ອົງການອະນາໄມໂລກຮັບຮອງອີຢິບເປັນປະເທດບໍ່ມີເຊື້ອມາລາເຣຍ
ອີຢິບເປັນປະເທດຫລ້າສຸດທີ່ໄດ້ຮັບຮອງຈາກ WHO ວ່າ: ບໍ່ມີເຊື້ອມາລາເຣຍ ພາຍຫລັງມີຄວາມພະຍາຍາມກໍາຈັດພະຍາດດັ່ງກ່າວມາ 1 ສະຕະວັດ.
ອົງການອະນາໄມໂລກ (WHO) ອອກຖະແຫລງການສະແດງຄວາມຍິນດີຕໍ່ອີຢິບໃນການເປັນປະເທດຫລ້າສຸດທີ່ບໍ່ມີພະຍາດມາລາເຣຍ ໂດຍຍົກຍ້ອງວ່າເປັນຜົນສໍາເລັດຄັ້ງປະຫວັດສາດ ພາຍຫລັງໃຊ້ຄວາມພະຍາຍາມຫລາຍປີຂອງອີຢິບ ເພື່ອຕໍ່ສູ້ພະຍາດຮ້າຍດັ່ງກ່າວທີ່ມີຍຸງກົ້ນຊີ້ເປັນພາຫະ.
ທ່ານ ເທດຣອສ ແອດຮານອມ ເກເບເຢຊຸສ ຜູ້ອໍານວຍການ WHO ກ່າວວ່າ: ພະຍາດມາລາເຣຍທີ່ເຄີຍລະບາດຢູ່ອີຢິບຢ່າງໜັກ ມີປະຫວັດສາດຍາວນານທຽບເທົ່າອາລິຍະທໍາອີຢິບ, ແຕ່ປັດຈຸບັນນີ້ກາຍເປັນພຽງອະດີດ. ການຮັບຮອງວ່າອີຢິບບໍ່ມີພະຍາດມາລາເຣຍ ຖືເປັນປະຫວັດສາດຢ່າງແທ້ຈິງ ແລະ ເປັນເຄື່ອງພິສູດເຖິງຄວາມມຸ້ງໝັ້ນຂອງປະຊາຊົນ ແລະ ລັດຖະບານ.
WHO ຈະຮັບຮອງການບໍ່ມີພະຍາດມາລາເຣຍ ເມື່ອປະເທດແຫ່ງນັ້ນສາມາດພິສູດໃຫ້ເປັນທີ່ປະຈັກວ່າ: ສາມາດຂັດຂວາງຕ່ອງໂສ້ການແຜ່ເຊື້ອຈາກຍຸງກົ້ນສີ້ຢ່າງໜ້ອຍ 3 ປີຕິດຕໍ່ກັນ ລວມທັງສະແດງໃຫ້ເຫັນເຖິງປະສິດທິພາບເພື່ອການປ້ອງກັນການແຜ່ລະບາດຂອງພະຍາດໃນອະນາຄົດ.
ຢ້້ອນກັບໄປໃນປີ 1920 ຄວາມພະຍາຍາມຂັ້ນທໍາອິດຂອງອີຢິບໃນການປ້ອງກັນພະຍາດມາລາເຣຍເລີ່ມຈາກການຫ້າມປູກເຂົ້າ ແລະ ພືດຜົນທາງກະສິກໍາໃກ້ເຮືອນ ເພື່ອຫລຸດການສໍາຜັດລະຫວ່າງມະນຸດ ແລະ ຍຸງ. ເຖິງຢ່າງໃດກໍຕາມ, ໃນປີ 1942 ຈໍານວນຜູ້ຕິດເຊື້ອພະຍາດມາລາເຣຍໃນປະເທດພັດເພີ່ມຂຶ້ນເຖິງ 3 ລ້ານຄົນ ຈາກການອົບພະຍົບໃນໄລຍະສົງຄາມໂລກຄັ້ງທີ 2.
ຕໍ່ມາໃນປີ 1960 ການກໍ່ສ້າງເຂື່ອນອັສວານບໍລິເວນແມ່ນໍ້າໄນພັດກາຍເປັນການເພີ່ມແຫລ່ງນໍ້າ ເຊິ່ງເປັນແຫລ່ງເພາະພັນຂອງຍຸງນາໆຊະນິດ.
ຈົນຮອດປີ 2001 WHO ປະກາດວ່າ: ສະຖານະການພະຍາດມາລາເຣຍຢູ່ອີຢິບຢູ່ພາຍໃຕ້ການຄວບຄຸມຢ່າງເຂັ້ມງວດ.
