ອີຣານເລັ່ງເພີ່ມງົບປະມານກອງທັບ 3 ເທົ່າ ທ່າມກາງຄວາມເຄັ່ງຕຶງກັບອິດສະລາແອນ
ລັດຖະບານອີຣານສະເໜີເພີ່ມການໃຊ້ຈ່າຍທາງທະຫານເປັນ 3 ເທົ່າ. ຂະນະທີ່ຄວາມເຄັ່ງຕຶງກັບອິດສະລາແອນເພີ່ມຂຶ້ນ ຫລັງເກີດເຫດການໂຈມຕີຕອບໂຕ້ດ້ວຍລູກສອນໄຟຂອງທັງສອງຝ່າຍເມື່ອບໍ່ດົນມານີ້.
ນາງ ຟາຕາເມ ໂມຮາເຈຣານີ ໂຄສົກຂອງລັດຖະບານອີຣານ ສະຫລຸບການດໍາເນີນງານທີ່ຈະເຮັດໃຫ້ງົບປະມານດ້ານການທະຫານຂອງປະເທດເພີ່ມຂຶ້ນຫລາຍກວ່າ 200% ໃນການຖະແຫລງຂ່າວຢູ່ນະຄອນຫລວງເຕຫະຣານ ໂດຍບໍ່ໃຫ້ລາຍລະອຽດ.
ເຖິງວ່າລັດຖະບານເຕຫະຣານບໍ່ໄດ້ເປີດເຜີຍຕົວເລກທີ່ແນ່ນອນ, ແຕ່ສະຖາບັນວິໄຈສັນຕິພາບນາໆຊາດສະຕອກໂຮມ (SIPRI) ລະບຸວ່າ: ການໃຊ້ຈ່າຍທາງທະຫານຂອງອີຣານໃນປີ 2026 ຢູ່ປະມານ 10,300 ລ້ານໂດລາສະຫະລັດ.
ແຜນເພີ່ມງົບປະມານດັ່ງກ່າວມີຂຶ້ນພຽງບໍ່ເທົ່າໃດວັນ ພາຍຫລັງອິດສະລາແອນປະຕິບັດການໂຈມຕີທາງອາກາດຕໍ່ຖານທັບຫລາຍແຫ່ງຢູ່ອີຣານ ເພື່ອຕອບໂຕ້ການໂຈມຕີຂອງລັດຖະບານເຕຫະຣານ ໃນວັນທີ 1 ຕຸລາຜ່ານມາ ເຊິ່ງໃນມື້ນັ້ນ ອີຣານໂຈມຕີໃສ່ອິດສະລາແອນເພື່ອເປັນການເອົາຄືນຈາກການສັງຫານບັນດາຜູ້ນໍາຂອງກຸ່ມແຮັດໂບລາ ແລະ ຜູ້ບັນຊາການກອງກໍາລັງພິທັກປະຕິວັດອີຣານ (IRGC).
ຕາມລາຍງານຂອງສໍານັກຂ່າວແຫ່ງຊາດອີຣານ (IRNA) IRGC ໄດ້ຮັບການຈັດສັນງົບປະມານທາງທະຫານຂອງອີຣານໃນອັດຕາຫລາຍທີ່ສຸດ. ຂະນະທີ່ກອງທັບປະຈໍາການ ແລະ ກອງກໍາລັງຕິດອາວຸດໜ່ວຍອື່ນໆຂອງປະເທດ ໄດ້ຮັບການຈັດສັນງົບປະມານໜ້ອຍກວ່າ.
