ເຈົ້າໜ້າທີ່ກວດກາການຄ້າ ແຂວງຈຳປາສັກ ລົງກວດກາສິນຄ້າທີ່ວາງຂາຍຢູ່ບຸນອອກພັນສາ ແລະ ຊ່ວງເຮືອປະເພນີ 2024 ຢູ່ນະຄອນປາກເຊ

ວັນທີ 14 ຕຸລາ 2024, ເຈົ້າໜ້າທີ່ກວດກາການຄ້າ ຂະແໜງການຄ້າພາຍໃນ ພະແນກອຸດສາຫະກໍາ ແລະ ການຄ້າ ແຂວງຈໍາປາສັກ ຮ່ວມກັບ ເຈົ້າໜ້າທີ່ກວດກາການຄ້າ ຫ້ອງການອຸດສາຫະກໍາ ແລະ ການຄ້ານະຄອນປາກເຊ ໄດ້ເຄື່ອນໄຫວຕິດຕາມກວດກາ ການຕິດສະຫລາກ ແລະ ຕິດລາຄາສິນຄ້າເປັນພາສາລາວ, ສິນຄ້າຮຽນແບບ ແລະ ສິນຄ້າໝົດອາຍຸ ທີ່ວາງສະແດງ, ຈໍາໜ່າຍ ແລະ ຊື້ – ຂາຍ ໂດຍສະເພາະແມ່ນການຊັດແຫລມ ແລະ ຊັດປູມເປົ້າ ໃນງານປະວໍລະນາ – ອອກພັນສາ ແລະ ຊ່ວງເຮືອປະເພນີ ປະຈໍາປີ 2024 ທີ່ນະຄອນປາກເຊ.

ທັງນີ້ ກໍເພື່ອເຮັດໃຫ້ການວາງສະແດງ, ຈໍາໜ່າຍ ແລະ ຊື້-ຂາຍ ສິນຄ້າ ມີຄວາມເປັນລະບຽບຮຽບຮ້ອຍ, ຖືກຕ້ອງຕາມລະບຽບກົດໝາຍ ທັງເປັນການປົກປ້ອງຜູ້ຊົມໃຊ້ຕື່ມອີກ.

ຖ້າຫາກຜູ້ບໍລິໂພກ ພົບເຫັນຮຽນແບບ, ໝົດອາຍຸ ແລະ ນໍາເຂົ້າທີ່ບໍ່ຖືກຕ້ອງ ສາມາດແຈ້ງເຈົ້າໜ້າທີ່ກວດກາການຄ້າໄດ້ທີ່ເບີ 020 96 519 888.