ອີຣານ ກ່າວວ່າ ອາເມລິກາຕ້ອງຮັບຜິດຊອບ ຖ້າຖືກອິດສະລາແອນເອົາຄືນ

      ທ່ານ ອາເມຍ ເຊອິດ ອິຣາວານີ ເອກອັກຄະລັດຖະທູດອີຣານປະຈໍາສະຫະປະຊາຊາດ (UN) ກ່າວວ່າ: ການທີ່ປະທານາທິບໍດີ ໂຈ ໄບເດນ ຜູ້ນໍາອາເມລິກາ ຕອບວ່າ: “ເຂົ້າໃຈ” ກໍລະນີນັກຂ່າວຊັກຖາມກ່ຽວກັບແນວທາງຂອງອິດສະລາແອນທີ່ຕ້ອງການຕອບໂຕ້ອີຣານ ທີ່ຍິງລູກສອນໄຟໃສ່ອິດສະລາແອນ ໃນວັນທີ 1 ຕຸລາຜ່ານມານັ້ນ ເປັນການປຸກປັ່ນ ແລະ ກັງວົນ.

      ດັ່ງນັ້ນ, ລັດຖະບານວໍຊິງຕັນຕ້ອງຮັບຜິດຊອບຕໍ່ບົດບາດຂອງຕົນເອງໃນການປຸກປັ່ນສົ່ງເສີມ ແລະ ກະຕຸ້ນໃຫ້ອິດສະລາແອນແຂງແກ່ນຕໍ່ອີຣານ ເຊິ່ງເປັນການລະເມີດກົດໝາຍສາກົນ ແລະ ກົດບັດຂອງສະຫະປະຊາຊາດ.

      ຂະນະທີ່ສື່ທ້ອງຖິ່ນຫລາຍແຫ່ງຂອງອາເມລິກາລາຍງານ ໂດຍອ້າງເປັນເນື້ອໃນບາງສ່ວນຈາກເອກະສານລັບທີ່ຫລຸດອອກມາ ວ່າເປັນຂໍ້ມູນອ່ອນໄຫວ ເຊິ່ງອິດສະລາແອນສົ່ງໃຫ້ລັດຖະບານວໍຊິງຕັນ ມີເນື້ອໃນສໍາຄັນກ່ຽວກັບການເຄື່ອນຍ້າຍຊັບສິນທາງທະຫານບາງສ່ວນ ເພື່ອກຽມຄວາມພ້ອມຕອບໂຕ້ອີຣານ ຈາກເຫດການຍິງລູກສອນໄຟ ໃນວັນທີ 1 ຕຸລາຜ່ານມາ ແລະ ມີການເນັ້ນວ່າ: ອິດສະລາແອນຈະຍົກເວັ້ນໂຄງລ່າງພື້ນຖານດ້ານນິວເຄຼຍ ແລະ ນໍ້າມັນຂອງອີຣານ.

      ເຖິງຢ່າງໃດກໍດີ, ເນື້ອໃນຂອງເອກະສານອີກສ່ວນໜຶ່ງລະບຸກ່ຽວກັບແນວທາງການໂຈມຕີ ໂດຍແບ່ງເປັນສອງຫົວຂໍ້ຫລັກຄື: ກອງທັບອາກາດອິດສະລາແອນຍັງກຽມການໂຈມຕີອີຣານ ແລະ ມີການຊ້ອມຮົບ ລວມທັງການລະດົມກໍາລັງທະຫານຄັ້ງໃຫຍ່ເປັນຄັ້ງທີສອງ. ອີກທັງມີການອະທິບາຍກ່ຽວກັບການຈັດການລະບົບລູກສອນໄຟນໍາວິຖີ ແລະ ລູກສອນໄຟທີ່ຍິງຈາກອາກາດສູ່ພື້ນ.

       ສ່ວນອີກຫົວຂໍ້ໜຶ່ງກ່ຽວກັບການທີ່ກອງທັບອິດສະລາແອນຍັງກຽມການດ້ານຍຸດໂທປະກອນ ແລະ ການໃຊ້ຍົນບໍ່ມີຄົນຂັບແບບໂຈມຕີ ເຊິ່ງມີທ່າອ່ຽງເກືອບແນ່ນອນ ວ່າມີເປົ້າໝາຍຄືການໂຈມຕີອີຣານ.

      ສ່ວນທ່ານ ໄມ ຈອນສັນ ປະທານສະພາຜູ້ແທນລາຊະດອນອາເມລິກາ ກ່າວວ່າ: ມີການຕັ້ງຄະນະເພື່ອເລັ່ງກວດສອບທີ່ມາທີ່ໄປວ່າ: ສື່ມວນຊົນມີເອກະສານໄດ້ແນວໃດ. ຂະນະທີ່ກະຊວງການປ້ອງກັນຄວາມສະຫງົບອາເມລິກາສະແດງຄວາມກັງວົນ, ສ່ວນອິດສະລາແອນຍັງປະຕິເສດໃຫ້ຄວາມເຫັນຢ່າງເປັນທາງການ.