ອົດສະຕຣາລີ ມອບເຄື່ອງຊ່ວຍເຫລືອດ້ານມະນຸດສະທຳ ມູນຄ່າ 3.2 ຕື້ກີບ ເພື່ອຕອບໂຕ້ເຫດການສຸກເສີນໃນ ສປປ ລາວ
ວັນທີ 29 ຕຸລາ 2024 ທີ່ສະໜາມບິນວັດໄຕ ກອງທັບປ້ອງກັນຊາດຂອງອົດສະຕຣາລີ ໄດ້ນຳສົ່ງເຄື່ອງຊ່ວຍເຫລືອດ້ານມະນຸດສະທຳ ມາມອບໃຫ້ແກ່ ສປປ ລາວ ເພີ່ມຕື່ມ ມູນຄ່າ 3.2 ຕື້ກີບ, ມອບໂດຍທ່ານນາງ ເມແກັນ ຈອນສ ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ມອບໃຫ້ ກະຊວງແຮງງານ ແລະ ສະຫວັດດີການສັງຄົມ ຕາງໜ້າຮັບໂດຍ ທ່ານ ລີປາວ ຢ່າງ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.
ການມອບເຄື່ອງຊ່ວຍເຫລືອຕອບໂຕ້ໄພພິບັດໃຫ້ແກ່ ສປປ ລາວ ຄັ້ງນີ້ແມ່ນຄັ້ງທີສອງຂອງປີ 2024 ໂດຍການສະໜັບສະໜູນຢ່າງຕໍ່ເນື່ອງຈາກລັດຖະບານອົດສະຕຣາລີ. ການນຳສົ່ງເຄື່ອງຊ່ວຍເຫຼືອນີ້ແມ່ນສ່ວນ ໜຶ່ງຂອງກິດຈະກຳຮ່ວມມືດ້ານວຽກງານປ້ອງກັນຊາດ ເຊິ່ງນຳພາໂດຍກອງທັບປ້ອງກັນຊາດຂອງອົດສະຕຣາລີ ເພື່ອຍົກສູງການຮ່ວມມືວຽກງານປ້ອງກັນຊາດຮ່ວມກັບບັນດາປະເທດອື່ນໆໃນພາກພື້ນ ລວມທັງ ສປປ ລາວ.
ທ່ານນາງ ເມແກັນ ຈອນສ, ເອກອັກຄະລັດຖະທູດອົດສະຕຣາລີ, ໄດ້ເນັ້ນໜັກເຖິງຄວາມສຳຄັນຂອງການກຽມຄວາມພ້ອມ ໂດຍກ່າວວ່າ: “ອົດສະຕຣາລີພູມໃຈທີ່ຈະສືບຕໍ່ການຮ່ວມມືອັນເຂັ້ມແຂງຂອງພວກເຮົາກັບລັດຖະບານ ສປປ ລາວ ໃນການກຽມຄວາມພ້ອມເພື່ອຮັບມືກັບໄພພິບັດ ແລະ ເຫດການສຸກເສີນ. ເຄື່ອງຊ່ວຍເຫລືອດ້ານມະນຸດສະທຳແມ່ນມີຄວາມສຳຄັນຫລາຍ ເພື່ອຮັບປະກັນວ່າການຊ່ວຍເຫລືອຈະໄປຮອດຄອບຄົວທີ່ມີຄວາມຈຳເປັນໄດ້ຢ່າງວ່ອງໄວ ໃນເວລາເກີດມີໄພພິບັດ. ການຮ່ວມມືໂດຍຜ່ານບັນດາກິດຈະກຳວຽກງານປ້ອງກັນຊາດ ໄດ້ເນັ້ນໃຫ້ເຫັນເຖິງຄວາມສຳຄັນຂອງການກຽມຄວາມພ້ອມ ແລະ ຄວາມສາມາດໃນການຟື້ນຟູຄືນສູ່ສະພາບປົກກະຕິຢູ່ໃນພາກພື້ນນີ້.”
ເຄື່ອງຊ່ວຍເຫລືອດັ່ງກ່າວມີມູນຄ່າ 224,000 ໂດລາອົດສະຕຣາລີ (3.2 ຕື້ກີບ) ເຊິ່ງລວມມີເຄື່ອງຊ່ວຍເຫລືອທີ່ສຳຄັນເຊັ່ນ: ຊຸດອຸປະກອນສຸຂະອະນາໄມ 468 ຊຸດ, ຊຸດເຄື່ອງຄົວ 2,016 ຊຸດ, ຜ້າຫົ່ມ 3,400 ຜືນ, ມຸ້ງ 3,200 ດາງ, ແລະ ສາດຢາງ 2,250 ຜືນ, ເຊິ່ງຄາດວ່າຈະສາມາດຊ່ວຍເຫລືອໄດ້ຫລາຍກວ່າ 3,000 ຄອບຄົວ ທີ່ໄດ້ຮັບຜົນກະທົບຈາກໄພທຳມະຊາດ ຫລື ເຫດການສຸກເສີນ.
ທ່ານ ລີປາວ ຢ່າງ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ສະແດງຄວາມຂອບໃຈຕໍ່ການສະໜັບສະໜູນຢ່າງຕໍ່ເນື່ອງຂອງອົດສະຕຣາລີ. “ການຊ່ວຍເຫລືອທີ່ທັນເວລາຂອງອົດສະຕຣາລີໂດຍຜ່ານການນຳສົ່ງເຄື່ອງຊ່ວຍເຫລືອດ້ານມະນຸດສະທຳແມ່ນມີຄວາມສຳຄັນຫລາຍ ໃນການເສີມສ້າງຂີດຄວາມສາມາດໃຫ້ແກ່ ສປປ ລາວ ໃນການຮັບມືກັບໄພທຳມະຊາດ ຫລື ເຫດການສຸກເສີນໄດ້ຢ່າງວ່ອງໄວ. ເຄື່ອງຊ່ວຍເຫລືອເຫລົ່ານີ້ມີບົດບາດສຳຄັນໃນການປົກປ້ອງ ແລະ ຊ່ວຍເຫລືອຄອບຄົວຄົນລາວໃນໄລຍະວິກິດ ແລະ ພວກເຮົາຮູ້ສຶກຂອບໃຈເປັນຢ່າງຍິ່ງຕໍ່ການຮ່ວມມືຢ່າງຕໍ່ເນື່ອງຂອງອົດສະຕຣາລີໃນວຽກງານທີ່ສຳຄັນນີ້.”
ອົດສະຕຣາລີຍັງຄົງສືບຕໍ່ມຸ່ງໝັ້ນທີ່ຈະສະໜັບສະໜູນວຽກງານຂອງລັດຖະບານ ສປປ ລາວ ໃນການກຽມຄວາມພ້ອມເພື່ອຮັບມືກັບໄພພິບັດ ເພື່ອຮັບປະກັນການຕອບໂຕ້ສຸກເສີນທີ່ວ່ອງໄວ ແລະ ມີປະສິດຕິພາບ ເມື່ອເກີດເຫດການສຸກເສີນ.
ໃນປີ 2024 ອົດສະຕຣາລີໄດ້ສົ່ງມອບເຄື່ອງຊ່ວຍເຫລືອດ້ານມະນຸດສະທຳ ໃຫ້ແກ່ ສປປ ລາວ ລວມເປັນມູນຄ່າທັງໝົດ 319,000 ໂດລາອົດສະຕຣາລີ (4.6 ຕື້ກີບ).
