ກຳມາທິການວຽກງານພາຍໃນໄອປາ ປຶກສາຫາລື ແລະ ພິຈາລະນະຮ່າງມະຕິ 16 ສະບັບ
ວັນທີ 20 ຕຸລາ 2024 ກອງປະຊຸມກຳມາທິການວຽກງານພາຍໃນໄອປາ ຂອງກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໂດຍການເປັນປະທານຂອງ ທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ແຫ່ງ ສປປ ລາວ, ມີສະມາ ຊິກລັດຖະສະພາ ຈາກບັນດາປະເທດສະມາຊິກອາຊຽນ ເຂົ້າຮ່ວມ.
ກອງປະຊຸມຄັ້ງນີ້, ໄດ້ຮ່ວມກັນຄົ້ນຄວ້າ, ປຶກສາຫາລື ແລະ ພິຈາລະນາຮ່າງມະຕິ ຈຳນວນ 16 ສະບັບ ໃນຂົງເຂດວຽກງານຈັດຕັ້ງພາຍໃນໄອປາ ຄື: ຮ່າງມະຕິວ່າດ້ວຍບົດລາຍງານການກວດສອບການເງິນ ສົກປີ 2023-2024; ຮ່າງມະຕິວ່າດ້ວຍແຜນສະເໜີງົບປະມານ ຂອງກອງເລຂາໄອປາ ໄລຍະວັນທີ 1 ສິງຫາ 2024 ຫາ 31 ກໍລະກົດ 2025; ຮ່າງມະຕິວ່າດ້ວຍການຈັດສັນເງິນພັນທະໃນການປະກອບສ່ວນ ຂອງລັດຖະສະພາສັງເກດການໄອປາ; ຮ່າງມະຕິວ່າດ້ວຍ ການປັບປຸງທຳມະນູນໄອປາ; ຮ່າງມະຕິວ່າດ້ວຍ ການຮັບຮອງເອົາຄໍາແນະນຳ ແລະ ຂັ້ນຕອນການພົວພັນ ລະຫວ່າງ ໄອປາ ກັບພາກສ່ວນພາຍນອກ; ຮ່າງມະຕິວ່າດ້ວຍການຮັບຮອງເອົາ ລະບຽບເງື່ອນໄຂ (ToR) ແລະ ການກອບແນວຄວາມຄິດ(Concept Note) ກ່ຽວກັບຫໍສະໝຸດກົດໝາຍດີຈິຕອນ AIPA (AIPAlync); ຮ່າງມະຕິ ວ່າດ້ວຍການສະເໜີບົດບັນທຶກຄວາມເຂົ້າໃຈລະຫວ່າງ AIPA ກັບ ອົງການລັດຖະສະພາສາກົນ/ສະມາຄົມ; 8 ຮ່າງມະຕິ ວ່າດ້ວຍ ການສະເໜີບົດບັນທຶກຄວາມເຂົ້າໃຈລະຫວ່າງ AIPA ກັບ ຄູ່ຮ່ວມມືພັດທະນາ.
ນອກຈາກນີ້, ຍັງໄດ້ຄົ້ນຄວ້າ, ປຶກສາຫາລື ແລະ ພິຈາລະນາ ຮ່າງມະຕິວ່າດ້ວຍ ການຮັບຮອງເອົາສະພາແຫ່ງຊາດ ຣາຊະອານາຈັກບາເຣນ ເຂົ້າເປັນຜູ້ສັງເກດການ ຂອງ AIPA; ຮ່າງມະຕິ ວ່າດ້ວຍ ການຮັບຮອງເອົາສະພາແຫ່ງຊາດບູນເດັດສະຕາກ (Bundestag) ຂອງສະຫະພັນ ເຢຍລະມັນ ເຂົ້າເປັນຜູ້ສັງເກດການ ຂອງ AIPA; ຮ່າງມະຕິ ວ່າດ້ວຍ ການມອບລາງວັນຜູ້ທີ່ມີຜົນງານດີເດັ່ນ ຕໍ່ AIPA ໃຫ້ແກ່ ທ່ານ ເປຮິນ ດາໂຕະ ຮາຈິ ຈູດິນ ຮາຈິ ອາຊາ ຈາກບຣູໄນ ດາຣູຊາລາມ; ຮ່າງມະຕິ ວ່າດ້ວຍ ການມອບລາງວັນຜູ້ທີ່ມີຜົນງານດີເດັ່ນ ຕໍ່ AIPA ໃຫ້ແກ່ ທ່ານ ຮູ ສະຣີ ຈາກຣາຊະອານາຈັກກຳປູເຈຍ; ຮ່າງມະຕິ ວ່າດ້ວຍການມອບລາງວັນຜູ້ທີ່ມີຜົນງານດີເດັ່ນ ຕໍ່ AIPA ໃຫ້ແກ່ທ່ານ ສາດສະດາຈານ ນາງ ການຈະນາລັດ ຣີວິໂຣຈະນາ ຈາກຣາຊະອານາຈັກໄທ; ຮ່າງມະຕິ ວ່າດ້ວຍ ການສະແດງຄວາມຊົມເຊີຍການບໍລິຫານງານຂອງ ທ່ານ ໄຊສົມພອນ ພົມວິຫານ ປະທານໄອປາ; ຮ່າງມະຕິວ່າດ້ວຍການສະແດງຄວາມຊົມເຊີຍ ແລະ ຂອບໃຈ ຕໍ່ລັດຖະບານ ຟີລິບປິນ ທີ່ໄດ້ສະໝັກໃຈປະກອບສ່ວນງົບປະມານ 20.000 ໂດລາສະຫະລັດ ໃຫ້ AIPA ໃນປີ 2024; ຮ່າງມະຕິ ວ່າດ້ວຍວັນທີ ແລະ ສະຖານທີ່ ຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດ ອາຊຽນ (AIPA) ຄັ້ງທີ 46.
ທີ່ມາ: ຂ່າວສານປະເທດລາວ
