ນອນແຄງເບື້ອງຊ້າຍ ຫລື ເບື້ອງຂວາດີກວ່າກັນ ?

      ຫລາຍຄົນສົງໄສວ່າ: ການນອນແຄງເບື້ອງຊາຍ ຫລື ເບື້ອງຂວາດີກວ່າກັນ ມື້ນີ້ເຮົາມີຄໍາຕອບມາບອກທຸກຄົນ… ແລະ ໃຜທີ່ຄວນນອນຫງາຍຈຶ່ງຈະດີທີ່ສຸດ.

      ສື່ຫວຽດນາມ VnExpress ອ້າງຄໍາເວົ້າຂອງທ່ານໝໍ ຫງຽນ ຮຸຍ ຮວາງ ທີ່ລະບຸວ່າ: ແຕ່ລະຄົນມີຄວາມຕ້ອງການ ແລະ ຄວາມມັກທີ່ແຕກຕ່າງກັນໃນການເລືອກທ່ານອນ ຕາບໃດທີ່ທ່ານອນນັ້ນເຮັດໃຫ້ຮູ້ສຶກສະບາຍ ແລະ ຊ່ວຍໃຫ້ນອນຫລັບໄດ້ດີ ກໍບໍຜິດທີ່ຈະນອນທ່ານັ້ນໆ.

ເຮົາຄວນນອນແຄງເບື້ອງຊ້າຍ ຫລື ເບື້ອງຂວາດີ ?

      ຕໍາແໜ່ງຂອງອະໄວຍະວະຕ່າງໆໃນຮ່າງກາຍຢູ່ບໍລິເວນທີ່ແຕກຕ່າງກັນ ຫົວໃຈຢູ່ເບື້ອງຊ້າຍ, ຕັບ ແລະ ກະເພາະອາຫານຢູ່ເບື້ອງຂວາ. ດັ່ງນັ້ນ ການນອນແຄງເບື້ອງຊ້າຍ ຈະຊ່ວຍໃຫ້ອາຫານໝູນວຽນຈາກຫລອດອາຫານລົງກະເພາະ ແລະ ລໍາໄສ້ໄດ້ດີຂຶ້ນ. ຜູ້ທີ່ເປັນພະຍາດກົດໄຫລຍ້ອນ ແລະ ການຍ່ອຍອາຫານບໍ່ດີ ຄວນນອນແຄງເບື້ອງຊ້າຍເພື່ອໃຫ້ຮູ້ສຶກສະບາຍ ເຮັດໃຫ້ອາການສະເອິ ຫລື ກົດໄຫລຢ້ອນດີຂຶ້ນ. ແມ່ຖືພາຄວນນອນແຄງເບື້ອງຊ້າຍ ເພາະຈະຊ່ວຍເພີ່ມການໄຫລວຽນຂອງເລືອດໄປຫາມົດລູກ ແລະ ລົກ ສົ່ງຜົນເຮັດໃຫ້ລູກໃນທ້ອງໄດ້ຮັບອົກຊີຢ່າງພຽງພໍ.

      ທ່ານໝໍ ຮວາງ ແນະນໍາວ່າ: ຜູ້ທີ່ເປັນພະຍາດຫົວໃຈຄວນນອນແຄງເບື້ອງຂວາເພື່ອຫລຸດແຮງກົດດັນຕໍ່ຫົວໃຈ ແລະ ຫລີກລ່ຽງການວາງແຂນໄວ້ກ້ອງຫົວເວລານອນ ເພາະເຮັດໃຫ້ການໄຫລວຽນຂອງເລືອດຫລຸດລົງ ສົ່ງຜົນເຮັດໃຫ້ຄຸນນະພາບການນອນຫລັບບໍ່ດີ.

ຄົນທີ່ຄວນນອນຫງາຍ

     3 ກຸ່ມຄົນທີ່ໄດ້ຮັບຄໍາແນະນໍາຈາກໝໍໃຫ້ນອນຫງາຍເພື່ອສຸຂະພາບທີ່ດີໄດ້ແກ່:

ຄົນທີ່ເປັນພະຍາດຫລອດເລືອດສະໝອງ

     ທ່ານ ດຣ. ເໝົາ ຈື້ສີ ຫົວໜ້າພາກວິຊາໄສຍະກໍາປະສາດຂອງຈີນ ກ່າວວ່າ: ທ່ານອນດີທີ່ສຸດ ເພື່ອປ້ອງກັນການເກີດລິ່ມເລືອດໃນສະໝອງ ຄືການນອນຫງາຍ.

