ອິດສະລາແອນໂຈມຕີເປົ້າໝາຍຢູ່ຊິຣີ ສັງຫານຜູ້ນໍາຝ່າຍການເງິນຂອງກຸ່ມແຮັດໂບລາ

       ກອງທັບອິດສະລາແອນໂຈມຕີທາງອາກາດ ກາງເມືອງຫລວງຂອງຊິຣີ ສັງຫານຫົວໜ້າຝ່າຍການເງິນຂອງກຸ່ມແຮັດໂບລາ.

       ພົນເຮືອຕີ ດານຽວ ຮາກາຣີ ໂຄສົກກອງທັບອິດສະລາແອນ ກ່າວວ່າ: ປະຕິບັດການໂຈມຕີທາງອາກາດຢູ່ຊິຣີ ເຊິ່ງເກີດຂຶ້ນໃນວັນທີ 21 ຕຸລາຜ່ານມາ ສາມາດສັງຫານຜູ້ຊາຍທີ່ເຮັດໜ້າທີ່ຜູ້ນໍາໜ່ວຍ 4400 ຂອງກຸ່ມແຮັດໂບລາ ເຊິ່ງຮັບຜິດຊອບກິດຈະການດ້ານການເງິນທັງໝົດຂອງກຸ່ມ ຜ່ານການລໍາລຽງນໍ້າມັນຂອງອີຣານ ຜ່ານຊິຣີ ເພື່ອຈໍາໜ່າຍຢູ່ລີບັງ.

      ທັງນີ້, ພົນເຮືອຕີ ຮາກາຣີ ບໍ່ໄດ້ໃຫ້ຂໍ້ມູນວ່າ: ຜູ້ຊາຍຄົນນັ້ນຄືໃຜ, ແຕ່ກ່າວວ່າ: ກ່ອນໜ້ານັ້ນ ໜ່ວຍ 4400 ຢູ່ພາຍໃຕ້ການນໍາຂອງທ່ານ ໂມຮໍາໝັດ ຈາຟາ ເຄເຊຍ ເຊິ່ງຮູ້ຈັກໃນຊື່ ຊີກ ຊາລາ.

      ຂະນະທີ່ອົງກອນສັງເກດການດ້ານມະນຸດສະທໍາຊິຣີ (SOHR) ລາຍງານວ່າ: ການໂຈມຕີດັ່ງກ່າວຂອງກອງທັບອິດສະລາແອນມຸ້ງເປົ້າໃສ່ຜູ້ຊາຍຄົນໜຶ່ງທີ່ບໍ່ແມ່ນຊາວຊິຣີກໍາລັງຂັບລົດຢູ່ຖະໜົນເສັ້ນໜຶ່ງໃນນະຄອນຫລວງດາມັດກັດ ເພື່ອໄປຮ່ວມພິທີລະນຶກເຖິງທ່ານ ຢາຢາ ຊິນວາ ຜູ້ນໍາສູງສຸດຝ່າຍການເມືອງຂອງກຸ່ມຮາມັດ ທີ່ເສຍຊີວິດລະຫວ່າງການຜະເຊີນໜ້າກັບທະຫານອິດສະລາແອນຢູ່ເຂດກາຊາໃນອາທິດຜ່ານມາ.