ສານປະຊາຊົນນະຄອນຫລວງຕັດສີນລົງໂທດຄູ່ຜົວ-ເມຍຊາວຕ່າງຊາດໃນຂໍ້ຫາລັກຊັບພົນລະເມືອງ
ເມື່ອບໍ່ດົດນມານີ້, ສານປະຊາຊົນນະຄອນຫລວງວຽງຈັນ, ໄດ້ຕັດສີນລົງໂທດ ທ້າວ ເມໂກ້ ອາຍຸ 50 ປີສັນຊາດເປຣູ ຈໍາຄຸກເປັນເວລາ 3 ປີ, ພ້ອມປັບໄໝ 3 ລ້ານກີບ ແລະ ຕັດສີນລົງໂທດນາງ ມາເລຍຊີຕິນ້າກິດ ອາຍຸ 50 ປີ (ຜູ້ເປັນເມຍ) ສັນຊາດເປຣູເຊັ່ນກັນ ໃຫ້ຈໍາຄຸກເປັນເວລາ 1 ປີ 9 ເດືອນ, ພ້ອມປັບໄໝ 1,5 ລ້ານກີບ, ໃນຂໍ້ຫາລັກຊັບພົນລະເມືອງ.
ຄະດີມີຢູ່ວ່າ: ໃນຕົ້ນເດືອນພະຈິກ 2016, ທ້າວ ສຸກສາຄອນ (ຜູ້ເສຍຫາຍ) ຢູ່ບ້ານສີບຸນເຮືອງເມືອງຈັນທະບູລີນະຄອນຫລວງວຽງຈັນ, ໄດ້ເອົາເງິນ 116 ລ້ານກວ່າກີບ, ໄປແລກເອົາເງິນບາດ (ສະກຸນເງິນໄທ) ຢູ່ຮ້ານແລກປ່ຽນເງິນແຫ່ງໜຶ່ງເຂດບ້ານຫັດສະດີເມືອງຈັນທະບູລີ, ໃນຂະນະນັ້ນຈຳເລີຍທັງສອງ ແລະ ໝູ່ອີກສອງຄົນຊື່ທ້າວ ເດຍ ແລະ ທ້າວ ອາລີ ໄດ້ຕິດຕາມການເຄື່ອນໄຫວຂອງທ້າວສຸກສາຄອນ, ຈາກນັ້ນທ້າວ ເມໂກ້ ໄດ້ນຳເອົາເຫລັກແຫລມໄປວາງໃສ່ຕີນລົດໃຫຍ່ຂອງທ້າວສຸກສາຄອນ ແລະ ພາຍຫລັງປ່ຽນເງິນແລ້ວທ້າວສຸກສາຄອນກໍໄດ້ເອົາຫໍ່ເງິນວາງໄວ້ເບາະດ້ານຫລັງລົດແລ້ວຂັບອອກໄປ, ພໍມາຮອດເສັ້ນທາງເຂດບ້ານສີບຸນເຮືອງຕີນລົດໄດ້ຮົ່ວ ແລະ ໃນຂະນະລົງໄປເບິ່ງຊ່າງປ່ຽນຢາງລົດນັ້ນ, ທ້າວ ເມໂກ້ ໄດ້ເຂົ້າໄປໄຂປະຕູລົດແລ້ວລັກເອົາເງິນດັ່ງກ່າວຫລົບໜີໄປ ແລະ ອີກປະມານສອງອາທິດຕໍ່ມາທ້າວ ເມໂກ້ ແລະ ນາງ ມາເຣຍ ກໍຖືກເຈົ້າໜ້າທີ່ຈັບຕົວໄດ້ໃນຫ້ອງເຊົາຢູ່ເຂດບ້ານຫາຍໂສກເມືອງຈັນທະບູລີ ແລະ ຖືກດຳເນີນຄະດີຕາມລະບຽບກົດໝາຍດັ່ງກ່າວ.