      ການຕອນແຄງອາດເຮັດໃຫ້ລະບົບໄຫລວຽນຂອງເລືອດຜິດປົກກະຕິຮຸນແຮງຂຶ້ນ ໂດຍສະເພາະການໄຫລວຽນເລືອດຢູ່ຄໍຊ້າລົງ ເມື່ອເວລາຜ່ານໄປອາດສະສົມເປັນຄວາມເສຍຫາຍຕໍ່ເອັນໂດທີລຽມຂອງຫລອດເລືອດແດງ ເຮັດໃຫ້ເກີດລິ່ມເລືອດອຸດຕັນໄດ້ງ່າຍ ເພື່ອກໍາຈັດອັນຕະລາຍທີ່ອາດເກີດຂຶ້ນ ການນອນຫງາຍຖືວ່າເໝາະສົມທີ່ສຸດ.

ຜູ້ທີ່ມີອາການປວດກະດູກ ແລະ ຂໍ້

      ທ່ານ ຢວນ ເຟິງ ໝໍກະດູກ ແລະ ຂໍ້ ໂຮງໝໍຊຽງໄຮ້ ໂອຣຽນທັລ ກ່າວວ່າ: ຜູ້ທີ່ມັກມີອາການປວດກະດູກ ແລະ ຂໍ້ ຄວນນອນຫງາຍ ເນື່ອງຈາກພື້ນທີ່ຮັບນໍ້າໜັກຂອງຮ່າງກາຍມີຂະໜາດໃຫຍ່ທີ່ສຸດໃນທ່າຫງາຍ ຈຶ່ງບໍ່ງ່າຍຈະເຮັດໃຫ້ເກີດແຮງກົດສະເພາະທີ່.

ຜູ້ທີ່ເປັນພະຍາດໝອນຮອງກະດູກເຄື່ອນ

     ທ່ານ ດຣ. ຊືໄຕ ຮອງຫົວໜ້າພາກວິຊາອໍໂທປິດິກ ໂຮງໝໍໃນເຄືອມະຫາວິທະຍາໄລຢາງໂຈ ກ່າວວ່າ: ສໍາລັບຄົນເປັນພະຍາດໝອນຮອງກະດູກສັນຫລັງສ່ວນເອວ ການນອນຫງາຍສາມາດຫລຸດອາການບໍ່ສະບາຍກ່ຽວກັບເອວໄດ້ຢ່າງມີປະສິດທິພາບ ເມື່ອເຮົານອນຮາບ ຄໍສາມາດຮັກສາຄວາມໂຄ້ງທາງສະລິລະວິທະຍາໄດ້ ເອວສາມາດຢຶດເກາະຕຽງໄດ້ຢ່າງແໜ້ນໜາ ການໄຫລວຽນຂອງເລືອດບໍລິເວນແຂນຂາສ່ວນເທິງຈະລາບລື່ນ ບໍ່ຮູ້ສຶກຊາ ຫລື ເມື່ອຍ ການນອນຫລັບທ່າຫງາຍຈະເຮັດໃຫ້ໝອນຮອງເອວດີຂຶ້ນໃນໄລຍະຍາວ ອາການປວດຈະຄ່ອຍໆຫລຸດລົງ.

      ແຕ່ໃນຄວາມເປັນຈິງແລ້ວ ຄົນສ່ວນຫລາຍມັກຈະປ່ຽນທ່ານອນໄປເລື້ອຍໆໂດຍບໍ່ຮູ້ຕົວ ເຮົາຄວນເລືອກຕໍາແໜ່ງການນອນທີ່ສະບາຍ ແລະ ເຮົາພໍໃຈຫລາຍທີ່ສຸດ.

      ເພື່ອໃຫ້ນອນຫລັບໄດ້ດີຂຶ້ນ ບໍ່ຄວນດື່ມກາເຟ, ຊາ, ເຄື່ອງດື່ມແອລກໍຮໍ, ຢາສູບ ໃນຕອນແລງ ເພາະຈະເຮັດໃຫ້ເກີດຄວາມເຄັ່ງຕຶງທາງປະສາດຈົນນອນບໍ່ຫລັບ ເຮົາສາມາດອ່ານໜັງສື, ຟັງເພງ, ດື່ມນໍ້າອຸ່ນ, ຝຶກສະມາທິ, ໂຢຄະ ຫລື ຍ່າງເບົາໆ 1-2 ຊົ່ວໂມງກ່ອນເຂົ້ານອນ ເພື່ອເຮັດໃຫ້ນອນຫລັບສະບາຍຂຶ້ນ.