ຄະນະກໍາມະການອາຫານ ແລະ ຢາໄທ ກວດພົບສານເຄມີຕົກຄ້າງໃນໝາກ ອະງຸ່ນຂຽວ ໄຊ ມັສແຄັດ 50 ຊະນິດ

ສໍານັກຂ່າວໄທຣັດລາຍງານໃນວັນ 24 ຕຸລາ 2024 ວ່າ: ຄະນະກໍາມະການ ອາຫານ ແລະ ຢາໄທ (ອຢ.ປະເທດໄທ) ທີ່ຮ່ວມກັບເຄືອຂ່າຍເຕືອນໄພສານເຄມີກໍາຈັດສັດຕູພືດ (Thai-PAN) ແລະ ນິຕະຍະສານສະຫລາດຊື້ ມູນລະນິທິເພື່ອຜູ້ບໍລິໂພກ ຖະແຫລງຜົນຈາກການທົດສອບສານເຄມີໃນອະງຸ່ນຂຽວ ໄຊ ມັສແຄັດ ໃນທົ່ວກຸງເທບ ແລະ ເຂດອ້ອມຂ້າງ ທີ່ໄດ້ສຸ່ມເກັບຕົວຢ່າງ 24 ຕົວຢ່າງ, ຈາກ 15 ສະຖານທີ່ຈໍາໜ່າຍ ທັງອອນລາຍ, ຕະຫລາດ ແລະ ສູນການຄ້າຕ່າງໆ ພົບວ່າ 23 ຕົວຢ່າງ ຫລື 95.8% ພົບສານເຄມີຕົກຄ້າງເກີນກົດໝາຍກໍານົດ ແລະ ອີກ 1 ຕົວຢ່າງພົບສານທີ່ເປັນວັດຖຸອັນຕະລາຍຊະນິດທີ 4 ທີ່ຖືກແບນໃນໄທ.

ຫລ້າສຸດວັນທີ 25 ຕຸລາ 2024 ຜ່ານມາ ດຣ. ສຸຣະໂຊກ ຕ່າງວິວັດ ເລຂາທິການສໍານັກງານ ອຢ.ໄທ ໃຫ້ສໍາພາດວ່າ: ຈາກທັງໝົດ 24 ຕົວຢ່າງ ພົບມີ 1 ຕົວຢ່າງ ທີ່ມີສານ ໃນກຸ່ມວັດຖຸອັນຕະລາຍຊະນິດທີ 4 ຄື “ສານຄໍໄພຣິຟອສ (CHLORPYRIFOS)” ເປັນສານທີ່ຖືກແບນໃນໄທ, ນອກນັ້ນ ໃນຕົວຢ່າງອື່ນໆຍັງພົບສານເຄມີຕົກຄ້າງ 7-18 ຊະນິດ ແລະ ໂດຍລວມແລ້ວພົບສານເຄມີຕົກຄ້າງ 50 ຊະນິດ ເຊິ່ງມີທັງສານທີ່ຖືກກໍານົດໃນລາຍການເຝົ້າລະວັງ ແລະ ບໍ່ມີໃນລາຍການຕ້ອງເຝົ້າລະວັງຕາມມາດຕະຖານສາກົນ

ຢ່າງໃດກໍຕາມ ໝາກໄມ້ອື່ນໆທີ່ຈໍາໜ່າຍໃນຕະຫລາດທົ່ວໄປຍັງສາມາດກິນໄດ້ ເນື່ອງຈາກສານປົນເປື້ອນທີ່ພົບນັ້ນຍັງບໍ່ເກີນຄ່າມາດຕະຖານຄວາມປອດໄພທີ່ສາກົນກໍານົດ ໂດຍຜູ້ບໍລິໂພກຈະຕ້ອງລ້າງໃຫ້ສະອາດກ່ອນກິນ ແລະ ສຳລັບ ໝາກອະງຸ່ນຂຽວ ໄຊ ມັສແຄັດ ຕ້ອງຮູ້ທີ່ໄປທີ່ມາ ເພື່ອຄວາມປອດໄພ.