ໂຄສະນາຂາຍສິນຄ້າທາງອອນລາຍ ຕ້ອງໃສ່ໃຈຄຸນນະພາບ ແລະ ຖືກຕ້ອງກົດໝາຍ

ໂດຍ: ຜາຕຸງ

ທຸກມື້ນີ້ພໍແຕ່ເປີດເບິ່ງເຟສບຸກນຳໂທລະສັບ ກໍມັກເຫັນແຕ່ການໂຄສະນາຂາຍສິນຄ້າຕ່າງໆນາໆແຜ່ກະຈາຍຢ່າງຫຼວງຫຼາຍເຊິ່ງການໂຄສະນາຂາຍສິນຄ້າເຫຼົ່ານັ້ນມີທັງ ຍິງທັງຊາຍ ໂຄສະນາຊວນເຊື່ອໃຫ້ຮູ້ເຖິງຄຸນນະພາບຂອງສິນຄ້າ ພ້ອມດ້ວຍຄຳລົງທ້າຍດ້ວຍ ຈຣ່າ, ນະຈະ  ເມື່ອໄດ້ຟັງແລ້ວພາໃຫ້ຂົນຄີງລຸກ ຈັກເພິ່ນເອົາຄຳລົງທ້າຍນີ້ມາແຕ່ທາງໃດກໍບໍ່ຮູ້ ເມື່ອຟັງແລ້ວຈະວ່າແມ່ນສັບພາສາເວົ້າຂອງທ້ອງຖິ່ນລາວເບາະ ກໍບໍ່ແມ່ນອີກ ເພາະແຕ່ໃດໆມາຄົນລາວບໍ່ເຄີຍໃຊ້ ແລະ ບໍ່ນຳໃຊ້ອີກ.

ນັ້ນເວົ້າເລື່ອງຄຳລົງທ້າຍຂອງການໂຄສະນາສິນຄ້າ, ສ່ວນສິນຄ້າກໍມີຫຼາຍຢ່າງໃຫ້ຜູ້ເຂົ້າເບິ່ງສາມາດເລືອກຊື້ໄດ້ຕາມໃຈມັກ ນັບແຕ່ອາຫານການກິນ, ເຄື່ອງໃຊ້ຂອງສອຍ, ເຄື່ອງນຸ່ງຂອງຖື, ຜ້າຫົ່ມບ່ອນນອນ, ເຄື່ອດື່ມຊູກຳລັງ, ຢາປົວພະຍາດ ແລະ ສາລະພັດສິນຄ້າທີ່ພວກພໍ່ຄ້າ ແມ່ຄ້າ ນຳມາສະເໜີຜ່ານທາງເຟສບຸກ ສ້າງລາຍຮັບໃຫ້ຕົນເອງ ຈົນສາມາດ ຕັ້ງເນື້ອສ້າງໂຕ ຮັ່ງມີເປັນດີໄດ້ກໍມີມາກມີຫຼາຍຊຶ່ງບໍ່ມີພາກສ່ວນໃດສາມາດກວດສອບໄດ້.

ຢ່າງໃດກໍດີ ສິ່ງທີ່ຢາກເວົ້າ ອີກແນວໜຶ່ງກໍແມ່ນ ການໂຄສະນາຂາຍສິນຄ້າພັດບໍ່ຍອມບອກລາຄາ ສ່ວນຫຼາຍບອກວ່າ ແຊັດຫາ ທາງອິນບ໊ອກເດີລູກຄ້າ ຂາຍສິນຄ້າພັດຢ້ານຄົນຮູ້ລາຄານັ້ນໝາຍຄວາມວ່າແນວໃດ?, ບາງຄັ້ງການສັ່ງສິນຄ້າທາງອອນລາຍ ນອກຈາກເສຍເງິນຊື້ແລ້ວ ຍັງເສຍເວາລໍຖ້າອີກ ບາດໄດ້ສິນຄ້າແລ້ວພັດບໍ່ກົງກັບຜະລິດຕະພັນທີ່ໂຄສະນານັ້ນ ເຮັດໃຫ້ລູກຄ້າເສຍຄວາມຮູ້ສຶກນຳອີກເກີດບັນຫາໂຕ້ຖຽງກັນ ສຸດທ້າຍກາຍ ເປັນບັນຫາປະຫັດປະຫານກັນກໍມີ.

