ລາວ-ມຽນມາ ຮ່ວມລົງນາມ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານແຮງງານ

ວັນທີ 21 ຕຸລາ 2024 ກອງປະຊຸມລັດຖະມົນຕີແຮງງານ ລາວ-ມຽນມາ ໂດຍການເປັນປະທານຮ່ວມຂອງ ທ່ານ ນາງໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ແລະ ທ່ານ ອູ ມິນ ນອງ (U Myint Naung) ລັດຖະມົນຕີ ກະຊວງແຮງງານ ແຫ່ງ ສສ ມຽນມາ, ມີ ທ່ານ ອອງ ໂກ (Aung KO) ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສສ ມຽນມາ ປະຈໍາ ສປປ ລາວ ແລະ ຄະນະຜູ້ແທນທີ່ກ່ຽວຂ້ອງ ຂອງສອງຝ່າຍ ລາວ ແລະ ມຽນມາ ເຂົ້າຮ່ວມ.

ທ່ານ ນາງ ໃບຄຳ ຂັດທິຍະ ໄດ້ມີຄໍາເຫັນວ່າ: ຕະຫລອດໄລຍະຜ່ານມາ ສອງຝ່າຍ ໄດ້ມີຄວາມພະຍາ ຍາມ ໃນການປະສານສົມທົບກັນເປັນຢ່າງດີ ໂດຍສະເພາະແມ່ນການລົງເລິກຮ່ວມມືດ້ານແຮງງານ ລາວ-ມຽນມາ ຊຶ່ງຖືວ່າເປັນບາດກ້າວທີ່ດີໃຫ້ແກ່ແຮງງານຂອງສອງປະເທດ ຈະໄດ້ຮັບການປົກປ້ອງສິດ ແລະ ຜົນປະໂຫຍດຕາມກົດໝາຍ; ໄດ້ຕີລາຄາສູງຕໍ່ຜົນສຳເລັດທີ່ຍາດມາໄດ້ ໂດຍສະເພາະສອງຝ່າຍໄດ້ມີຄວາມພະຍາຍາມ ໃນການປະສານສົມທົບກັນຢ່າງໃກ້ຊິດ, ມີການປຶກສາຫາລື ແລະ ແລກປ່ຽນຂໍ້ມູນຂ່າວສານ ເສີມສ້າງສາຍພົວພັນຮ່ວມມື ໂດຍສະເພາະດ້ານແຮງງານ ລາວ-ມຽນມາ ໃຫ້ກ້າວສູ່ການຮ່ວມມືທີ່ເປັນຮູບປະທໍາ ແລະ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນສູງ ແນໃສ່ປົກປ້ອງສິດ ແລະ ຜົນປະໂຫຍດຂອງແຮງງານສອງປະເທດ ຕາມກົດໝາຍ ແລະ ລະບຽບການກຳນົດ, ສອງຝ່າຍ ເຫັນດີເປັນເອກະພາບ ແລະ ຮ່ວມລົງນາມໃສ່ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານແຮງງານ ລາວ-ມຽນມາ ແລະ ບົດບັນທຶກກອງປະຊຸມລັດຖະມົນຕີແຮງງານ ລາວ-ມຽນມາ ເພື່ອເປັນບ່ອນອີງໃຫ້ແກ່ສອງຝ່າຍ ນໍາໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ.

ກອງປະຊຸມຍັງໄດ້ປຶກສາຫາລືຕໍ່ແຜນການຮ່ວມມື ຂອງສອງກະຊວງ ໃນຕໍ່ໜ້າ ຊຶ່ງໄດ້ເອກະພາບຮ່ວມກັນໃນບາງເນື້້ອໃນຕົ້ນຕໍຄື: ສອງຝ່າຍ ຈະແຕ່ງຕັ້ງຄະນະວິຊາການ ເພື່ອປະສານສົມທົບຄົ້ນຄວ້າກົນໄກການປະສານງານ ແລະ ກົນໄກການເຮັດວຽກຮ່ວມກັນຢ່າງໃກ້ຊິດ ແນໃສ່ເຮັດໃຫ້ການຈັດຕັ້ງຜັນຂະຫຍາຍເນື້ອໃນຂອງບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານແຮງງານລາວ-ມຽນມາ ໄດ້ຮັບການປະຕິບັດຢ່າງເປັນຮູບປະທໍາ ແລະ ມີຜົນສໍາເລັດສູງ; ສະເໜີໃຫ້ສອງຝ່າຍ ລົງເລິກສ້າງຮ່າງຂໍ້ຕົກ ລົງການຮ່ວມມືກັນ ເປັນອັນສະເພາະຂອງແຕ່ລະວຽກທີ່ເອກະພາບກັນ ຊຶ່ງເປັນວຽກຮີບດ່ວນ ໂດຍສະ ເພາະການຜັນຂະຫຍາຍເນື້້ອໃນພາຍໃຕ້ ມາດຕາ 5 ແລະ ມາດຕາ 8 ເພື່ອນໍາໄປສູ່ການແກ້ໄຂບັນຫາແຮງງານ ທີ່ເຂົ້າມາເຄື່ອນໄຫວບໍ່ຖືກຕ້ອງຢູ່ ສປປ ລາວ ໂດຍສະເພາະຢູ່ເຂດເສດຖະກິດພິເສດສາມ ລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ດ້ວຍການຂຶ້ນທະບຽນຮັບຮູ້ ແລະ ຢັ້ງຢືນຈາກສອງຝ່າຍ ເພື່ອປົກປ້ອງສິດ ແລະ ຜົນປະໂຫຍດຂອງເຂົາເຈົ້າຕາມກົດໝາຍ.