ປຽບຂອງ SIA ໂດຍສະເພາະໃນການເປັນຜູ້ນໍາສາຍການບິນລະດັບພຣີມ້ຽມ ການແຂ່ງຂັນກໍາລັງເຂັ້ມຂຸ້ນຈາກສາຍການບິນໃນອ່າວເປີເຊຍ ໂດຍສະເພາະກາຕາ ແອຣເວ ແລະ ເອມິເຣດ ແລະ ສ່ວນໜຶ່ງຈາກເຕີກິດ ແອຣລາຍ.

      ທັງນີ້, ເຮືອບິນທີ່ໄດ້ຮັບການປັບປຸງລໍາທໍາອິດ ຄາດວ່າຈະໄດ້ເລີ່ມໃຫ້ບໍລິການໄດ້ໃນໄຕມາດທີ 2 ຂອງປີ 22026 ແລະ ຄາດວ່າຈະສໍາເລັດໝົດໂຄງການພາຍໃນປີ 2030.