ອັັນທີ່ສຳຄັນບໍ່ຄວນເບິ່ງຂ້າມໃນເວລານີ້ ແມ່ນການໂຄສະນາປະເພດ ອາຫານເສີມ ແລະ ຢາປົວພະຍາດ ວ່າມີສັບພະຄຸນດີແນວນັ້ນແນວນີ້ ເຮັດໃຫ້ຫຼາຍຄົນຫຼົງເຊື່ອຍອມເສຍເງິນຊື້ມາກິນ, ກໍບໍ່ປະຕິເສດ ມີບາງຊະນິດກໍດີແທ້ ແຕ່ບາງຊະນິດເດຊິເປັນແນວໃດ ບໍ່ມີໃຜຮູ້ໄດ້ ວ່າສິນຄ້າເຫຼົ່ານີ້ ນຳເຂົ້າມາແບບຖືກ ຕ້ອງຕາມກົດໝາຍແທ້ບໍ ໄດ້ຜ່ານການກວດກາແລະຢັ້ງຢືນຈາກ ກົມອາຫານແລະຢາ (ກອຢ ) ກະຊວງສາທາລະນະສຸກແລ້ວບໍ, ຊຶ່ງບັນຫານີ້ເປັນສິ່ງສຳຄັນຫຼາຍຕໍ່ສຸຂະພາບຂອງຄົນເຮົາ ແລະ ມັນຮຽກຮ້ອງໃຫ້ເຈົ້າໜ້າທີ່ຈາກຂະແໜງການກ່ຽວຂ້ອງຕ້ອງເຊີດຊູບົດບາດໜ້າທີ່ວຽກງານຂອງຕົນໃຫ້ເຂັ້ມງວດ ແລະ ສັກສິດກວ່າເກົ່າ ເພື່ອປົກປ້ອງຜູ້ບໍລິໂພກ.

ຕາມຜູ້ຂຽນຄິດວ່າ ການກວດກາຄຸ້ມຄອງບັນຫາເຫຼົ່ານີ້ ຖ້າຈະເຮັດແທ້ທຳຈິງນັ້ນກໍພໍເຮັດໄດ້ ເພາະທີ່ມາຂອງບັນດາເຟສບຸກຢູ່ລາວເຮົາແມ່ນມີພາກສ່ວນຄຸ້ມຄອງຢູ່ແລ້ວ ກວດຫາບໍ່ຢາກພຽງແຕ່ທຸກພາກສ່ວນ ທີ່ກ່ຽວຂ້ອງທັງຂັ້ນສູນກາງ ແລະ ທ້ອງຖິ່ນຫັນມາຮ່ວມມືກັນຫຼາຍຂຶ້ນກໍສາມາດກວດກາໄດ້ ຄວບຄຸມໄດ້ ນອກຈາກສົ່ງຜົນດີຕໍ່ຜູ້ບໍລິໂພກໃຫ້ໄດ້ຊົມໃຊ້ຜະລິດຕະພັນທີ່ມີຄຸນນະພາບ ສະອາດ ປອດໄພແລ້ວ ຍັງຈະຊ່ວຍໃຫ້ການເກັບພາສີລາຍໄດ້ຈາກການຂາຍສິນຄ້ຜ່ານສື່ສັງຄົມອອນລາຍ ໄດ້ດີນຳອີກ ຊຶ່ງເປັນການປະກອບສ່ວນຊ່ວຍພັດທະນາເສດຖະກິດແຫ່ງຊາດໃຫ້ຂະຫຍາຍຕົວດີຂຶ້ນ.