ປກສ ເມືອງອາດສະພອນ ຈູດທຳລາຍໃບກະທ່ອມທີ່ຢຶດມາໄດ້ 125 ກິໂລກຣາມ

ວັນທີ 14 ຕຸລາ 2024, ປກສ ເມືອງອາດສະພອນ ແຂວງ ສະຫວັນນະເຂດ ໄດ້ຈູດທຳລາຍ ສິ່ງເສບຕິດ ປະເພດໃບກະທ່ອມ 125 ກິໂລກຣາມ ທີ່ເຈົ້າໜ້າທີ່ຢຶດມາໄດ້. ເນື່ອງໃນໂອກາດວັນແຫ່ງຊາດຕ້ານຢາເສບຕິດ ຄົບຮອບ 23 ປີ (12 ຕຸລາ 2001-12 ຕຸລາ 2023).

ພັທ ອຸເປຂາ ເທື່ອນທຳມະຈັກ ຮອງຫົວໜ້າກອງບັນຊາການ ປກສ ເມືອງ ອາດສະພອນ ລາຍງານວ່າ: ນີ້ແມ່ນອີງຕາມກົດໝາຍອາຍາວ່າດ້ວຍການຕ້ານ ແລະ ສະກັດກັ້ນພືດທີ່ຕ້ອງຫ້າມ ແລະ ອີງຕາມຄຳສັ່ງຂອງຫົວໜ້າອົງການໄອຍະການສູງສຸດສະບັບເລກທີ 006/ອຍກ ລົງວັນທີ 30 ມີນາ 2023, ຢາເສບຕິດປະເພດຕ່າງໆໄດ້ກາຍເປັນໄພພິບັດ ລວມຂອງມວນມະນຸດ ເຊິ່ງສົ່ງຜົນສະທ້ອນ ໂດຍກົງຕໍ່ເສດ ຖະກິດ-ສັງຄົມ ຢາເສບຕິດບໍ່ພຽງແຕ່ເປັນຕົ້ນເຫດຂອງອາຊະຍາກໍາໃນຄອບຄົວ ແລະ ສັງຄົມເທົ່ານັ້ນ ມັນຍັງສົ່ງຜົນສະທ້ອນຕໍ່ຄວາມໝັ້ນຄົງແລະ ທໍາລາຍຊາວໜຸ່ມ, ເຍົາວະຊົນ, ອານຸຊົນ ທີ່ເປັນໜໍ່ແໜງຂອງປະເທດຊາດ. ສະນັ້ນ, ພັກ-ລັດຖະບານ ຈຶ່ງຖືເອົາວັນທີ 12 ຕຸລາ ຂອງທຸກໆປີ ເປັນວັນແຫ່ງຊາດຕ້ານຢາເສບຕິດ.