ຊ່າງຖ່າຍຮູບສາວເສຍຊີວິດ ຍ້ອນຖ່າຍຮູບແລ້ວຖອຍຫລັງເຂົ້າຫາໃບພັດເຮືອບິນ
ຊ່າງຖ່າຍຮູບສາວຊາວອາເມລິກາຈົດຈໍ່ຕໍ່ການຖ່າຍຮູບຈົນບໍ່ທັນລະວັງຕົວ ຍ່າງຖອຍຫລັງເຂົ້າໃກ້ເຮືອບິນ ແລະ ໃບພັດທີ່ກໍາລັງໝູນຢູ່ຈົນປະສົບອຸບັດຕິເຫດເສຍຊີວິດ.
ວັນທີ 29 ຕຸລາ 2024, ສໍານັກຂ່າວຕ່າງປະເທດລາຍງານຂ່າວກໍລະນີຊ່າງຖ່າຍຮູບສາວຊາວອາເມລິກາເສຍຊີວິດລະຫວ່າງພະຍາຍາມຖ່າຍຮູບ, ແຕ່ກ້າວຖອຍຫລັງໄປຫາເຮືອບິນທີ່ກໍາລັງຕິດຈັກຢູ່ຈົນເຮັດໃຫ້ເກີດອຸບັດຕິເຫດຂຶ້ນ.
ເຫດການທີ່ໜ້າເສົ້ານີ້ເກີດຂຶ້ນໃນວັນທີ 26 ຕຸລາຜ່ານມາ. ນາງ ອາແມນດາ ກັດລາເກີ ຊ່າງຖ່າຍຮູບ ອາຍຸ 37 ປີ ຈາກແຄນຊັສ ປະສົບອຸບັດຕິເຫດເພາະຄວາມບໍ່ລະວັງໃນລະຫວ່າງທີ່ນາງພະຍາຍາມຖ່າຍຮູບທີມນັກໂດດຈ້ອງທີ່ກໍາລັງຈະຂຶ້ນເຮືອບິນຢູ່ສະໜາມບິນຄຸກໃນລັດແຄນຊັສ.
ລາຍງານຂ່າວລະບຸວ່າ: ໃນມື້ເກີດເຫດ, ນາງ ກັດລາເກີ ຕິດຕາມຖ່າຍຮູບຂອງເຮືອບິນທີ່ບິນເຂົ້າ-ອອກໃນບໍລິເວນນັ້ນ, ຂະນະທີ່ນາງກໍາລັງຖ່າຍຮູບໆໜຶ່ງ ນາງບັງເອີນຍ່າງຖອຍຫລັງເຂົ້າໄປຫາໃບພັດເຮືອບິນເຊສນາ 182 ທີ່ກໍາລັງໝູນ ເນື່ອງຈາກເຮືອບິນລໍານັ້ນຍັງບໍ່ໄດ້ມອດເຄື່ອງຈັກ ເຮັດໃຫ້ນາງໄດ້ຮັບບາດເຈັບສາຫັດ.
ໜ່ວຍກູ້ໄພສຸກເສີນມາເຖິງຈຸດເກີດເຫດເວລາ 15:00 ໂມງ ຫລັງຈາກໄດ້ຮັບແຈ້ງເຫດບໍ່ດົນ ແລະ ນໍາເອົານາງ ກັດລາເກີ ໄປສົ່ງໂຮງໝໍຢ່າງຮີບດ່ວນ ແຕ່ນາງໄດ້ເສຍຊີວິດໃນເວລາຕໍ່ມາ.
ໝໍທີ່ເຫັນເຫດການກ່າວວ່າ: ຢູ່ໆ ນາງ ກັດລາເກີ ທີ່ກໍາລັງຖ່າຍຮູບໄດ້ຍ່າງຖອຍຫລັງໄປຫາເຮືອບິນທີ່ກໍາລັງຕິດຈັກຢູ່ ເຊິ່ງເປັນການລະເມີດກົດການຮັກສາຄວາມປອດໄພຂັ້ນພື້ນຖານ.
ອົງການບໍລິຫານການບິນແຫ່ງຊາດ ແລະ ຄະນະກໍາມະການຄວາມປອດໄພການຂົນສົ່ງແຫ່ງຊາດກໍາລັງດໍາເນີນການສືບສວນອຸບັດຕິເຫດທີ່ເກີດຂຶ້ນໃນຄັ້ງນີ້, ສ່ວນຄອບຄົວ ແລະ ໝູ່ເພື່ອນຂອງນາງ ໄດ້ສ້າງເພຈໃນເວັບໄຊໂກຟັນມີເພື່ອຂໍຮັບບໍລິຈາກເງິນຄ່າໃຊ້ຈ່າຍໃນການຈັດພິທີສົບຂອງນາງ ກັດລາເກີ.
