ຜົນການເລືອກຕັ້ງ ສສ ຍີ່ປຸ່ນ ຊີ້ວ່າພັກລັດຖະບານ LDP ສູນເສຍສຽງສ່ວນຫລາຍຄັ້ງທໍາອິດໃນຮອບ 15 ປີ
ຜົນການເລືອກຕັ້ງສະມາຊິກສະພາຜູ້ແທນລາສະດອນຍີ່ປຸ່ນທີ່ຈັດຂຶ້ນໃນວັນທີ 27 ຕຸລາຜ່ານມາ ປາກົດວ່າພັກຮ່ວມລັດຖະບານຂອງຍີ່ປຸ່ນ ນໍາໂດຍພັກ LDP ສູນເສຍສຽງສ່ວນຫລາຍໃນສະພາຜູ້ແທນລາສະດອນເປັນຄັ້ງທໍາອິດໃນຮອບ 15 ປີ ຫລັງໄດ້ ສສ ຈໍານວນ 215 ບ່ອນນັ່ງ ຈາກທັງໝົດ 465 ບ່ອນນັ່ງ ເຊິ່ງຫລຸດລົງຫລາຍເມື່ອທຽບໃສ່ການເລືອກຕັ້ງຄັ້ງກ່ອນໜ້າທີ່ໄດ້ 288 ບ່ອນນັ່ງ.
ຂະນະທີ່ພັກຝ່າຍຄ້ານໄດ້ ສສ ລວມກັນ 235 ບ່ອນນັ່ງ ເກີນເຄິ່ງໜຶ່ງຄື 233 ບ່ອນນັ່ງ ເຮັດໃຫ້ສາມາດຄອງສຽງສ່ວນຫລາຍ, ສ່ວນທີ່ເຫລືອອີກ 15 ບ່ອນນັ່ງເປັນຜູ້ສະໝັກອິດສະຫລະ.
ໂດຍພັກ CDPJ ເຊິ່ງເປັນພັກຝ່າຍຄ້ານຫລັກໄດ້ ສສ 148 ບ່ອນນັ່ງ ເພີ່ມຂຶ້ນຫລາຍເມື່ອທຽບໃສ່ການເລືອກຕັ້ງຄັ້ງກ່ອນທີ່ໄດ້ 98 ບ່ອນນັ່ງ.
ຜົນການເລືອກຕັ້ງທີ່ອອກມາຄາດວ່າສະທ້ອນຄວາມບໍ່ພໍໃຈຂອງປະຊາຊົນກ່ຽວກັບບັນຫາເສດຖະກິດ ແລະ ເລື່ອງທາງການເມືອງພາຍໃນພັກ LDP ຫລາຍກໍລະນີ.
ຂະນະດຽວກັນຍັງສົ່ງຜົນເຮັດໃຫ້ເກີດຄວາມບໍ່ແນ່ນອນໃນການບໍລິຫານປະເທດຂອງພັກ LDP ເຊິ່ງເປັນພັກອະນຸລັກນິຍົມ ແລະ ສົ່ງຜົນກະທົບຢ່າງຮຸນແຮງຕໍ່ທ່ານ ຊິເງຣຸ ອິຊິບະ ປະທານພັກ ແລະ ນາຍົກລັດຖະມົນຕີທີ່ຫາກໍເຂົ້າຮັບຕໍາແໜ່ງ.
NHK ລາຍງານຄໍາກ່າວຂອງທ່ານ ອິຊິບະ ທີ່ລະບຸວ່າ: ຜູ້ມີສິດເລືອກຕັ້ງຕັດສິນພັກຂອງທ່ານຢ່າງຮຸນແຮງ.
ເຖິງຢ່າງໃດກໍຕາມ, ດັດຊະນີຫຸ້ນ Nikkei 225 ແລະ ດັດຊະນີ TOPIX ຂອງຍີ່ປຸ່ນ ດີດຕົວຂຶ້ນລະຫວ່າງການຊື້ຂາຍວັນທີ 28 ຕຸລາ ພາຍຫລັງປາກົດຜົນການເລືອກຕັ້ງ ໂດຍ Nikkei ເພີ່ມຂຶ້ນ 1.5%. ຂະນະທີ່ TOPIX ເພີ່ມຂຶ້ນ 1.18%, ແຕ່ຄາດວ່າເປັນແຮງໜຸນຈາກເງິນເຢນທີ່ອ່ອນຄ່າລົງໃນວັນນີ້ ໂດຍຫລຸດລົງ 0.96% ຢູ່ລະດັບ 153.75.
ອ້າງອີງ:
- https://www.bbc.com/news/articles/c8xpev42g78o
- https://edition.cnn.com/2024/10/27/asia/japan-ruling-party-loses-majority-election-intl/index.html
- https://www.cnbc.com/2024/10/28/asia-markets.html
