ອົງການອະນາໄມໂລກປະກາດ ສະຕັອກວັກຊີນປ້ອງກັນພະຍາດອະຫິວາຂອງໂລກໝົດແລ້ວ

      ວັນທີ 18 ຕຸລາຜ່ານມາ, ອົງການອະນາໄມໂລກ (WHO) ລະບຸວ່າ: ວັກຊີນປ້ອງກັນພະຍາດອະຫິວາຊະນິດຮັບປະທານ ບໍ່ມີເຫລືອຢູ່ໃນສະຕັອກວັກຊີນທົ່ວໂລກແລ້ວ ແລະ ຄາດວ່າຂາດເຂີນວັກຊີນດັ່ງກ່າວຈະສົ່ງຜົນກະທົບຕໍ່ການເຮັດວຽກເພື່ອຢັບຢັ້ງການແຜ່ລະບາດຂອງພະຍາດນີ້.

      WHO ລະບຸໃນລາຍງານສະຖານະການປະຈໍາເດືອນວ່າ: ການຜະລິດວັກຊີນທົ່ວໂລກດໍາເນີນງານຢ່າງເຕັມກໍາລັງ, ແຕ່ອຸປະສົງຢູ່ໃນລະດັບສູງກວ່າອຸປະທານຫລາຍ.

     “ໃນວັນທີ 14 ຕຸລາຜ່ານມາ, ສະຕັອກວັກຊີນປ້ອງກັນພະຍາດອະຫິວາຊະນິດຮັບປະທານໄດ້ໝົດລົງ ແລະ ບໍ່ມີວັກຊີນເຫລືອສໍາລັບແຈກຢາຍ”. WHO ລະບຸອີກວ່າ: ເຖິງວ່າອົງການຄາດວ່າຈະມີວັກຊີນເພີ່ມຂຶ້ນໃນມໍ່ໆນີ້, ແຕ່ການຂາດເຂີນແບບນີ້ເຮັດໃຫ້ເກີດຄວາມທ້າທາຍຕໍ່ຄວາມພະຍາຍາມໃນການຮັບມືການລະບາດ ແລະ ຂັດຂວາງຄວາມພະຍາຍາມໃນການຄວບຄຸມການແຜ່ລະບາດຂອງພະຍາດ.

      ທັງນີ້, WHO ລະບຸວ່າ: ລະຫວ່າງວັນທີ 1 ກັນຍາ – 14 ຕຸລາຜ່ານມາ ກຸ່ມປະສານງານສາກົນ (ICG) ວ່າດ້ວຍການຈັດຫາວັກຊີນ ໄດ້ຮັບຄໍາຂໍວັກຊີນປ້ອງກັນພະຍາດອະຫິວາຊະນິດຮັບປະທານຈາກບັງກະລາແດດ, ຊູດັງ, ໄນເຈີ, ເອທິໂອເປຍ ແລະ ມຽນມາ ທັງໝົດ 8.4 ລ້ານໂດສ, ແຕ່ເນື່ອງຈາກວັກຊີນມີຈໍານວນຈໍາກັດ ໜ່ວຍງານຈຶ່ງສາມາດຈັດສົ່ງວັກຊີນໄດ້ພຽງ 7.6 ລ້ານໂດສ ເທົ່ານັ້ນ.

       WHO ລາຍງານວ່າ: ມີຜູ້ຕິດເຊື້ອພະຍາດອະຫິວາ 439,724 ຄົນ ແລະ ມີຜູ້ເສຍຊີວິດຈາກພະຍາດດັ່ງກ່າວ 3,432 ຄົນໃນປີນີ້ ຈົນຮອດວັນທີ 29 ກັນຍາຜ່ານມາ ເຖິງວ່າຕົວເລກຈະຫລຸດລົງ 1% ຈາກປີຜ່ານມາ, ແຕ່ຈໍານວນຜູ້ເສຍຊີວິດທີ່ເພີ່ມຂຶ້ນ 126% ຖືເປັນເລື່ອງກັງວົນຫລາຍ.