ອາເມລິກາລາຍງານພົບໄຂ້ຫວັດສັດປີກໃນໝູເປັນຄັ້ງທໍາອິດ
ໝູໂຕນຶ່ງຢູ່ລັດອໍຣິກອນ ມີຜົນກວດເຊື້ອໄວຣັສໄຂ້ຫວັດສັດປີກສາຍພັນ H5N1 ເປັນບວກ ເຊິ່ງຖືເປັນກໍລະນີທໍາອິດທີ່ເກີດຂຶ້ນຢູ່ອາເມລິກາ.
ກະຊວງກະສິກໍາອາເມລິກາ (USDA) ລະບຸວ່າ: ໝູໂຕດັ່ງກ່າວພົບວ່າຕິດເຊື້ອໃນວັນທີ 29 ຕຸລາຜ່ານມາ ພຽງ 4 ວັນພາຍຫລັງສັດປີກໃນຟາມແຫ່ງດຽວກັນມີຜົນກວດເປັນບວກ.
ຟາມແຫ່ງນີ້ບໍ່ໄດ້ດໍາເນີນງານທາງການຄ້າ ແລະ ສັດທຸກໂຕບໍ່ໄດ້ມີຈຸດປະສົງເພື່ອການຈັດຫາອາຫານທາງການຄ້າ ສົ່ງຜົນເຮັດໃຫ້ບໍ່ມີຄວາມກັງວົນໃດໆກ່ຽວກັບຄວາມປອດໄພຂອງອຸປະທານຊີ້ນໝູຂອງປະເທດ. USDA ລະບຸໃນຖະແຫລງການ.
ເຈົ້າໜ້າທີ່ກະຊວງກະສິກໍາອາເມລິກາ ກ່າວວ່າ: ທາງການໄດ້ດໍາເນີນຂ້າໝູທີ່ຕິດເຊື້ອ ລວມທັງໝູອີກ 4 ໂຕທີ່ຢູ່ໃນຟາມ ເພື່ອອໍານວຍຄວາມສະດວກໃນການວິເຄາະບົ່ງມະຕິເພີ່ມຕື່ມ.
ການກວດພົບເຊື້ອໄວຣັສໄຂ້ຫວັດສັດປີກໃນໝູ ເຮັດໃຫ້ຟາມແຫ່ງນີ້ຖືກກັກກັນ ເພື່ອປ້ອງກັນການແຜ່ລະບາດຂອງເຊື້ອໄວຣັສ. ອີກທັງສັດຊະນິດອື່ນໆໃນຟາມ ບໍ່ວ່າຈະເປັນແກະ ແລະ ແບ້ ຕ່າງຢູ່ພາຍໃຕ້ການເຝົ້າລະວັງ.
ທັງນີ້, ບັນດາຜູ້ຊ່ຽວຊານດ້ານສາທາລະນະສຸກ ສະແດງຄວາມກັງວົນກ່ຽວກັບຈໍານວນສັດລ້ຽງລູກດ້ວຍນົມທີ່ຕິດເຊື້ອໄວຣັສໄຂ້ຫວັດສັດປີກເພີ່ມຂຶ້ນ ໂດຍຢ້ານວ່າການແຜ່ລະບາດທີ່ເພີ່ມຂຶ້ນອາດເຮັດໃຫ້ໄວຣັສເກີດການກາຍພັນ ເປັນຮູບແບບທີ່ສາມາດຕິດຕໍ່ສູ່ມະນຸດໄດ້.
ເຖິງຢ່າງໃດກໍຕາມ, USDA ລະບຸວ່າ: ການສຸ່ມກວດຕົວຢ່າງທາງພັນທຸກໍາຈາກສັດປີກທີ່ຕິດເຊື້ອໃນຟາມຂອງລັດອໍຣິກອນ ບໍ່ພົບການປ່ຽນແປງໃດໆຂອງເຊື້ອໄວຣັສໄຂ້ຫວັດສັດປີກສາຍພັນ H5N1 ທີ່ອາດບົ່ງຊີ້ວ່າ: ສາມາດແຜ່ກະຈາຍສູ່ມະນຸດໄດ້ເພີ່ມຂຶ້ນ.
