UN ເປັນຫ່ວງນັກຂ່າວຖືກສັງຫານເພີ່ມຂຶ້ນເກືອບ 40% ບໍ່ມີການດໍາເນີນຄະດີ
ອົງກອນການສຶກສາ, ວິທະຍາສາດ ແລະ ວັດທະນະທໍາແຫ່ງສະຫະປະຊາຊາດ (ອຸຍເນັສໂກ) ລາຍງານວ່າ: ການສັງຫານນັກຂ່າວທົ່ວໂລກລະຫວ່າງປີ 2022-2023 ເພີ່ມສູງເຖິງ 38% ເມື່ອທຽບໃສ່ສອງປີກ່ອນໜ້າ.
ຈໍານວນນັກຂ່າວທີ່ຖືກສັງຫານລະຫວ່າງປະຕິບັດໜ້າທີ່ເພີ່ມຂຶ້ນເຖິງ 162 ຄົນ ໃນໄລຍະເວລາດັ່ງກ່າວ. ຂະນະທີ່ນາງ ອໍເດຣ ອາຊູເລ ຜູ້ອໍານວຍການໃຫຍ່ຂອງອຸຍເນັສໂກ ລະບຸວ່າ: ປີ 2022-2023 ມີນັກຂ່າວຖືກສັງຫານທຸກໆ 4 ວັນ.
ສະຖິຕິຜູ້ສູນເສຍສູງສຸດມາຈາກພາກພື້ນອາເມລິກາລາຕິນ ແລະ ແຄລິບຽນ ເຊິ່ງມີ 61 ຄົນ, ສ່ວນພາກພື້ນອາເມລິກາເໜືອ ແລະ ເອີຣົບຕາເວັນຕົກ ມີຜູ້ເສຍຊີວິດໜ້ອຍທີ່ສຸດ 6 ຄົນ.
ທັງນີ້, ການເສຍຊີວິດຂອງນັກຂ່າວສ່ວນຫລາຍໃນປີ 2023 ເປັນການຖືກສັງຫານລະຫວ່າງລົງພື້ນທີ່ຂັດແຍ່ງ ໂດຍມີນັກຂ່າວເສຍຊີວິດ 44 ຄົນ ຫລື 59% ຂອງຈໍານວນທັງໝົດໃນປີນັ້ນ ແລະ ໃນໄລຍະ 2 ປີຜ່ານມາ ຜູ້ເສຍຊີວິດຄິດເປັນຜູ້ຍິງ 14 ຄົນ ຫລື 9% ແລະ ຢ່າງໜ້ອຍ 5 ຄົນ ມີອາຍຸຢູ່ໃນຊ່ວງລະຫວ່າງ 15-24 ປີ.
ລາຍງານຂອງອຸຍເນັສໂກລະບຸອີກວ່າ: ຈາກສະຖິຕິນັບແຕ່ປີ 2006 85% ຂອງຄະດີສັງຫານສື່ມວນຊົນທັງໝົດທີ່ອຸຍເນັສໂກຕິດຕາມບໍ່ໄດ້ຮັບການແກ້ໄຂ. ເຖິງຢ່າງໃດກໍດີ, ອັດຕາສ່ວນຂອງຄະດີໃນປີ 2018 ຢູ່ທີ່ 89% ເຊິ່ງມີທ່າອ່ຽງດີຂຶ້ນຈາກ 95% ໃນປີ 2012.
ນອກຈາກນັ້ນ, ອຸຍເນັສໂກໄດ້ຕິດຕໍ່ເພື່ອຂໍຮູ້ຄວາມຄືບໜ້າຂອງຄະດີສັງຫານນັກຂ່າວໃນ 75 ປະເທດ ປາກົດວ່າ 17 ປະເທດບໍ່ຕອບກັບ ແລະ ອີກ 9 ປະເທດຮັບຮູ້ຄໍາຮ້ອງ, ແຕ່ຍັງບໍ່ໄດ້ດໍາເນີນການເພີ່ມຕື່ມ.
ລາຍງານລະບຸວ່າ: ຄະດີຄາດຕະກໍານັກຂ່າວເຊິ່ງໄດ້ຮັບການແກ້ໄຂແລ້ວ 210 ຄະດີນັ້ນ ສ່ວນຫລາຍໃຊ້ເວລາດໍາເນີນໂດຍສະເລ່ຍ 4 ປີ.
ກອງປະຊຸມກ່ຽວກັບຄວາມປອດໄພຂອງສື່ມວນຊົນໃນພື້ນທີ່ສ່ຽງໄພ ເຊິ່ງຈັດໂດຍອຸຍເນັສໂກ ຈະມີຂຶ້ນໃນວັນທີ 6 ພະຈິກນີ້ ຢູ່ນະຄອນຫລວງແອດດິສອາບາບາ ປະເທດເອທິໂອເປຍ.
