ເສດຖະກິດສິງກະໂປເຕີບໃຫຍ່ 4.1% ໃນໄຕມາດທີສາມປີນີ້

      ກະຊວງການຄ້າ ແລະ ອຸດສາຫະກໍາຂອງສິງກະໂປລາຍງານ ຕົວເລກຄາດຄະເນການເຕີບໃຫຍ່ເສດຖະກິດຂອງປະເທດ ໃນໄຕມາດ 3 ຂອງປີນີ້ ຫລື ລະຫວ່າງເດືອນກໍລະກົດ-ກັນຍາຜ່ານມາ ຢູ່ລະດັບ 4.1% ເມື່ອທຽບໃສ່ປີຕໍ່ປີ ເຊິ່ງເພີ່ມຂຶ້ນຈາກການເຕີບໃຫຍ່ 2.9% ໃນໄຕມາດທີ 2.

      ສໍານັກຂ່າວຊິນຮົວລາຍງານວ່າ: ຂະແໜງການຜະລິດໃນໄຕມາດ 3 ຂອງປີນີ້ ຂະຫຍາຍຕົວ 7.5% ເມື່ອທຽບໃສ່ປີຕໍ່ປີ ເຊິ່ງຟື້ນຕົວຈາກການຫລຸດລົງ 1.1% ໃນໄຕມາດທີ 2 ໂດຍກຸ່ມການຜະລິດທັງໝົດ ຍົກເວັ້ນກຸ່ມການຜະລິດທາງຊີວະການແພດ ມີການຂະຫຍາຍຕົວເພີ່ມຂຶ້ນໃນໄຕມາດທີ 3.

      ສ່ວນຂະແໜງການກໍ່ສ້າງເຕີບໃຫຍ່ 3.1% ເມື່ອທຽບໃສ່ປີຕໍ່ປີ ດ້ວຍແຮງໝຸນຈາກຜົນຜະລິດການກໍ່ສ້າງຂອງພາກເອກະຊົນ. ເຖິງຢ່າງໃດກໍຕາມ, ການເຕີບໃຫຍ່ໃນໄຕມາດ 3 ຕໍ່າກວ່າການເຕີບໃຫຍ່ 4.8% ຂອງໄຕມາດທີ 2.

      ສ່ວນຂະແໜງອຸດສາຫະກໍາການບໍລິການໃນໄຕມາດທີ 3 ເຕີບໃຫຍ່ 3.3% ເມື່ອທຽບໃສ່ປີຕໍ່ປີ ເຊິ່ງຕໍ່າກວ່າການເຕີບໃຫຍ່ 3.6% ໃນໄຕມາດທີ 2 ຂອງປີນີ້.